សេដ្ឋកិច្ច

ឥណ្ឌា កំពុងសម្លឹងឱកាសបង្កើតរោងចក្រកែច្នៃស្វាយចន្ទី នៅកម្ពុជា

បានផុស

៤ ខែ មុន

នៅ

ថ្ងៃពុធ ១១ មីនា ២០២៦

ដោយ

ក្រុមហ៊ុនឥណ្ឌាចំនួនពីរនៅថ្ងៃទី ១១ ខែមីនា ឆ្នាំ ២០២៦ បានចុះទស្សនកិច្ចសិក្សាសក្ដានុពលបង្កើតរោងចក្រកែច្នៃស្វាយចន្ទីនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុយ កុកធាន អនុប្រធានសមាគមស្វាយចន្ទីកម្ពុជាបានប្រាប់ឱ្យដឹងថា ប្រសិនបើវិនិយោគិនឥណ្ឌាមកបើករោងចក្រនៅកម្ពុជា កាន់តែច្រើន នឹងពន្លឿនឱ្យវិស័យកែច្នៃស្វាយចន្ទីកម្ពុជាកើនឡើងបន្ថែមទៀត ខណៈឥណ្ឌា ជាប្រទេសដែលមានបច្ចេកវិទ្យាកែច្នៃខ្ពស់ក្នុងចំណោមប្រទេសមួយចំនួនដូចជាវៀតណាម។

លោក ស៊ុយ កុកធាន យល់ឃើញថា៖ «ឥណ្ឌាឈរលំដាប់ជាមួយវៀតណាមដែរ នៅពេលដែលគេមក គេយកបច្ចេកវិទ្យាមក ហើយយើងនឹងរៀនពីអាហ្នឹង ហើយផលិតចេញពីបទពិសោធន៍ និងចំណេះដឹង»។

«ទីផ្សារឥណ្ឌាសាកសមសម្រាប់គ្រាប់ស្វាយចន្ទីមិនទាន់កែច្នៃរបស់កម្ពុជា ដែលជាប្រភេទគ្រាប់ធំ ប្រសិនបើកម្ពុជាអាចចាប់យកទីផ្សារឥណ្ឌាបាន ប្រទេសដ៏ទៃទៀត មិនអាចដើរតួផ្ដាច់មុខមកមកលើស្វាយចន្ទីស្រស់កម្ពុជានោះទេ ដែលជាទិសដៅសមាគមស្វាយចន្ទីកម្ពុជាចង់ធ្វើដើម្បីជួយពង្រឹងដល់ខ្សែច្រវាក់តម្លៃផលិតកម្មស្វាយចន្ទីរបស់កម្ពុជា ជាពិសេសជួយស្វាយចន្ទីរបស់កសិករកុំឱ្យធ្លាក់ចុះ ដើម្បីស្រោចស្រង់ជីវភាពគ្រួសាររបស់ពួកគាត»។ លោក ស៊ុយ កុកធាន បន្ថែមបែបនេះ។

សូមជំរាបថា ការប្រមូលផលគ្រាប់ស្វាយចន្ទីនៅរដូវកាលថ្មី ឆ្នាំ ២០២៦ នឹងត្រូវពន្យាពេលដល់ខែមេសា ដោយសារអាកាសធាតុបានធ្វើឱ្យចន្ទីទុំយឺតជាងការរំពឹងទុក។

ទិន្នផលគ្រាប់ស្វាយចន្ទីរបស់កម្ពុជារំពឹងសម្រេចបាន ៨០ ម៉ឺនតោន ដល់ ១ លានតោន នៅក្នុងរដូវប្រមូលផលឆ្នាំ ២០២៦ ដោយសារការកើនឡើង នៃផ្ទៃដីដាំដុះ រួមផ្សំនឹងការអំណោយផលពីអាកាសធាតុ។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកចំណូលបាន ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅ ១ លានតោន កើនឡើង ២៧% ធៀបនឹងឆ្នាំ ២០២៤។ គិតមកដល់ពេលនេះ កម្ពុជាមានផ្ទៃដីដាំដុះស្វាយចន្ទីប្រមាណ ៧៤ ម៉ឺនហិកតា៕