តំណាងវិស័យឯកជន​ជំរុញឱ្យវិនិយោគិនកាណាដាចាប់យកឱកាសពីកិច្ចព្រមព្រៀងពាណិជ្ជកម្មសេរីដែលកម្ពុជាកំពុងអនុវត្តន៍

ប្រធានសភាពាណិជ្ជកម្មកម្ពុជាអ្នកឧកញ៉ា គិត ម៉េង ជំរុញលើកទឹកចិត្តដល់ ធុរជនកាណាដា ចាប់យកឱកាសវិនិយោគនៅកម្ពុជា ដែលមានទីផ្សារទូលំទូលាយនៅទូទាំងពិភពលោក រួមមាន កាណាដា អាស៊ាន អាសិប ចិន ជប៉ុន កូរ៉េ អេមីរ៉ាត់អារ៉ាប់រួម និងទីផ្សារផ្សេងៗទៀត។

ការលើកឡើងរបស់អ្នកឧកញ៉ា គិត ម៉េងក្នុងជំនួបជាមួយលោក​ លោក ម៉ូ ខេវិន គណៈប្រតិភូធុរកិច្ចការិយាល័យតំណាងសភាពាណិជ្ជកម្មកម្ពុជានៅទីក្រុងម៉ុងរ៉េអាស់ ខេត្តកេប៊ិច ប្រទេសកាណាដាដែលបានដឹកនាំគណៈប្រតិភូកាលពីថ្ងៃព្រហស្បត្តិ៍ ​ថ្ងៃទី៣០ នៅការិយាល័យ​សភាពាណិជ្ជក​ម្មកម្ពុជា។

អ្នកឧកញ៉ា គិត ម៉េង បានស្វាគមន៍យ៉ាងកក់ក្តៅចំពោះការបំពេញបេសកកម្មធុរកិច្ចមកកាន់ព្រះរាជាណាចក្រកម្ពុជា ដោយគណៈប្រតិភូធុរកិច្ចនៃការិយាល័យតំណាងសភាពាណិជ្ជកម្មកម្ពុជានៅទីក្រុងម៉ុងរ៉េអាល់ និងបានគូបញ្ជាក់អំពីកាតព្វកិច្ចកូនខ្មែរទាំងអស់ ទាំងក្នុងនិងក្រៅប្រទេស ដែលត្រូវចូលរួមកសាងសេដ្ឋកិច្ចជាតិ ជាពិសេស តាមរយៈការជំរុញពាណិជ្ជកម្មនិងវិនិយោគ។

អ្នកឧកញ្ញ៉ាបានថ្លែងថា៖«​កាណាដា គឺជាដៃគូពាណិជ្ជកម្មនិងវិនិយោគដ៏ធំបំផុតមួយរបស់កម្ពុជា ក្នុងនោះទំហំពាណិជ្ជកម្មទ្វេភាគីក្នុងឆ្នាំ២០២៣ មានប្រមាណ ជាង ១.៥ ពាន់លានដុល្លារ។ ធុរជនកាណាដា គួរចាប់យកឱកាសវិនិយោគនៅកម្ពុជា ដែលមានទីផ្សារទូលំទូលាយនៅទូទាំងពិភពលោក រួមមាន កាណាដា អាស៊ាន អាសិប ចិន ជប៉ុន កូរ៉េ អេមីរ៉ាត់អារ៉ាប់រួម និងទីផ្សារផ្សេងៗទៀត»។

សភាពាណិជ្ជកម្មកម្ពុជាបានបើកការិយាល័យតំណាងក្រៅប្រទេសរបស់ខ្លួនជាលើកដំបូងនៅទីក្រុងតូរ៉ង់តូ កាលពីខែឧសភា ឆ្នាំ២០២២កន្លងទៅនេះ សំដៅដើម្បីបម្រើជាទីកន្លែងផ្តល់នូវព័ត៌មាន និងទាក់ទាញវិនិយោគពីបរទេស និងជំរុញពាណិជ្ជកម្មមកកម្ពុជា៕