ការរៀបចំឥណទានឡើងវិញជូនពលរដ្ឋចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ

លោកស្រី បណ្ឌិត ជា សិរី ទេសាភិបាល ធនាគារជាតិនៃកម្ពុជា បានអះអាងថាការរៀបចំឥណទានឡើងវិញរបស់គ្រឹះស្ថានធនាគារ និងហិរញ្ញវត្ថុជូនប្រជាពលរដ្ឋដែលខ្វះលទ្ធភាពដើម្បីជួយសម្រួលដល់លំហូរសាច់ប្រាក់សម្រាប់ដោះស្រាយជីវភាពប្រចាំថ្ងៃរបស់ប្រជាពលរដ្ឋក៏ដូចជាជួយដល់ផលប្រយោជន៍សម្រាប់សេដ្ឋកិច្ចទាំងមូលផងដែរ។

ថ្លែងនៅក្នុងសន្និសីទសារព័ត៌មានមួយកាលពីល្ងាចថ្ងៃទី០៨តុលា លោកស្រីបានបន្តថាការធ្វើឥណទានឡើងវិញដើម្បីជួយសម្រួលឱ្យប្រជាពលរដ្ឋអាចមានលទ្ធភាពសងត្រឡប់មកធនាគារនិងគ្រឹះស្ថានមីក្រូហិរញ្ញវត្ថុនិងអាចសល់ប្រាក់ខ្លះសម្រាប់ដោះស្រាយជីវភាពប្រចាំដែលជួយដល់សកម្មភាពសេដ្ឋកិច្ចជាតិផងដែរតាមរយៈការទិញម្ហូបអាហារនិងកាហ្វេ គុយទាវនិងភេសជ្ជៈផ្សេងៗខណៈដែលពីមុនគាត់មានថវិកាត្រឹមតែបង់ធនាគារធ្វើឱ្យជីវភាពជួបការលំបាក។

លោកស្រីបានរំលឹកថាជុំវិញការរៀបចំឥណទានឡើងវិញនេះ នៅពេលផ្ទុះឡើងនូវជំងឺកូវីដ-១៩ ធនាគារជាតិនៃកម្ពុជា បានដាក់ចេញនូវវិធានការមួយចំនួន ដោយសារនៅក្នុងពេលនេះសេដ្ឋកិច្ចកម្ពុជា ក៏ដូចជាសេដ្ឋកិច្ចពិភពលោក ទទួលនូវផលប៉ះពាល់ ជាច្រើន ជាពិសេសខ្សែច្រវាក់ផលិតកម្មត្រូវបានរអាក់រអួល ឬបញ្ឈប់ ការដឹកជញ្ជូនទាំងក្នុងនិងក្រៅប្រទេសក៏ជួបបញ្ហា និងការប៉ះ ពាល់ទាំងវិស័យទេសចរ បានធ្វើឱ្យភោជនីយដ្ឋាន និងសណ្ឋាគារមួយចំនួនត្រូវបិតទ្វាជាដើម។

លោកស្រីបានបន្តទៀតថា៖«បញ្ហាប្រឈមទាំងអស់នេះ បានធ្វើឱ្យប្រជាជនមួយចំនួនបាត់បង់ការងារ និងប្រាក់ ចំណូលជាដើម, ចំពោះប្រជាជនដែលបានខ្ចីលុយពីគ្រឹះស្ថានហិរញ្ញវត្ថុ ពួកគាត់បានប្រឈម និងឧបសគ្គ នៃការសងត្រឡប់ទៅគ្រឹះ ស្ថានហិរញ្ញវត្ថុវិញ»។

លោក រ័ត្ន សោភ័ណ ប្រធានសមាគមនធនាគារនៅកម្ពុជាបានមានប្រសាសន៍ថាការរៀបចំឥណទានឡើងវិញនេះមានច្រើនទម្រង់ដូចជាពង្រីកពេលវេលាការបង់ប្រាក់ មិនពង្រីកពេលវេលាដោយរក្សាឆ្នាំនៅដដែលសុំបង់តិចហើយឆ្នាំទី២ឆ្នាំទី៣បង់ច្រើន។ព្រោះអតិថិជនខ្លះគាត់មិនចង់ពង្រីកទេគ្រាន់តែសុំពន្យាពេលបណ្តោះអាសន្ននិងអាចស្នើសុំបង់តែការប្រាក់ហើយការបង់ផ្សេងៗទៀតរង់ចាំបង់ពេលក្រោយ។

លោកបានបន្តថាគិតត្រឹមបំណាច់ខែសីហាឆ្នាំ២០២៤នេះ ធនាគារបានផ្តល់ឥណទានឡើងវិញមានទំហំទឹកប្រាក់ជាង៤ពាន់លានដុល្លារដែលមានអតិថិជន២៨៧០០០នាក់ ។

លោកស្រី ឌិត នីតា ប្រធានក្រុមប្រឹក្សាភិបាលសមាគមមីក្រូហិរញវត្ថុកម្ពុជាឱ្យដឹងដែរថាការរៀបចំឥណទានឡើងវិញមានការកើនឡើងជាបន្តបន្ទាប់ហើយសង្ឃឹមថានៅខែ៩នេះនឹងបន្តកើនឡើងបន្ថែមទៀតបន្ទាប់ពីធនាគារជាតិបានចេញប្រកាសថាមិនចាំបាច់ធ្វើសំវិធានធន(បង្គសាច់ប្រាក់ទុក)ទៀតដែលធ្វើឱ្យធនាគារនិងមីក្រូហិរញ្ញវត្ថុមានសាច់ប្រាក់កាន់តែច្រើរៀបចំឥណទាន។

ចំណែកការិយាល័យឥណទានកម្ពុជា ហៅកាត់ថា CBC បានឱ្យដឹងថា រយៈពេល៨ខែដើមឆ្នាំ២០២៤ ឥណទានដែលត្រូវរៀបចំឡើងវិញមានប្រហែល១,៤ពាន់លានដុល្លារអាមេរិក កើនឡើង១៦,៦ភាគរយ បើធៀបនឹងរយៈពេលមួយឆ្នាំពេញនៃឆ្នាំ២០២៣ ដែលត្រូវកត់ត្រាប្រហែល១,២ពាន់លានដុល្លារ។

បើតាមការបញ្ជាក់ពីលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានឱ្យដឹងថា ក្នុងខែកញ្ញា បន្ទាប់ពីប្រកាសណែនាំរបស់ធនាគារជាតិនៃកម្ពុជា ធនាគាររបស់ខ្លួនបានសម្រួលការការរៀបចំឥណទានឡើងវិញដល់អតិថិជន គិតជាទឹកប្រាក់សរុបជាង២០លានដុល្លារ។

គួរបញ្ជាក់ថា ថ្មីៗនេះ ធនាគារជាតិនៃកម្ពុជា ចេញសារាចរណែនាំដល់គ្រឹះស្ថានធនាគារ និងហិរញ្ញវត្ថុ ឱ្យបន្តរៀបចំ ឥណទានឡើងវិញ ដើម្បីជួយសម្រាលបន្ទុកចំណាយប្រចាំគ្រារបស់អតិថិជន ក្នុងការបំពេញកាតព្វកិច្ចសងត្រឡប់ឥណទាន ដោយ វិធានការអនុគ្រោះនេះនឹងបន្តរហូតដល់ ខែធ្នូ ឆ្នាំ ២០២៥៕

អត្ថបទ៖សំអឿន