ព័ត៌មានអន្ដរជាតិ

តម្លៃអង្ករនាំចេញថៃ ធ្លាក់ចុះទាបបំផុតក្នុងរយៈពេល ១៤ ខែ

បានផុស

២ years មុន

នៅ

ថ្ងៃសុក្រ ២៧ កញ្ញា ២០២៤

ដោយ

តម្លៃនាំចេញអង្កររបស់ប្រទេសថៃ បានធ្លាក់ចុះដល់កម្រិតទាបក្នុងរយៈពេល ១៤ ខែ នាសប្តាហ៍នេះ ដោយសារតែសម្ពាធនៃតម្រូវការខ្សោយ និងការប្រកួតប្រជែងពីប្រទេសនាំចេញផ្សេងៗទៀតដែលលក់អង្ករក្នុងតម្លៃថោកជាងថៃ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្ករថៃបាក់៥ភាគរយ បានលក់នៅតម្លៃ ៥៦០ ដុល្លារ/តោន ដែលជាកម្រិតទាបបំផុតរាប់តាំងពីថ្ងៃទី ២០ ខែកក្កដា ឆ្នាំ ២០២៣។ តម្លៃដដែលនេះ ធ្លាក់ចុះពីការជួញដូរ ៥៦៥ ដុល្លារ/តោន កាលពីសប្ដាហ៍មុន។

បើតាមរ៉យទ័រ ពាណិជ្ជករនៅទីក្រុងបាងកក បានអះអាងថា មានតម្រូវការមកពីប្រទេសឥណ្ឌូណេស៊ី ប៉ុន្តែអ្នកនាំចូលអង្ករកំពុងទិញអង្ករពីប្រទេសនាំចេញផ្សេងៗទៀតក្នុងតម្លៃទាប ចំពេលដែលការឡើងថ្លៃនៃប្រាក់បាត ក៏កំពុងធ្វើឱ្យប៉ះពាល់ដល់ការនាំចេញអង្កររបស់ប្រទេសផងដែរ ក្នុងបរិបទដែលការប្រកួតប្រជែងនៃតម្លៃកាន់តែខ្លាំង។

រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បាននិយាយថា ផលប៉ះពាល់នៃកំណើនតម្លៃប្រាក់បាតលើការនាំចេញ នឹងកាន់តែបង្ហាញច្បាស់ក្នុងរយៈពេល៣ខែខាងមុខ ជាពិសេសលើទំនិញកសិកម្ម។ បន្ថែមពីនេះ មានការព្រួយបារម្ភថា តម្លៃអង្ករថៃនឹងធ្លាក់ចុះកាន់តែខ្លាំងបន្ថែមទៀត នៅពេលឥណ្ឌាដកការរឹតត្បឹតលើការនាំចេញអង្កររបស់ខ្លួន ដែលការណ៍នេះអាចនឹងកើនឡើងនៅចុងឆ្នាំ។

យោងតាមរ៉យទ័រ នាសប្ដាហ៍នេះ អង្ករឥណ្ឌាបាក់ ៥ ភាគរយ លក់នៅតម្លៃ ៥៣៦ ដុល្លារ/តោន កើនឡើង ២ ដុល្លារ ធៀបនឹងសប្ដាហ៍មុន ខណៈប្រភេទអង្ករដូចគ្នារបស់វៀតណាម លក់នៅតម្លៃ ៥៦៥ ដុល្លារ/តោន ធ្លាក់ចុះពីប្រហែល ៥៨០ ដុល្លារ កាលពីសប្ដាហ៍មុន។ អាជីវករវៀតណាមនិយាយថា តម្លៃអង្ករធ្លាក់ចុះ គឺដោយសារតែការប្រកួតប្រជែងពីប្រទេសនាំចេញ រួមមានទាំងថៃ និងកម្ពុជា៕