ព័ត៌មានអន្ដរជាតិ

ក្រុមហ៊ុនចិនជាប្រភពវិនិយោគធំបំផុតសម្រាប់ថៃនៅឆ្នាំ ២០២៤

បានផុស

១ year មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

ក្រុមហ៊ុនចិនបានរួមចំណែកប្រមាណ ៤២ ភាគរយ នៃការវិនិយោគបរទេសជាង ៩៨១ ប៊ីលានបាត នៅក្នុងប្រទេសថៃ គិតត្រឹមថ្ងៃទី ៣១ ខែធ្នូ ឆ្នាំ ២០២៤។ នេះបើតាមការចុះផ្សាយរបស់កាសែត The Nation ដែលស្រង់ព័ត៌មានពីនាយកដ្ឋានអភិវឌ្ឍន៍ពាណិជ្ជកម្មថៃ កាលពីថ្ងៃពុធ។

ក្រុមហ៊ុនចិនបានវិនិយោគលើវិស័យជាច្រើនចាប់ពីអចលនទ្រព្យ សេវាកម្ម ភោជនីយដ្ឋាន និងការលក់រាយ។

គេមើលឃើញថា រដ្ឋាភិបាលថៃនាពេលកន្លងមកបានចេញនូវគោលនយោបាយផ្សេងៗ ដើម្បីជំរុញការវិនិយោគពីបរទេស រួមមានទាំងប្រទេសចិន។

អចលនទ្រព្យគឺជាវិស័យដ៏ធំមួយដែលវិនិយោគិនចាប់អារម្មណ៍ជាងគេ។ អាជ្ញាធរអចលនទ្រព្យឧស្សាហកម្មនៃប្រទេសថៃ (IEAT) បានរាយការណ៍កាលពីថ្ងៃពុធថា ថៃកត់ត្រាពីកំណើននៃការវិនិយោគចំនួន ៤៣,១ ភាគរយ ឆ្នាំលើឆ្នាំ ដល់ ១០៩ ប៊ីលានបាតពីក្រុមហ៊ុនចិន នៅលើអចលនទ្រព្យឧស្សាហកម្មទូទាំងប្រទេសក្នុងឆ្នាំ ២០២៤។

ប្រធានស្ដីទីរបស់ IEAT លោក Sumet Tangprasert បានប៉ាន់ស្មានថា ការកើនឡើងនៃចំនួនក្រុមហ៊ុនចិនដែលវិនិយោគនៅថៃ គឺដោយសារតែបញ្ហាភូមិសាស្ត្រនយោបាយនៅក្នុងប្រទេសចិន ដែលជំរុញឱ្យក្រុមហ៊ុនទាំងនេះបន្ថែមការស្វែងរកមូលដ្ឋានផលិតកម្មដែលមានស្ថេរភាព ខាងក្រៅស្រុកកំណើតរបស់ពួកគេ។

គួរគូសបញ្ជាក់ថា ថៃ និងចិន កន្លងមកបានព្រមព្រៀងគ្នាលើការជំរុញទំនាក់ទំនងសេដ្ឋកិច្ចរវាងទាំង២ ដែលបង្កើតបានជាបរិយាកាសសមស្របសម្រាប់វិនិយោគិនចិន។ ក្នុងនោះ រួមមានទាំងគម្រោង «ប្រទេស២ សួនឧស្សាហកម្មភ្លោះ (Two Countries, Twin Parks» ដែលសំដៅលើគំនិតផ្តួចផ្តើមសហប្រតិបត្តិការរវាងថៃ និងចិន ក្នុងគោលបំណងលើកកម្ពស់ការវិនិយោគ និងពាណិជ្ជកម្មរវាងប្រទេសទាំង២ ស្របតាមគំនិតផ្ដួចផ្ដើមខ្សែក្រវ៉ាត់ ផ្លូវ របស់ប្រធានាធិបតី ស៊ី ជិនពីង៕