រដ្ឋាភិបាល ដាក់ពង្រាយមន្ត្រីកសិកម្មឃុំចំនួន ១០០០ នាក់បន្ថែមទៀត នៅក្នុងឆ្នាំ ២០២៥

មន្ត្រីកសិកម្មឃុំចំនួន ១០០០ នាក់ នឹងត្រូវដាក់ពង្រាយនៅគ្រប់រាជធានី-ខេត្ត ទាំង ២៥ ទូទាំងប្រទេសកម្ពុជា បន្ថែម​លើមន្ដ្រីកសិកម្មឃុំចំនួន ២៥០នាក់ ដែលមានស្រាប់ និង​កំពុងបម្រើប្រជាកសិករ ខណៈរដ្ឋាភិបាលមានផែនការដាក់ពង្រាយមន្ត្រីកសិកម្មឃុំឱ្យបានរហូតដល់ ១៦០០ នាក់ ទូរទាំងប្រទេស។

លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មាន​ប្រសាសន៍ថា មន្រ្តីកសិកម្មឃុំ កំពុងបន្តដើរតួនាទីយ៉ាងសំខាន់ក្នុងការជំរុញផលិតកម្ម បង្កើនគុណភាពផលិតផលកសិកម្ម និងសម្របសម្រួលទីផ្សារកសិផលជូនកសិករ។

លើសពីនេះទៀត មន្រ្តីកសិកម្មឃុំបានចូលរួមផ្សព្វផ្សាយពីកម្មវិធីអភិវឌ្ឍន៍វិស័យកសិកម្ម និងតម្លៃស្រូវសើម ដោយផ្ទាល់ជាមួយកសិករ និងតាមប្រព័ន្ធបណ្ដាញសង្គមយ៉ាងសកម្ម។ 

លោក យ៉ង សាំងកុមារ បញ្ជាក់ថា មន្ត្រីកសិកម្មឃុំ ដើរតួជាអ្នកសម្របសម្រួលរវាងកសិករ និងអ្នកពាក់ព័ន្ធ ការងារផលិតកម្ម និងទីផ្សារ ដែលមន្ត្រីត្រូវមានជំនាញសម្របសម្រួល ខណៈការដាក់ពង្រាយ​ដំបូងត្រូវការបណ្ដុះបណ្ដាលតម្រង់ទិសច្រើន។