ក្រុមហ៊ុនវិនិយោគថាមពលអគ្គិសនីដើរដោយខ្យល់ អានុភាព ១៥០ មេហ្គាវាត់ សន្យាបញ្ចប់គម្រោងនៅឆ្នាំ ២០២៦

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៅថ្ងៃទី ១៧ ខែមករា ឆ្នាំ ២០២៥ បានទទួលជួបពិភា​ក្សាការងារជាមួយលោក វ៉ាង ជីនអ៊ួយ (Wang Junwei) តំណាងក្រុមហ៊ុន HK OASIS Power Energy Development Co., Ltd. ដែលជាក្រុមហ៊ុនទទួលបានគោលការណ៍វិនិយោគពីរាជរដ្ឋាភិបាលលើគម្រោងសាងសង់ស្ថានីយថាមពលខ្យល់ អានុភាព១៥០មេហ្កាវាត់ នៅខេត្តមណ្ឌលគិរី។

លោក ជា វុទ្ធី អគ្គលេខាធិការវិនិយោគកម្ពុជា បានស្វាគមន៍ និងសម្តែងនូវការអបអរសាទរចំពោះក្រុមហ៊ុន និងលើកឡើងថា​ បច្ចុប្បន្នកម្ពុជាមានកំណើនវិនិយោគក្នុងវិស័យឧស្សាហកម្មយ៉ាងគំហុកដែលធ្វើឱ្យតម្រូវការប្រើប្រាស់​ថា​មព​លអគ្គិសនី មានការកើនឡើងពីមួយថ្ងៃទៅមួយថ្ងៃ ជាពិសេស ថាមពលស្អាត។

លោកអគ្គលេខាធិការបានលើកទឹកចិត្តឱ្យក្រុមហ៊ុនខិតខំអនុវត្តគម្រោងវិនិយោគរបស់ខ្លួន និងបំពេញការងារដូចដែលបានចុះកិច្ចព្រមព្រៀងជាមួយក្រសួងស្ថាប័នសាមី ឱ្យមានប្រសិទ្ធភាពខ្ពស់។

លោក វ៉ាង ជីនអ៊ួយ បានលើកឡើងថា ក្រុមហ៊ុននឹងខិតខំអនុវត្តការងារដោយគ្រោងនឹងបញ្ចប់ការសាងសង់ស្ថានីយថាមពលខ្យល់នៅក្នុងឆ្នាំ២០២៦ ហើយគោលបំណងនៃកិច្ចពិភាក្សានៅថ្ងៃនេះគឺដើម្បីស្វែងយល់ពីនីតិវិធីចុះបញ្ជីវិនិយោគនៅក្រុមប្រឹក្សាអភិវឌ្ឍន៍កម្ពុជា ដើម្បីក្លាយជាគម្រោងមានលក្ខណៈសម្បតិ្តគ្រប់គ្រាន់ និងទទួលបានការលើកទឹកចិត្តតាមច្បាប់ និង​បទ​ប្បញ្ញត្តិជាធរមាន។

កាលពីឆ្នាំ ២០២៤ រាជរដ្ឋាភិបាល បានអនុម័តគម្រោង​វិនិ​យោគថាមពល​ស្អាតចំនួន ២៣ គម្រោង សម្រាប់ឆ្នាំ​២០២៤-២០២៩ ដែលនឹងរួមចំណែកក្នុង​ការបង្កើនចំណែកថាមពលស្អាតរបស់កម្ពុជា។

គម្រោងចំនួន ២៣ រួមមាន គម្រោងថាមពលពន្លឺព្រះអាទិត្យ ១២ គម្រោង គម្រោងថាមពលខ្យល់ ៦ គម្រោង គម្រោងថាមពលពន្លឺព្រះអាទិត្យរួមបញ្ចូលគ្នាជាមួយជីវម៉ាស ១ គម្រោង គម្រោងថាមពលឧស្ម័ន LNG ១គម្រោង គម្រោងវារីអគ្គិសនី ១គម្រោង និងគម្រោងស្ថានីយ៍ស្តុកថាមពល ២គម្រោង។

ក្នុងគម្រោងអភិវឌ្ឍន៍សរុបចំនួន ២៣ខាងលើ មានគម្រោងអភិវឌ្ឍស្ថានីយផលិតអគ្គិសនី ចំនួន ២១គម្រោង ដែលមានអានុភាពសរុប ៣ ៩៥០មេហ្គាវ៉ាត់ និងមានគម្រោងអភិវឌ្ឍស្ថានីយស្តុកថាមពលចំនួន ២គម្រោង ដែលមានអានុភាព ២ ០០០មេហ្គាវ៉ាត់។

គម្រោងវិនិយោគទាំងនេះមានទុនវិនិយោគសរុបចំនួន ៥,៧ ប៊ីលានដុល្លារ ដែលមានទីតាំងស្ថិតនៅក្នុងខេត្តបាត់ដំបង ពោធិ៍សាត់ កំពង់ឆ្នាំង រតនគិរី មណ្ឌលគិរី ព្រះសីហនុ កំពង់ចាម និងខេត្តព្រៃវែង។

គម្រោងទាំងនេះនឹងដោះស្រាយបញ្ហាកង្វះប្រភពអគ្គិសនីដោយសារស្ថានភាពផ្លាស់ប្តូរនៃការអភិវឌ្ឍន៍គម្រោងប្រភពថាមពលដែលបានគ្រោងទុក។

ការអភិវឌ្ឍន៍នៃគម្រោងនេះផ្តល់អត្ថប្រយោជន៍ដល់​ព្រះរាជាណាចក្រកម្ពុជាក្នុងការបំពេញការផ្គត់ផ្គង់អគ្គិសនីឱ្យបានគ្រប់គ្រាន់ និងទាន់ពេលវេលា ទៅនឹងការកើនឡើងនៃតម្រូវកាអគ្គិសនីដល់បណ្តាញជាតិ។

គម្រោងទាំងនេះត្រូវបានរំពឹងថា នឹងផ្តល់ការផ្គត់ផ្គង់អគ្គិសនីដែលអាចទុកចិត្តបាន និងតម្លៃសម​រម្យដល់​អ្នក​ប្រើប្រាស់គ្រប់ប្រភេទនៅគ្រប់ផ្នែកទាំងអស់នៃព្រះរាជាណាចក្រកម្ពុជា។

គម្រោងទាំងនេះនឹងជួយពង្រឹងសន្តិសុខថាមពលនៃប្រព័ន្ធផ្គត់ផ្គង់ថាមពលរបស់ព្រះរាជាណាចក្រកម្ពុជា ដោយកាត់បន្ថយការពឹងផ្អែកលើការនាំចូលថាមពល និងបង្កើនការអភិវឌ្ឍន៍ប្រភព​ថាមពល​ក្នុងស្រុក ដោយបង្កើនការអភិវឌ្ឍន៍ថាមពលស្អាត៕

អត្ថបទ៖ ឡេង ដេត