ព័ត៌មានអន្ដរជាតិ

ឥណ្ឌូណេស៊ីនឹងអាចកើបចំណូលជាង ៥០ ប៊ីលានដុល្លារ ពីការចិញ្ចឹមបង្កងប៉ាក

បានផុស

២ years មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

ក្រសួងកិច្ចការសមុទ្រ និងនេសាទរបស់ឥណ្ឌូណេស៊ី បានព្យាករទុកថា ការចិញ្ចឹមបង្កងប៉ាករបស់ឥណ្ឌូណេស៊ីនឹងមានសក្តានុពលសេដ្ឋកិច្ចរហូតដល់ ៥៣ ប៊ីលានដុល្លារ គិតនៅត្រឹមឆ្នាំ ២០៣០។ នេះបើតាមការចុះផ្សាយរបស់កាសែត Antara កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកវារីវប្បកម្មរបស់ក្រសួង លោក Tb Haeru Rahayu បាននិយាយកាលពីថ្ងៃពុធថា បង្កងប៉ាករបស់ឥណ្ឌូណេស៊ីមានសក្តានុពលមិនធម្មតា បើប្រៀបធៀបទៅនឹងប្រទេសដទៃទៀត។ បង្កងប៉ាកគឺជាទំនិញសំខាន់មួយក្នុងចំណោមទំនិញសំខាន់ទាំង៥របស់ប្រទេស ដែលមានក្នុងគម្រោងគំរូកសិកម្មប្រកបដោយនិរន្តរភាព។

លោកបានបន្តថា កាលពីឆ្នាំមុន ឥណ្ឌូណេស៊ីបានទិន្នផលត្រឹមតែ ៤៣៣ តោនប៉ុណ្ណោះ គិតជាទឹកប្រាក់ប្រមាណ ១១,៤៥ លានដុល្លារ ។ ជាមួយគ្នានោះ លោកបានកត់សម្គាល់ថា ប្រទេសឥណ្ឌូណេស៊ី នៅតែផ្តោតលើការចិញ្ចឹមពូជបង្កងធម្មតា ទោះបីជាបង្កងប៉ាកមានតម្លៃខ្ពស់ជាងក៏ដោយ។

យ៉ាងណាមិញ មន្រ្តីដដែលបន្ថែមថា នៅឆ្នាំក្រោយ ឥណ្ឌូណេស៊ីអាចកើបចំណូលបានប្រមាណ ២៦,៨២ លានដុល្លារ គិតតែពីកូនបង្កងប៉ាកមួយមុខប៉ុណ្ណោះ។ លោកបានបង្ហាញសុទិដ្ឋិនិយមថា ឥណ្ឌូណេស៊ីនឹងក្លាយជាប្រទេសនាំមុខគេលើខ្សែសង្វាក់ផ្គត់ផ្គង់សកលសម្រាប់មុខទំនិញបង្កងប៉ាក ដោយសារតែគំរូនៃការចិញ្ចឹមវានៅមជ្ឈមណ្ឌលវារីវប្បកម្មសមុទ្រ នៅទីក្រុងBatam ៕