ថៃប្ដេជ្ញាកាត់បន្ថយអតិរេកពាណិជ្ជកម្មជាមួយអាមេរិកឱ្យបាន ១៥ ប៊ីលាន​ដុល្លារ

រដ្ឋមន្ត្រីក្រសួងហិរញ្ញវត្ថុថៃ លោក​ Pichai Chunhavajira បាន​ឱ្យដឹងកាលពីថ្ងៃអង្គារថា ​​ប្រទេសថៃប្ដេជ្ញា​ក្នុងការកាត់បន្ថយអតិរេកពាណិជ្ជកម្មជាមួយ​អាមេរិក ឱ្យបាន ១៥ ប៊ីលាន​ដុល្លារ ឬ ១/៣ ក្នុងមួយឆ្នាំ ដើម្បីជាផ្នែកមួយនៃការចរចាពន្ធគយបដិការជាមួយរដ្ឋបាលប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់កាសែតបាងកកប៉ុស្តិ៍។ ​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pichai បាន​ថ្លែងក្នុងសន្និសីទសភាពាណិជ្ជកម្មអាមេរិកនៅទីក្រុងបាងកកកាលពីថ្ងៃអង្គារ ថា រដ្ឋាភិបាលថៃបានប្តេជ្ញាចិត្ត​ចាត់វិធានការប្រឆាំងនឹងការគេចវេះពាណិជ្ជកម្ម​ ដើម្បីធានាឱ្យបានថា ប្រទេសថៃបង្កើតភាពជាដៃគូរយៈពេលវែង ប្រកបដោយ​យុត្តិធម៌ និងមានតុល្យភាពក្នុងពាណិជ្ជកម្ម និងការវិនិយោគជាមួយសហរដ្ឋអាមេរិក។

រដ្ឋមន្ត្រីដដែល មិនបាន​បញ្ជាក់ឱ្យលម្អិតថាពេល​ណា​ថៃនឹងសម្រេចបានគោលដៅកាត់បន្ថយអតិរេកពាណិជ្ជកម្មនោះទេ ខណៈថៃមាន​អតិរេកពាណិជ្ជកម្មជាមួយអាមេរិកប្រមាណ ៣៦ ប៊ីលា​ន​ដុល្លារ កាលពីឆ្នាំមុន។ ​ពន្ធក្នុងអត្រាខ្ពស់បែបនេះ អាចបង្កហានិភ័យសម្រាប់សេដ្ឋកិច្ចថៃ​ ខណៈសហរដ្ឋអាមេរិករួមចំណែកដល់ការនាំចេញសរុបរបស់ថៃប្រមាណ ១៨ ភាគរយ កាលពីឆ្នាំមុន។

កន្លងមក​ ថៃបាន​បញ្ជូនសំណើពាណិជ្ជកម្មមួយចំនួនទៅកាន់សហរដ្ឋអាមេរិក ដើម្បីការចរចាពន្ធគយបដិការ ៣៦ ភាគរយ ដែល ត្រាំ ដាក់លើទំនិញនាំចូលពីប្រទេសថៃ។ សំណើទាំងនោះ រួមបញ្ជូលផងដែរនូវការប្រយុទ្ធប្រឆាំងនឹងការក្លែងបន្លំដើមកំណើនទំនិញ ការបង្កើនការនាំចូលទំនិញពីអាមេរិក ការកាត់បន្ថយរបាំងពន្ធ និងមិនមែនពន្ធគយលើទំនិញអាមេរិក និងការបង្កើនការវិនិយោគនៅសហរដ្ឋ​អាមេរិក​ជាដើម។

បើតាមប្រធាន​តំណាងពាណិជ្ជកម្មថៃ លោកស្រី ​Nalinee Taveesin ​កាលពីសប្តាហ៍ ក្រុមហ៊ុនថៃអាចវិនិយោគយ៉ាងតិច ២ ​ប៊ីលានដុល្លារនៅសហរដ្ឋអាមេរិកក្នុងពេលឆាប់ៗនេះ។ ជាមួយគ្នានោះ ថៃ​ក៏​បាន​បង្ហាញ​ចំណាប់​អារម្មណ៍​ក្នុង​ការ​ចូលរួម​គម្រោង​បំពង់​បង្ហូរ​ឧស្ម័ន​ដ៏​ធំ​​​នៅ​រដ្ឋ​អាឡាស្កា ដែល​គាំទ្រ​ដោយ​លោក ត្រាំ ផងដែរ។

ចំណែកឯកអគ្គរដ្ឋទូតសហរដ្ឋអាមេរិក លោក Robert Godec វិញ បាននិយាយថា ភាពជាដៃគូជាមួយ​ថៃ​មានសារៈសំខាន់ជាយុទ្ធសាស្ត្រ។ លោកថា ​សហរដ្ឋអាមេរិកកំពុងមានទំនាក់ទំនងយ៉ាងស៊ីជម្រៅនៅក្នុងតំបន់​ ខណៈ​ពាណិជ្ជកម្មអាមេរិក-ថៃ នៅតែរឹងមាំ និងបន្តកើនឡើង៕