ព័ត៌មានអន្ដរជាតិ

តម្លៃប្រេងថយចុះវិញ ដោយសារកិច្ចពិភាក្សាបញ្ចប់ជម្លោះនៅហ្គាហ្សា

បានផុស

២ years មុន

នៅ

ថ្ងៃសៅរ៍ ៦ កក្កដា ២០២៤

ដោយ

តម្លៃប្រេងបានធ្លាក់ចុះទាបវិញកាលពីថ្ងៃសុក្រ ដែលជាថ្ងៃបិទបញ្ចប់ការជួញដូរប្រចាំសប្ដាហ៍ ដោយសារលទ្ធភាពនៃកិច្ចព្រមព្រៀងបទឈប់បាញ់នៅហ្គាហ្សា បានជួញបន្ថូរបន្ថយពីក្ដីបារម្ភពាក់ព័ន្ធនឹងការរំខានផ្នែកផ្គត់ផ្គង់ ទោះមានតម្រូវការប្រេងនារដូវក្តៅខ្លាំងនៅអាមេរិក និងការរំខានដោយព្យុះសង្ឃរានៅឈូងសមុទ្រម៉ិកស៊ិកក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនាគតប្រេងឆៅរបស់ Brent បានធ្លាក់ចុះ ៨៩ សេន ឬ ១,០២ ភាគរយ ដោយជួញដូរនៅត្រឹម ៨៦,៥៤ ដុល្លារ/បារ៉ែល បន្ទាប់ពីឡើងដល់ជាង ៨៧ ដុល្លារ ដែលជាកម្រិតខ្ពស់បំផុតរាប់តាំងពីខែមេសា កាលពីថ្ងៃពុធ និងថ្ងៃព្រហស្បតិ៍។

ចំណែកឯប្រេងឆៅនាពេលអនាគតរបស់អាមេរិក West Texas Intermediate (WTI) វិញ បានជួញដូរនៅតម្លៃ ៨៣,១៦ ដុល្លារ/បារ៉ែល ដោយធ្លាក់ចុះ ៧២ សេន ឬ ០,៩ ភាគរយ។

អ្នកជំនាញទាញភ្ជាប់ការធ្លាក់ថ្លៃប្រេងនេះ ទៅនឹងលទ្ធភាពកិច្ចព្រមព្រៀងបទឈប់បាញ់នៃជម្លោះអ៊ីស្រាអែល-ហាម៉ាស់។ ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃសុក្រថា ប្រមុខនៃទីភ្នាក់ងារស៊ើបការសង្ងាត់អ៊ីស្រាអែល Mossad បានវិលត្រឡប់មកពីទីក្រុង Doha នៃប្រទេសកាតា វិញ ក្រោយចូលរួមកិច្ចប្រជុំដំបូងជាមួយអ្នកសម្រុះសម្រួល ដែលព្យាយាមចង់ឱ្យសម្រេចបាននូវបទឈប់បាញ់នៅហ្គាហ្សា ក៏ដូចជាកិច្ចព្រមព្រៀងដោះលែងចំណាប់ខ្មាំង។ ការចរចានឹងបន្តនៅសប្តាហ៍ក្រោយ។

ការធ្លាក់ចុះនេះផងដែរ កើតឡើងក្រោយប្រេងសកលទាំង២ឡើងថ្លៃខ្ពស់ ដោយសារទិន្នន័យពីរដ្ឋាភិបាលអាមេរិក ដែលបង្ហាញថា ប្រេងប្រមាណជាង ១២ លានបារ៉ែល ត្រូវបានកាត់ចេញពីស្ដុក ដែលចំនួននេះច្រើនលើសលុបហួសពីការរំពឹងទុក។

ក្រៅពីនេះ ក៏មានការព្រួយបារម្ភស្ដីពីការរំខានការផ្គត់ផ្គង់ផ្សេងៗជុំវិញការបក់បោកនៃព្យុះសង្ឃរានៅឈូងសមុទ្រម៉ិកស៊ិក។ កន្លែងប្រេងសំខាន់ៗរបស់ម៉ិកស៊ិក មិនរំពឹងថានឹងរងផលប៉ះពាល់ដោយព្យុះនោះទេ ប៉ុន្តែគម្រោងប្រេងនៅក្នុងដែនទឹករបស់សហរដ្ឋអាមេរិក អាចនឹងមានការរំខាន ប្រសិនបើព្យុះសង្ឃរានៅតែបន្តបក់បោកតាមគន្លងដែលគេរំពឹងទុក៕

Related Topics: