ព័ត៌មានអន្ដរជាតិ

ថៃរំពឹងពីការធ្លាក់ចុះធ្ងន់ធ្ងរការនាំចេញអង្ករនៅត្រីមាសដើមឆ្នាំនេះ

បានផុស

២ ថ្ងៃ មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

សមាគមអ្នកនាំចេញអង្ករថៃ បានឱ្យដឹងកាលពីថ្ងៃពុធថា ការនាំចេញអង្កររបស់ប្រទេសរំពឹងថានឹងធ្លាក់ចុះធ្ងន់ធ្ងរនៅត្រីមាសទី ១ ដើមឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានកិត្តិយសនៃសមាគមអ្នកនាំចេញអង្ករថៃ លោក Chookiat Ophaswongse បាននិយាយថា ក្នុងរយៈពេល ២ ខែដំបូងនៃឆ្នាំ ២០២៥ ការនាំចេញអង្កររបស់ថៃមានចំនួនសរុប ១,១ លានតោន ធ្លាក់ចុះ ៣២ ភាគរយ ឆ្នាំលើឆ្នាំ ដោយការនាំចេញអង្ករសប្រឈមមុខនឹងការធ្លាក់ចុះខ្លាំង។ លោកបន្តថា ការនាំចេញអង្ករសរុប អាចនឹងមិនលើស ២ លានតោនក្នុងត្រីមាសទី១ទេ ដោយអាចមានការថយចុះ ៣៣ ភាគរយ ឆ្នាំលើឆ្នាំ។

ចំណែកឯប្រធានសមាគម លោក Charoen Laothammatas វិញ បានឱ្យដឹងថា ការនាំចេញអង្កររបស់ថៃរំពឹងថានឹងមានប្រមាណ ៧,៥ លានតោន ធ្លាក់ចុះ ២៤,២ ភាគរយ ពីប្រមាណ ៩,៩៤ កាលពីឆ្នាំមុន។

មន្រ្តីដដែលបានលើកឡើងពីកត្តាសំខាន់ៗ២ដែលធ្វើឱ្យការនាំចេញអង្ករធ្លាក់ចុះ ដែលក្នុងនោះរួមមាន ការនាំចេញអង្ករឡើងវិញរបស់ឥណ្ឌាក្រោយផ្អាកអស់រយៈពេល ២ ឆ្នាំ និងកំណើននៃផលិតកម្មស្រូវអង្កររបស់ពិភពលោក។

លោក Charoen បានបន្តថា ការឡើងថ្លៃប្រាក់បាត ក៏ជាក្តីបារម្ភយ៉ាងខ្លាំងសម្រាប់ការនាំចេញរបស់ថៃផងដែរ។ លោកថា ការប្រែប្រួលនៃអត្រាប្តូរប្រាក់ អាចជះឥទ្ធិពលយ៉ាងខ្លាំងដល់តម្លៃនាំចេញ ដែលអាចបណ្តាលឱ្យមានការខាតបង់សម្រាប់អ្នកនាំចេញ។

លោកបានគូសបញ្ជាក់ថា ប្រសិនបើអាមេរិកអនុវត្តពន្ធ ១០ ភាគរយ លើការនាំចូលរបស់ថៃ នោះវាអាចនឹងបន្ថែមតម្លៃអង្ករថៃរហូតដល់ ១០០ដុល្លារ/តោន ដែលធ្វើឱ្យកាន់តែប៉ះពាល់ដល់ការប្រកួតប្រជែង។ មន្រ្តីដដែល ក៏បានសង្កត់ធ្ងន់ផងដែរ លើតួនាទីរបស់រដ្ឋាភិបាលក្នុងការកាត់បន្ថយថ្លៃដើមផលិតកម្មសម្រាប់កសិករ ដោយគិតគូរពីការចំណាយលើជី ថ្នាំសម្លាប់សត្វល្អិត និងប្រេងឥន្ធនៈ។

ក្រៅតែពីថៃ ប៉ាគីស្ថាន និងវៀតណាម ដែលជាប្រទេសនាំចេញអង្ករធំៗផ្សេងទៀត ក៏រំពឹងពីការធ្លាក់ចុះនៃការនាំចេញអង្ករផងដែរនៅឆ្នាំនេះ៕