ព័ត៌មានអន្ដរជាតិ

ឧស្សាហកម្មចំណីសត្វថៃ បង្កើនការនាំចូលពីអាមេរិកដល់ ២,៨ ប៊ីលានដុល្លារ

បានផុស

១ ខែ មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

ក្នុងជំហានដើម្បីកាត់បន្ថយអតិរេកពាណិជ្ជកម្មជាមួយអាមេរិក និងបញ្ចៀសពន្ធរបស់ ត្រាំ ឧស្សាហកម្មចំណីសត្វថៃបានប្ដេជ្ញាបង្កើនការនាំចូលផលិតផលកសិកម្មពីសហរដ្ឋអាមេរិកដល់ ២,៨ ប៊ីលានដុល្លារ ក្នុងមួយឆ្នាំៗ ជាជាងនាំចូលពីប្រទេសដទៃទៀត។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសមាគមរោងចក្រផលិតចំណីសត្វថៃ លោក Pornsil Patchrintanakul បានប្រាប់ Bloomberg News ក្នុងបទសម្ភាសន៍មួយថា សមាគមកំពុងពិភាក្សាជាមួយរដ្ឋាភិបាលដើម្បីបន្ធូរបន្ថយច្បាប់មួយចំនួន ក្នុងគោលបំណងធ្វើឱ្យទំនិញសម្រាប់ផលិតជាចំណីសត្វរបស់អាមេរិកដូចជាសណ្តែកសៀង និងពោត កាន់តែប្រកួតប្រជែងក្នុងការនាំចូល។

លោក Pornsi បាននិយាយថា ការបន្ទាប ឬលុបចោលពន្ធនាំចូលរបស់ថៃ ២ ភាគរយ លើសណ្តែកសៀងរបស់សហរដ្ឋអាមេរិក ដែលអាចធ្វើទៅបានតាមរយៈកិច្ចព្រមព្រៀងពាណិជ្ជកម្ម អាចលើកទឹកចិត្តឱ្យរោងម៉ាស៊ីនផលិតចំណីសត្វថៃ ទិញបន្ថែមទៀតពីអាមេរិក ជំនួសឱ្យប្រេស៊ីល។ លើសពីនេះ ការផ្អាកជាបណ្តោះអាសន្ននៃពន្ធគយរបស់ WTO លើពោត នឹងផ្តល់អត្ថប្រយោជន៍ដល់ការផ្គត់ផ្គង់របស់សហរដ្ឋអាមេរិក ដោយសារអាមេរិកជាប្រទេសផលិត និងនាំចេញធំបំផុតរបស់ពិភពលោក។

មន្រ្តីសមាគមដដែលបន្ថែមថា ការនាំចូលផលិតផលកសិកម្មរបស់អាមេរិក គឺជាយន្តការរហ័សក្នុងការកាត់បន្ថយឱនភាពពាណិជ្ជកម្មជាមួយអាមេរិក។

តាមការប៉ាន់ស្មានរបស់សមាគម ថៃអាចនាំចូលសណ្ដែកសៀង ពោត សំណល់អេតាណុល សរុបតម្លៃ ២,៨ ប៊ីលានដុល្លារក្នុងមួយឆ្នាំៗ។ បច្ចុប្បន្ន ថៃនាំចូលសណ្តែកសៀងអាមេរិកតម្លៃ ៦៨,២ លានដុល្លារ និងដំណាំផ្សេងៗ ប៉ុន្តែគ្មានពោតអាមេរិកទេ។

ស្ទើរតែទាំងស្រុងនៃសណ្ដែកសៀងនាំចូលរបស់ថៃ មានប្រភពមកពីប្រេស៊ីល ខណៈតិចជាង ១ ភាគរយ មកពីសហរដ្ឋអាមេរិក។ ពោតមានប្រភពក្នុងស្រុក និងមកពីប្រទេសជិតខាងអាស៊ីអាគ្នេយ៍ ខណៈស្រូវសាលី ដែលជាសមាសធាតុចំណីសត្វមួយទៀត មានប្រភពមកពីអឺរ៉ុប។

គួរគូសបញ្ជាក់ថា កាលពីសប្តាហ៍មុន នាយករដ្ឋមន្ត្រីថៃ អ្នកស្រី ផែតងតាន ស៊ីណាវ៉ាត្រា បានបញ្ជាឱ្យភ្នាក់ងាររដ្ឋាភិបាលពាក់ព័ន្ធ សិក្សាវិធានការដើម្បីការពារផលប្រយោជន៍ពាណិជ្ជកម្មរបស់ថៃក្នុងយុគសម័យថ្មី របស់ប្រធានាធិបតីអាមេរិក លោក ដូណាល់ ត្រាំ។ ថៃបានប្ដេជ្ញាធ្វើការបង្កើនការនាំចូលពីសហរដ្ឋអាមេរិក ដើម្បីកាត់បន្ថយអតិរេកពាណិជ្ជកម្មដែលថៃមានប្រមាណ ៣៥,៤ ប៊ីលានដុល្លារ កាលពីឆ្នាំមុន។ កន្លងមក លោក ត្រាំ បានប្ដេជ្ញាដាក់ពន្ធលើគ្រប់ប្រទេសដែលអាមេរិកមានឱនភាពពាណិជ្ជកម្មជាមួយ ឬប្រទេសដែលមិនសូវនាំចូលទំនិញអាមេរិកច្រើន៕