គម្រោងនាំចេញអង្ករថៃ ១០០ ០០០ តោន ទៅចិន ត្រូវជាប់គាំង

គម្រោងនាំចេញអង្ករថៃ ១០០ ០០០ តោន ទៅកាន់ប្រទេសចិន​ ត្រូវបាន​ជាប់គាំង ដោយពន្យារពេលការដឹកជញ្ជូនហួសពីខែមករា តាមការគ្រោងទុក។ នេះបើតាមការចុះផ្សាយរបស់កាសែត The Nation កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មែនទែនទៅ គម្រោងនេះស្ថិតនៅក្រោមកិច្ចព្រមព្រៀងរដ្ឋាភិបាលទៅរដ្ឋាភិបាល (G2G) រវាងចិន និងថៃ ប៉ុន្តែត្រូវជាប់គាំងដោយសារតែវាតម្រូវឱ្យមានការ​អនុម័តពីគណៈរដ្ឋមន្ត្រីថៃ និងការពិនិត្យឡើងវិញផ្នែកច្បាប់ដោយការិយាល័យក្រុមប្រឹក្សារដ្ឋ។

ដំណើរការសម្រាប់ការនាំចេញ ត្រូវ​រង់ចាំ​រដ្ឋាភិបាល​ថ្មី ព្រោះ​រដ្ឋបាល​បច្ចុប្បន្ន​ជា​រដ្ឋាភិបាល​ចាំផ្ទះ ដែលបង្កើតជាភាបស្មុគស្មាញផ្នែកច្បាប់អំពីសិទ្ធិអំណាចក្នុងការសម្រេចកិច្ចសន្យាជាមួយ​ចិន។

ប៉ុន្តែលើសពីនេះ ការចរចាកាន់តែស្មុគស្មាញថែមទៀត ពីព្រោះ​ក្រុមហ៊ុនអ្នកទិញ COFCO ​ដែលជាសហគ្រាសរដ្ឋចិន ​តម្រូវឱ្យមានការចរចាតម្លៃដោយផ្អែកលើអត្រាទីផ្សារ ជាជាងកិច្ចព្រមព្រៀងដោយផ្ទាល់ពីរដ្ឋាភិបាល។ ប្រធានសមាគមអ្នកនាំចេញអង្ករថៃ លោក Charoen Laothamatas បាន​និយាយថា ការចរចាបែបនេះ គឺមិនស្រួលនោះទេ។

តម្លៃអង្ករថៃ នៅថ្ងៃទី១៩ ខែមករា ឆ្នាំ២០២៦ ត្រូវបានលក់នៅតម្លៃ ៣៩៩ដុល្លារ/តោន បើប្រៀបធៀបទៅនឹងអង្ករវៀតណាម ៣៦០-៣៦៤ ដុល្លារ/តោន អង្ករឥណ្ឌា ៣៥០-៣៥៤ ដុល្លារ/តោន និងអង្ករប៉ាគីស្ថាន ៣៦៩-៣៧៣ ដុល្លារ/តោន។ ដូច្នេះ អង្ករថៃមានតម្លៃថ្លៃជាងដៃគូប្រកួតប្រជែងជាមធ្យមប្រហែល ៥០-៦០ដុល្លារ/តោន ដែល​គម្លាតនេះបណ្តាលមកពី​កំណើនយ៉ាងខ្លាំងនៃតម្លៃប្រាក់បាត។

គួរគូសបញ្ជាក់ថា អង្ករ ១០០ ០០០ តោន គឺស្ថិតនៅក្នុងចំណោមអង្ករ ២៨០ ០០០ តោន ដែលមិនទាន់នាំចេញទៅចិន ក្រោមកិច្ចសន្យាថៃ-ចិន G2G លើការនាំចេញអង្ករថៃ ១ លានតោន។

ការជាប់គាំងការនាំចេញអង្ករថៃនៅពេលនេះ កើតឡើងនៅពេលដែលតម្រូវការសកល ជាពិសេសពីប្រទេសអតិថិជនធំៗ រួមមានហ្វីលីពីន និងឥណ្ឌូណេស៊ីធ្លាក់ចុះ ហើយការផ្គត់ផ្គង់កើនឡើងជាពិសេសពីឥណ្ឌា ប៉ាគីស្ថាន និងវៀតណាម៕