ផលិតកម្មសត្វនៅកម្ពុជា មានលទ្ធភាពផ្គត់ផ្គង់តម្រូវការក្នុងស្រុក និងនាំចេញ

លោក អុឹម​ សុីថុល​ រដ្ឋលេខាធិការប្រចាំការក្រសួងកសិកម្ម​ រុក្ខាប្រមាញ់​ និងនេសាទ​ បានអះអាងថា ការងារផលិតកម្មសត្វ មានការរីកចម្រើនគួរឱ្យកត់សម្គាល់ ដែលអាចផ្គត់ផ្គង់តម្រូវការក្នុងស្រុក និងការនាំចេញ តែអនុវិស័យនេះក៏មានបញ្ហា​ប្រឈមមួយចំនួនដែលបង្កឡើងដោយការប្រែប្រួលអាកាសធាតុ គ្រោះធម្មជាតិ និងការផ្ទុះឡើងនូវជំងឺសត្វផ្សេងៗ។

លោក អុឹម​ សុីថុល​ បានលើកឡើងនៅក្នុងពិធីបេីកកិច្ចប្រជុំបូកសរុបការងារសុខភាពសត្វ​ និងផលិតកម្មសត្វប្រចាំឆ្នាំ​២០២៤​ និងទិសដៅអនុវត្តឆ្នាំ២០២៥​ ​នៅថ្ងៃទី ១៧ ខែធ្នូ ឆ្នាំ ២០២៤ ដែលមានការចូលរួមពីថ្នាក់ដឹកនាំ​ និងមន្រ្តីក្រោមឱវាទចំនួន​ ១០០នាក់ នៅអគ្គនាយកដ្ឋានសុខភាពសត្វ​ និងផលិតកម្មសត្វ។

លោករដ្ឋលេខាធិការ បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានសុខភាពសត្វ និងផលិតកម្មសត្វ ដែលបានខិតខំបំពេញតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងសម្រេចបានលទ្ធផលការងារជាច្រើនគួរជាទីមោទនៈក្នុងឆ្នាំ២០២៤។

លោករដ្ឋលេខាធិការ បានលើកឡើងថាការងារសុខភាពសត្វ និងផលិតកម្មសត្វ ជាអនុវិស័យមួយក្នុងចំណោមអនុវិស័យទាំង៤ នៃវិស័យកសិកម្ម រុក្ខាប្រមាញ់ និងនេសាទ ដែលដើរតួនាទីយ៉ាងសំខាន់ក្នុងការធានាសន្តិសុខស្បៀងកម្ពុជា ផ្ដល់ចំណូលដល់សេដ្ឋកិច្ចជាតិ លើកកម្ពស់សេដ្ឋកិច្ចគ្រួសារ និងចូលរួមចំណែកក្នុងការបង្កើតការងារជូនប្រជាពលរដ្ឋតាមជនបទ ទាំងការចិញ្ចឹមលក្ខណៈគ្រួសារ និងលក្ខណៈពាណិជ្ជកម្ម។

លោក អុឹម​ សុីថុលថ្លែងថា៖ «ការងារផលិតកម្មសត្វ មានការរីកចម្រើនគួរឱ្យកត់សម្គាល់ ដែលអាចផ្គត់ផ្គង់តម្រូវការក្នុងស្រុក និងការនាំចេញ តែអនុវិស័យនេះក៏មានបញ្ហាប្រឈមមួយចំនួនដែលបង្កឡើងដោយការប្រែប្រួលអាកាសធាតុ គ្រោះធម្មជាតិ និងការផ្ទុះឡើងនូវជំងឺសត្វផ្សេងៗ ដែលអង្គប្រជុំត្រូវបន្តយកចិត្តទុកដាក់ដល់សុខភាពសាធារណៈ និងការរក្សាបាននូវស្ថិរភាពថ្លៃដែលអាចទទួលយកបានទាំងអ្នកផលិត អាជីវករ និងអ្នកបរិភោគ»៕

អត្ថបទ៖​ ឡេង ដេត