រដ្ឋមន្រ្តីក្រសួងសេដ្ឋកិច្ច ស្នើឲ្យបារាំងជួយទាក់ទាញអ្នកវិនិយោគបារាំង និងអឺរ៉ុបមកវិនិយោគនៅកម្ពុជា

រដ្ឋមន្ត្រីក្រសួងសេដ្ឋកិច្ចកម្ពុជា បានស្នើឲ្យបារាំងបន្តជួយទាក់ទាញក្រុមហ៊ុនបារាំង និងអឺរ៉ុបមកវិនិយោគនៅកម្ពុជាឲ្យបានច្រើនបន្ថែមទៀត ខណៈរាជរដ្ឋាភិបាលកម្ពុជាបានដាក់ចេញ “ឯកសារបង្ហាញផ្លូវ” ដែលជាក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា តាមគន្លងប្រក្រតីភាពថ្មីក្នុងទិសដៅលើកកម្ពស់ចីរភាពកំណើន និងការកសាងភាពរឹងមាំនៃសង្គម-សេដ្ឋកិច្ចកម្ពុជា ។

ការស្នើសុំនេះ ត្រូវបានធ្វើឡើងក្នុងជំនួបរវាងលោក អូន ព័ន្ធមុនីរ័ត្ន ឧបនាយករដ្ឋមន្រ្តី​ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនៅក្នុងជំនួបពិភាក្សាការងារជាមួយលោក Jacques PELLET ឯកអគ្គរដ្ឋទូតបារាំងប្រចាំកម្ពុជា និងជាតំណាងទីភ្នាក់ងារអភិវឌ្ឍន៍បារាំង (AFD) ប្រចាំនៅកម្ពុជានៅរសៀលថ្ងៃទី១៥ ខែធ្នូ ឆ្នាំ ២០២១ នាទីស្ដីការក្រសួងសេដ្ឋកិច្ច និងហិរញ្ញវត្ថុ។

លោកឯកអគ្គរដ្ឋទូត Jacques PELLET បាន លើកឡើងថា ជាការពិតកម្ពុជា និងបារាំងមានទំនាក់ទំនងយូរអង្វែងមកហើយ ពិសេសកិច្ចសហការប្រតិបត្តិការអភិវឌ្ឍន៍ជាមួយ AFD ។ កិច្ចសហប្រតិបត្តិការនេះ គឺបានចូលរួមចំណែកដ៏សំខាន់ក្នុងប្រតិបត្តិការនៃមហិច្ឆតាអភិវឌ្ឍន៍របស់ប្រធាននាធិបតីបារាំង Emmanuel Macron ដែលបានការប្តេជ្ញា សម្រេចគោលដៅក្នុងការបង្កើនហិរញ្ញប្បទានសហប្រតិបត្តិការ ODA របស់ខ្លួនឲ្យបាន០,៥៥% នៃផ.ស.ស នៅឆ្នាំ ២០២២ ដើម្បីចូលរួមអភិវឌ្ឍន៍ខឿនសេដ្ឋកិច្ចរបស់ប្រទេស កំពុងអភិវឌ្ឍន៍រួមមានកម្ពុជាផងដែរ ។ រដ្ឋាភិបាលបារាំងតាមរយៈ AFD សន្យាថា នឹងបង្កើនទំហំឥណទានសម្បទាន និងខិតខំជួយគៀរគហិរញ្ញប្បទានឥតសំណងពីសហគម អឺរ៉ុបនិងពីប្រភពផ្សេងទៀតសម្រាប់រួមចំណែកអភិវឌ្ឍនិងស្តារសេដ្ឋកិច្ចកម្ពុជាបន្ទាប់ពីវិបត្តិកូវីដ-១៩ ស្របតាមគោលនយោបាយនិងយុទ្ធសាស្ត្រអភិវឌ្ឍន៍ជាតិរបស់កម្ពុជា ។

លោកឧបនាយករដ្ឋមន្ត្រីបានជម្រាបជូនភ្ញៀវថា កម្ពុជានឹងដាក់ចេញនូវ “យុទ្ធសាស្ដ្រស្ដីពីការរស់នៅតាមបែបគន្លងប្រក្រតីភាពថ្មីក្នុងបរិបទនៃជំងឺកូវីដ-១៩” ដែលជាឯកសារ បង្ហាញផ្លូវដើម្បីកម្ពុជាចាកចេញពីវិបត្តិនៃជម្ងឺកូវីដ-១៩ ឆ្ពោះទៅរកមាគ៌ានៃកំណើន និង ការអភិវឌ្ឍសង្គម-សេដ្ឋកិច្ច ឡើងវិញប្រកបដោយសុវត្ថិភាព ចីរភាព និង បរិយាប័ន្ន ។ “ឯកសារបង្ហាញផ្លូវ” គឺជាក្របខណ្ឌយុទ្ធសាស្រ្តនិងកម្មវិធីស្តារនិងជំរុញកំណើនសេដ្ឋកិច្ចកម្ពុជាតាមគន្លងប្រក្រតីភាពថ្មីក្នុងទិសដៅលើកកម្ពស់ចីរភាព កំណើននិងការកសាង ភាពរាំងមាំនៃសង្គម-សេដ្ឋកិច្ចកម្ពុជា ។

គួររំលឹកជូនថា នៅក្នុងឆ្នាំ ២០២១នេះបារាំង-កម្ពុជាបានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួនពីរមានទឹកប្រាក់សរុបប្រមាណ២០,៣០លានអឺរ៉ូ ដើម្បីគាំទ្រដល់ការអភិវឌ្ឍវិស័យកសិកម្ម ទឹកស្អាត និងការប្រយុទ្ធប្រឆាំងនឹងបម្រែបម្រួលអាកាសធាតុ ៕

អត្ថបទ ៖ ណារី