ព័ត៌មានអន្ដរជាតិ

អូស្ត្រាលីអនុម័តគម្រោងនាំចេញថាមពលពន្លឺព្រះអាទិត្យតម្លៃ ១៣,៥ ប៊ីលានដុល្លារ ទៅសិង្ហបុរី

បានផុស

២ years មុន

នៅ

ថ្ងៃពុធ ២១ សីហា ២០២៤

ដោយ

អូស្ត្រាលីបានឱ្យដឹងនៅថ្ងៃពុធនេះថា ខ្លួនបានអនុម័តលើគម្រោងនាំចេញថាមពលព្រះអាទិត្យតម្លៃ ២០ ប៊ីលានដុល្លារអូស្ត្រាលី (១៣,៥ ប៊ីលានដុល្លារ) ពីស្ថានីយថាមពលពន្លឺព្រះអាទិត្យដ៏ធំនៅភាគខាងជើងប្រទេស ទៅកាន់សិង្ហបុរីតាមរយៈខ្សែកាបក្រោមបាតសមុទ្រប្រវែងជាង ៤ ០០០ គីឡូម៉ែត្រ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងបរិស្ថានអូស្រ្តាលី លោកស្រី Tanya Plibersek បានថ្លែងថា គម្រោងតភ្ជាប់ថាមពលអូស្ត្រាលី-អាស៊ី ដ៏ធំរបស់ក្រុមហ៊ុន SunCable នឹងជួយបំពេញតម្រូវការដែលកំពុងកើនឡើងសម្រាប់ថាមពលកកើតឡើងវិញនៅក្នុង និងក្រៅប្រទេស។

លោកស្រី Plibersek បាននិយាយថា ការអនុម័តលើគម្រោងដដែលធ្វើឡើងដោយស្របតាមលក្ខខណ្ឌដ៏តឹងរ៉ឹងដើម្បីការពារធម្មជាតិ។ ក្នុងរយៈពេល២ដំណាក់កាលនៃការអភិវឌ្ឍន៍ គម្រោងនេះមានគោលបំណងផ្តល់ថាមពលអគ្គិសនីបៃតងរហូតដល់ ៦ ជីហ្គាវ៉ាត់ ដល់អតិថិជនឧស្សាហកម្មខ្នាតធំ នៅទីក្រុង Darwin នៃដែនដីភាគខាងជើងរបស់ស្ត្រាលី និងនៅក្នុងប្រទេសសិង្ហបុរី។

បើតាមក្រុមហ៊ុន SunCable គម្រោងនេះគ្រោងនឹងចាប់ផ្ដើមផ្គត់ផ្គង់ថាមពលនៅដើមទសវត្សរ៍ឆ្នាំ ២០៣០។ ក្រុមហ៊ុនបន្តថា ខ្លួនកំពុងពិភាក្សាជាមួយនិយតករថាមពលរបស់សិង្ហបុរីលើការអនុម័តតាមលក្ខខណ្ឌសម្រាប់ខ្សែកាបរបស់គម្រោង និងជាមួយរដ្ឋាភិបាលឥណ្ឌូណេស៊ីលើការបង្កប់ខ្សែកាបក្នុងដែនទឹករបស់ប្រទេសនេះ។

គួរគូសបញ្ជាក់ថា គម្រោងដដែលទទួលបានភ្លើងខៀវពីរដ្ឋាភិបាលដែនដីភាគខាងជើងរបស់អូស្រ្តាលី និងក្រុមឃ្លាំមើលបរិស្ថានប្រចាំដែនដីដដែលកាលពីខែមុន៕