កម្ពុជា ត្រៀមបញ្ជូនឈ្មោះបញ្ជីចម្ការទុរេន និងរោងចក្រវេចខ្ចប់ទៅចិន មុនពេលឈានដល់ការនាំចេញ

លោក ឃឹម ហ្វីណង់ អនុរដ្ឋលេខាធិការ និង​ជា​អ្នក​នាំ​ពាក្យ​ក្រសួង​កសិកម្ម​ រុក្ខា​ប្រមាញ់ និង​នេសាទ បាន​ឱ្យ​ដឹងថា បន្ទាប់​ពីចុះហត្ថលេខាលើពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែទុរេនស្រស់ពីកម្ពុជាទៅកាន់ប្រទេសចិន អគ្គនាយកដ្ឋានកសិកម្ម បានអំពាវនាវដល់ម្ចាស់ចម្ការទុរេន និងរោងចក្រកែច្នៃ វេចខ្ចប់ ដែលមានបំ​ណង​នាំចេញទៅទីផ្សារប្រទេសចិន រួសរាន់មកដាក់ពាក្យស្នើសុំចុះបញ្ជីចម្ការ និងរោងចក្រ សម្រាប់នាំចេញទៅកាន់ប្រទេសចិន។

លោក ឃឹម ហ្វីណង់ បញ្ជាក់ថា បន្ទាប់ពីទទួលបានពាក្យស្នើសុំរបស់ម្ចាស់ចម្ការទុរេន និងរោងចក្រវេចខ្ចប់ អគ្គនាយកដ្ឋានកសិកម្មនឹងចាត់មន្រ្តីជំនាញចុះណែនាំ និងវាយតម្លៃស្របតាមនីតិវិធីបច្ចេកទេស ហើយនឹងបញ្ជូនបញ្ជីឈ្មោះចម្ការ និងរោងចក្រទៅកាន់ភាគីគយចិន ដើម្បីភាគីគយចិនចុះមកពិនិត្យ និងវាយតម្លៃបញ្ចប់មុននឹងឈានដល់ការនាំចេញជាផ្លូវការ។

មន្ត្រីអ្នកនាំពាក្យរូបនេះ បន្ថែមថា លក្ខខណ្ឌតម្រូវភូតគាមអនាម័យសម្រាប់នាំចេញទុរេនទៅចិនត្រូវតែត្រូវអនុវត្តតាមខ្លឹមសារនៃពិធីសាររវាងក្រសួងកសិកម្ម និងអគ្គរដ្ឋបាលគយចិនដែលបានចុះហត្ថលេខាកាលពីថ្ងៃទី ១៧ ខែមេសា ឆ្នាំ២០២៥។

លោក ហេង ឆេងលី ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាម ប្រាប់​កម្ពុ​ជាថ្មីថា អគ្គនាយកដ្ឋានកសិកម្មនៃក្រសួងកសិកម្មធ្លាប់​បញ្ជូនមន្ត្រីជំនាញចុះទៅត្រួតពិនិត្យ​ចម្ការ​ក្នុង​សហគមន៍រួចហើយ ក្នុងនោះគាត់ជ្រើសរើស​យកចម្ការចំនួន ១០ ដែលអ្នកជំនាញបានផ្ដល់​ដំបូន្មានណែនាំពីការរៀបចំចម្ការ ខណៈសហគមន៍បានស្នើចុះបញ្ជីសម្រាប់​ការបញ្ជាក់វិញ្ញា​បនបត្រការអនុវត្តកសិកម្មល្អ(Cam-GAP)។

លោក ហេង ឆេងលី បញ្ជាក់ថា ចម្ការសហគមន៍របស់លោកប្រមាណជាង ៦០ បន្ថែមទៀត គ្រោងនឹងរៀប​ចំចុះបញ្ជី ដើម្បីថ្នាក់ជាតិចុះពិនិត្យកែតម្រូវ មុនពេលចិនមកត្រួតពិនិត្យ។

លោកយល់ឃើញថា៖ «ប្រសិនបើទុរេនកម្ពុជាមានឱកាសនាំចេញទៅទីផ្សារចិន កាន់​តែ​ល្អ​សម្រាប់ទុរេនយើងសម្រាប់កសិករគាត់មានជម្រើសច្រើន»។

រដូវកាលប្រមូលផលទុរេននៅឆ្នាំ ២០២៥ បានចាប់ផ្ដើមបណ្ដើរៗ​ជាមួយ​នឹង​ប្រ​ភេទ​ពូជ​ទុរេន មូសាំងឃីង និងពូជស្រាលមួយចំនួនទៀត ខណៈទុរេនមាន់ថង នឹងអាច​ប្រ​មូផល​បាន​នៅដើមខែឧសភានេះ។

លោក ហេង ឆេងលី ប្រាប់ថា ទិន្នផលឆ្នាំនេះល្អប្រសើរ បើធៀបនឹងឆ្នាំមុន ខណៈតម្លៃ​ប្រភេទ​ពូជ​មូសាំងឃីងបានល្អចន្លោះពី ១ ម៉ឺន ៧ ពាន់ ដល់ ២ ម៉ឺន ៥ ពាន់រៀល លក់ចេញពីចម្ការ។

យោងតាមក្រសួងកសិកម្ម នៅឆ្នាំ ២០២៤ កម្ពុជាបាននាំទុរេនចេញប្រមាណ ៧ ពាន់តោន ខណៈកម្ពុជាមានផ្ទៃដីដាំដុះទុរេន ៩ ពាន់ហិកតា ក្នុងនោះផ្ទៃ​ដីប្រមូល​ផលប្រមាណ ៥ ពាន់ហិកតា៕