ព័ត៌មានអន្ដរជាតិ

ការនាំចេញអង្ករថៃទៅមជ្ឈិមបូព៌ាត្រូវជាប់គាំង ដោយសារជម្លោះ

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

ការនាំចេញអង្ករថៃទៅកាន់តំបន់មជ្ឈិមបូព៌ាត្រូវបានជាប់គាំង ដោយសារតែជម្លោះរវាងអ៊ីស្រាអែល-សហរដ្ឋអាមេរិក និងអ៊ីរ៉ង់ ដែលធ្វើឱ្យការដឹកជញ្ជូនទៅកាន់តំបន់ដែលជាទីផ្សារគ្រាប់ធញ្ញជាតិដ៏ធំរបស់ថៃមួយនេះរងការរំខាន។ នេះបើតាមការចុះផ្សាយរបស់សារព័ត៌មាន Bloomberg នៅថ្ងៃសុក្រ (១៣ មីនា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញយល់ឃើញថា ការជាប់គាំងនេះ នឹងធ្វើឱ្យកសិករថៃកាន់តែតានតឹងជាមួយនឹងការកើនឡើងថ្លៃដើម និងការថយចុះនៃតម្រូវការនៅបរទេស ចំំពេលដែលតម្លៃ និងតម្រូវការស្រូវអង្ករអន្តរជាតិខ្សោយរួចស្រាប់ទៅហើយ។

ប្រធានកិត្តិយសនៃសមាគមអ្នកនាំចេញអង្ករថៃ លោក Chookiat Ophaswongse បាននិយាយក្នុងបទសម្ភាសន៍មួយថា កប៉ាល់ ២ គ្រឿងដែលដឹកអង្ករសរុបចំនួន ៨០ ០០០ តោន ទៅអ៊ីរ៉ាក់ ត្រូវជាប់គាំងនៅត្រឹមកំពង់ផែមួយក្នុងទីក្រុងបាងកក នៅសប្តាហ៍នេះ ដោយអ្នកទិញបានណែនាំឱ្យទម្លាក់កុងតឺន័រចេញ ហើយដឹកអង្ករទៅឃ្លាំងវិញ។

លោក Chookiat បាននិយាយយ៉ាងដូច្នេះថា៖ «អ្វីៗគឺជាប់គាំង» ដោយបន្ថែមថា ការដឹកជញ្ជូនទៅកាន់មជ្ឈិមបូព៌ាអាចត្រូវបានផ្អាករយៈពេលជាច្រើនខែ ហើយ «គ្មានការទិញថ្មីណាមួយទេ ព្រោះគ្មាននរណាម្នាក់ដឹងថានឹងមានអ្វីកើតឡើងបន្ទាប់»។

ស្ថានភាពបច្ចុប្បន្ន កំពុងគំរាមកំហែងដល់កសិករថៃ ដែលលំបាករួចទៅហើយដោយការធ្លាក់ចុះនៃតម្លៃក្នុងស្រូវស្រុក និងការហក់ឡើងនៃប្រាក់បាត ដែលធ្វើឱ្យអង្ករថៃពិបាកប្រកួតប្រជែងនៅបរទេស។ សម្ពាធសម្រាប់កសិករ អាចប៉ះពាល់ដល់សេដ្ឋកិច្ចថៃ ដែលវិស័យកសិកម្ម រួមចំណែកប្រមាណ ១/៤ នៃកម្លាំងពលកម្មរបស់ប្រទេស។

ការនាំចេញអង្កររបស់ថៃ ត្រូវបានគេព្យាកររួចហើយថានឹងធ្លាក់ចុះ ១១% នៅឆ្នាំនេះ មកនៅត្រឹម ៧ លានតោន ដែលជាកម្រិតទាបបំផុតក្នុងរយៈពេល ៥ ឆ្នាំ។ ទស្សនវិស័យកាន់តែងងឹតទៅៗ ដោយសារតែអ៊ីរ៉ាក់ ដែលជាអ្នកទិញអង្ករធំជាងគេរបស់ថៃ តម្រូវឱ្យថៃដឹកជញ្ជូនអង្ករឆ្លងកាត់ច្រកសមុទ្រហ័រមូហ្ស ដែលត្រូវបានបិទដោយសារតែជម្លោះអ៊ីស្រាអែល និងអ៊ីរ៉ង់។ ទើបតែក្នុងសប្ដាហ៍នេះទេ ដែលកប៉ាល់ដឹកទំនិញរបស់ថៃមួយគ្រឿង បានរកការវាយប្រហារពីអ៊ីរ៉ង់ ដោយបង្កការខូចខាត និងបំបាត់ខ្លួននារិកយ៉ាងហោចណាស់ ៣ នាក់។

លោក Chookiat បាននិយាយថា ក្រុមហ៊ុនដឹកជញ្ជូនអង្ករថៃកំពុងប្រឈមមុខនឹងការចំណាយកាន់តែខ្ពស់ដែលទាក់ទងនឹងហានិភ័យសង្គ្រាម និងកំណើនថ្លៃប្រេងឥន្ធនៈ។

ការចំណាយបន្ថែម នឹងកាត់បន្ថយប្រាក់ចំណេញរបស់អ្នកនាំចេញ នៅស្របពេលដែលតម្លៃអង្ករថៃទូទាំងពិភពលោកមានអត្រាខ្ពស់ជាងគូប្រជែង ដោយសារតែប្រាក់បាតថ្លៃធៀបនឹងដុល្លារ និងកំណើនការផ្គត់ផ្គង់សកល។

អង្ករស ៥% របស់ថៃ ត្រូវបានប៉ាន់ស្មានថាលក់នៅតម្លៃ ៣៩២ ដុល្លារ/តោននៅថ្ងៃសុក្រ បើប្រៀបធៀបនឹងតម្លៃប្រភេទអង្ករដូចគ្នារបស់វៀតណាម (៣៥៦-៣៦០ ដុល្លារ/តោន) និងឥណ្ឌា (៣៥០-៣៥៤ ដុល្លារ)។ នេះបើយោងតាមទិន្នន័យរបស់សមាគមអ្នកនាំចេញ។

ចំពេលដែលបញ្ហានេះកើតឡើង កសិករថៃក៏ពិបាករកការផ្គត់ផ្គង់ប្រេងឥន្ធនៈ និងជីសំខាន់ៗដែលភាគច្រើនមានប្រភពមកពីមជ្ឈិមបូព៌ា មុនរដូវដាំដុះដែលចាប់ផ្តើមក្នុងរយៈពេលប៉ុន្មានសប្តាហ៍ទៀត។

លោក Kriengsak Tapananon ទីប្រឹក្សាសមាគមកសិករថៃ បានថ្លែងថា៖ «ប្រសិនបើប្រេងឥន្ធនៈ និងជីកាន់តែថ្លៃ កសិករនឹងកាន់តែមានទុក្ខព្រួយ»។

ស្ថានភាពទីផ្សារក្នុងស្រុកសម្រាប់កសិករថៃ ក៏មិនប្រសើរដែរ ដោយសារតែតម្លៃទាប នៅពេលកសិករប្រមូលផលបានច្រើន ហើយការផ្គត់ផ្គង់សកលក៏កើនឡើង។ លោក Kriengsak បាននិយាយយ៉ាងដូច្នេះថា៖ «នៅពេលការលក់ទាប ឬនៅពេលដែលថ្លៃដើមផលិតកម្មកើនឡើង កសិករត្រូវរែកបន្ទុកការចំណាយ»៕