ព័ត៌មានអន្ដរជាតិ

រដ្ឋមន្រ្តីក្រសួងហិរញ្ញវត្ថុថៃ៖ សេដ្ឋកិច្ចប្រទេសស្ថិតក្នុងស្ថានភាពមិនប្រាកដប្រជា ដោយកំណើនខ្សោយ

បានផុស

៩ ខែ មុន

នៅ

ថ្ងៃពុធ ១០ កក្កដា ២០២៤

ដោយ

រដ្ឋមន្ត្រីហិរញ្ញវត្ថុថៃ លោក Pichai Chunhavajira បាននិយាយនៅថ្ងៃពុធនេះថា សេដ្ឋកិច្ចរបស់ប្រទេសថៃ ស្ថិតនៅក្នុងស្ថានភាពមិនប្រាកដប្រជាអស់រយៈពេលជាយូរមកហើយ ដោយសារតែកំណើនយឺត ជាមួយនឹងបញ្ហារចនាសម្ព័ន្ធផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរ៉យទ័រ បានស្រង់សម្ដីលោក Pichai ដែលថ្លែងក្នុងសិក្ខាសាលាធុរកិច្ចមួយថា រដ្ឋាភិបាលថៃ កំពុងធ្វើការដើម្បីលើកកំណើនសេដ្ឋកិច្ចឱ្យបាន ៣ ភាគរយនៅឆ្នាំនេះ ខណៈការព្យាករណ៍បច្ចុប្បន្នបង្ហាញថា សេដ្ឋកិច្ចថៃនឹងកើនឡើងត្រឹមតែប្រហែល ២,៥ ភាគរយ ប៉ុណ្ណោះ។

រដ្ឋមន្រ្តីដដែលបានបន្ថែមថា វិស័យទេសចរណ៍នឹងជួយជំរុញសេដ្ឋកិច្ច ដោយភ្ញៀវទេសចរបរទេសយ៉ាងហោចណាស់ ៣៥ លាននាក់ រំពឹងថានឹងមកលេងថៃនៅឆ្នាំ ២០២៤ នេះ។ ក្នុងឆ្នាំ ២០១៩ ពោលគឺមុនវិបត្តិជំងឺកូវីដ១៩ ថៃទទួលភ្ញៀវទេសចរប្រមាណ ៤០ លាននាក់។

លោក Pichai ក៏បានលើកឡើងផងដែរថា បំណុលគ្រួសារបច្ចុប្បន្នឈរនៅជាង ៩០ ភាគរយ ធៀបនឹងផលិតផលក្នុងស្រុកសរុប (GDP) ដែលបញ្ហាត្រូវការដំណោះស្រាយជាបន្ទាន់ ខណៈមានបញ្ហាលើប្រាក់កម្ចី ដែលជាផ្នែកមួយធ្វើឱ្យសេដ្ឋកិច្ចថៃកើនយឺតយ៉ាវ។

កំណើនសេដ្ឋកិច្ចរបស់ថៃ កើនបានត្រឹមតែ ១,៩ ភាគរយប៉ុណ្ណោះកាលពីឆ្នាំមុន ដោយខ្សោយជាងប្រទេសជាច្រើនក្នុងតំបន់ផ្សេងទៀត ដោយសារតែការនាំចេញខ្សោយ រួមផ្សំជាមួយនឹងបំណុលគ្រួសារ និងថ្លៃកម្ចីខ្ពស់៕

Related Topics:ប្រទេសថៃ