ព័ត៌មានអន្ដរជាតិ

តម្លៃប្រេងអន្តរជាតិកើនជាង ១% ជុំវិញលទ្ធភាពវាយប្រហារអ៊ីរ៉ង់របស់អ៊ីស្រាអែល

បានផុស

១ year មុន

នៅ

ថ្ងៃពុធ ២១ ឧសភា ២០២៥

ដោយ

តម្លៃប្រេងអន្តរជាតិ បានកើនឡើងជាង ១ ភាគរយសម្រាប់ការជួញដូរនៅថ្ងៃពុធនេះ ក្រោយមានរបាយការណ៍ស្ដីពីផែនការរបស់អ៊ីស្រាអែលក្នុងការវាយប្រហារហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ ដែលអាចបង្កើនភាពតានតឹងនៅមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងនាពេលអនាគត ម៉ាក Brent បានកើនឡើង ៨៦ សេន ឬ ១,៣២ ភាគរយ ដោយជួញដូរនៅតម្លៃ ៦៦,២៤ ដុល្លារ/បារ៉ែល គិតត្រឹមម៉ោង ៨ ព្រឹក នៅក្រុងហុងកុង។ តម្លៃអនាគតប្រេងឆៅអាមេរិក ម៉ាក West Texas Intermediate (WTI) បានកើនឡើង ៩០ សេន ឬ ១,៤៥ ភាគរយ ដល់ ៦២,៩៣ ដុល្លារ/បារ៉ែល។

កំណើននៃតម្លៃប្រេងនេះ កើតឡើងក្រោយបណ្ដាញទូរទស្សន៍ CNN បានរាយការណ៍ពីរបាយការណ៍ស៊ើបការសម្ងាត់របស់សហរដ្ឋអាមេរិក ដែលបង្ហាញថា អ៊ីស្រាអែលកំពុងត្រៀមខ្លួនក្នុងការវាយប្រហារតាមអាកាសលើហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ ដែលជាសត្រូវធំប្រចាំតំបន់មជ្ឈិមបូព៌ារបស់ខ្លួន។

អ៊ីរ៉ង់ គឺជាប្រទេសផលិតប្រេងធំទី៣ក្នុងចំណោមសមាជិករបស់អង្គការនៃប្រទេសនាំចេញប្រេងកាត (OPEC) ហើយការវាយប្រហាររបស់អ៊ីស្រាអែល អាចនឹងបង្កការរំខានដល់លំហូរប្រេងចេញពីប្រទេសនេះ។ ទន្ទឹមនឹងនេះ ក៏មានការព្រួយបារម្ភផងដែរថា អ៊ីរ៉ង់អាចសងសឹកដោយការរារាំងនាវាដឹកប្រេងឆ្លងកាត់ច្រកសមុទ្រ Hormuz ដែលជាច្រកនាំចេញប្រេងដ៏សំខាន់របស់អារ៉ាប៊ីសាអូឌីត គុយវ៉ែត អ៊ីរ៉ាក់ និងអារ៉ាប់រួម។

យ៉ាងណាមិន កំណើនតម្លៃប្រេងនៅតែមានកំណត់ ជុំវិញភាពប្រសើរឡើងនៃការផ្គត់ផ្គង់ រួមទាំងកំណើនប្រេងក្នុងស្ដុករបស់សហរដ្ឋអាមេរិក និងកំណើនផលិតកម្មក្នុងប្រទេសកាហ្សាក់ស្ថានជាដើម៕