សេដ្ឋកិច្ច

យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ ២០២៥-២០៣០ ផ្ដោតលើអាទិភាពចម្បងៗ ៦

បានផុស

៧ ខែ មុន

នៅ

ថ្ងៃព្រហស្បតិ៍ ១៨ ធ្នូ ២០២៥

ដោយ

បើតាមលោកស្រី ជា សិរី ទេសាភិបាលធនាគារជាតិនៃកម្ពុជា បានគូសបញ្ជាក់ឱ្យដឹងថា យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ ត្រូវបានដាក់ចេញដោយផ្ដោតលើអាទិភាពចម្បងៗចំនួន ៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ យុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ លោកស្រី ជា សិរី បានលើកឡើងថា ស្ថានភាពជុំវិញពិភពលោកមានការផ្លាស់ប្ដូរលឿន ជាមួយនឹងភាពមិនប្រាកដប្រជាខ្ពស់។ បច្ចេកវិទ្យាហិរញ្ញវត្ថុបានផ្តល់នូវកាលានុវត្តភាពដែលមិនធ្លាប់មានពីមុនមក ប៉ុន្តែក៏នាំមកនូវភាពងាយរងគ្រោះថ្មីៗផងដែរ។

វិបត្តិជំងឺកូវីដ-១៩ និងផលប៉ះពាល់ដែលបន្សល់ទុក បានធ្វើឱ្យប៉ះពាល់ដល់ខ្សែច្រវាក់ផ្គត់ផ្គង់សកល កំណើនសេដ្ឋកិច្ច និងនាំឱ្យប្រជាពលរដ្ឋមួយចំនួនធ្លាក់ទៅក្នុងភាពក្រីក្រ។ ការកើនឡើងនៃភាពតានតឹងភូមិសាស្ត្រនយោបាយ សង្គ្រាមពាណិជ្ជកម្ម និងជម្លោះប្រដាប់អាវុធបានបង្កផលរំខានបន្ថែមដល់ខ្សែច្រវាក់ផ្គត់ផ្គង់ ពាណិជ្ជកម្មអន្តរជាតិ ទំនុកចិត្តវិនិយោគិន និងធ្វើឱ្យស្ថានភាពសេដ្ឋកិច្ចពិភពលោក កាន់តែមានភាពមិនច្បាស់លាស់។

លោកស្រី បានបន្តថា ជាមួយនឹងចក្ខុវិស័យក្នុងការប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់ ប្រព័ន្ធហិរញ្ញវត្ថុត្រូវតែមានសមត្ថភាព និងថាមវន្តដើម្បីគាំទ្រសកម្មភាពសេដ្ឋកិច្ច ដែលមានលក្ខណៈប្រទាក់ក្រឡាជាងមុន ការធ្វើសមាហរណកម្ម កាន់តែស៊ីជម្រៅ និងផលិតភាពខ្ពស់ជាងមុនផងដែរ។

ក្នុងទិសដៅនេះ យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ នឹងឆ្លើយតបទៅនឹងការវិវត្តទាំងនេះ តាមរយៈការផ្តល់ជាផែនទីមគ្គុទេសក៍ ដែលមានចក្ខុវិស័យវែងឆ្ងាយ និងគ្រប់ជ្រុងជ្រោយ។ យុទ្ធសាស្ត្រនេះ ផ្ដោតលើអាទិភាពចម្បងៗចំនួន ៦ រួមមាន ១-ការពង្រឹងស្ថិរភាពហិរញ្ញវត្ថុ ដើម្បីការពារទំនុកចិត្ត និងភាពធន់, ២-ការជំរុញបរិយាបន្នហិរញ្ញវត្ថុ ជាពិសេស សម្រាប់ស្ត្រី យុវជន សហគ្រាសធុនមីក្រូ តូច និងមធ្យម និងសហគមជនបទ។

៣-ការអភិវឌ្ឍទីផ្សារហិរញ្ញវត្ថុឱ្យកាន់តែស៊ីជម្រៅ សំដៅធ្វើពិពិធកម្មប្រភពទុនរយៈពេលវែង, ៤-ការលើកកម្ពស់បរិវត្តកម្មឌីជីថល និងសន្តិសុខសាយប័រ ដើម្បីធានានូវសុវត្ថិភាព និងភាពទុកចិត្តនៃនវានុវត្តន៍បច្ចេកវិទ្យា,៥ -ការគាំទ្រនិងលើកកម្ពស់ហិរញ្ញវត្ថុប្រកបដោយចីរភាព ដែលគាំទ្រដល់បរិស្ថាន និងការប្រែប្រួលអាកាសធាតុ និង ៦-ការពង្រឹងអភិបាលកិច្ច និងកិច្ចសហការរវាងស្ថាប័នទាំងអស់នៅក្នុងវិស័យហិរញ្ញវត្ថុ។

លោកស្រី ជា សិរី បានបន្ថែមថា វិស័យហិរញ្ញវត្ថុដែលរឹងមាំ មិនមែនជាគោលដៅចុងក្រោយនោះទេ ប៉ុន្តែជាមូលដ្ឋានគ្រឹះសម្រាប់ការអភិវឌ្ឍសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋកម្ពុជាទាំងអស់។ លោកស្រីសង្ឃឹមយ៉ាងមុតមាំថា ការអនុវត្តប្រកបដោយប្រសិទ្ធភាពនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុនេះ នឹងបន្តពង្រឹងការផ្តល់កាលានុវត្តភាព និងលើកកម្ពស់សហគ្រិនភាព ដែលជំរុញសកម្មភាពអាជីវកម្ម បង្កើនការសន្សំឋនិងវិនិយោគសម្រាប់អនាគត និងគាំទ្រដល់កំណើនប្រកបដោយចីរភាពសម្រាប់មនុស្សជំនាន់ក្រោយ។

ការដាក់ឱ្យប្រើប្រាស់យុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០២៣០ នាថ្ងៃនេះ ពិតជាបញ្ជាក់ពីការប្តេជ្ញាចិត្តរួមគ្នារបស់គ្រប់ភាគីពាក់ព័ន្ធនៅក្នុងវិស័យហិរញ្ញវត្ថុទាំងមូល ក្នុងការបន្តអភិវឌ្ឍប្រព័ន្ធហិរញ្ញវត្ថុមួយដែលមានភាពធន់ ប្រកួតប្រជែង បរិយាបន្ន និងមានចក្ខុវិស័យវែងឆ្ងាយ៕