អាន់វ៉ា អានុទីន ព្រមគ្នាឆ្ពោះទៅ​បញ្ចប់ជម្លោះពាណិជ្ជកម្ម​អាហារសមុទ្រ ប៉ុន្តែ​ដោះស្រាយគ្នាមិនទាន់ដាច់ស្រេច

មេដឹកនាំម៉ាឡេស៊ី និងថៃ បានព្រមគ្នាឆ្ពោះទៅរកការបញ្ចប់ជម្លោះពាណិជ្ជកម្មពាក់ព័ន្ធ​អាហារសមុទ្ររវាងប្រទេសទាំង២​ បន្ទាប់ពីនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ​និង​នាយករដ្ឋមន្ត្រីថៃ លោក អានុទីន ឆានវីរៈគុល​ បានឯកភាពគ្នាជំរុញការអនុវត្តកិច្ចព្រមព្រៀងដោះស្រាយបញ្ហានេះឱ្យមានប្រសិទ្ធភាពក្នុងរយៈពេល ១ សប្តាហ៍ខាងមុខ​។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ និងកាសែត The Star។

យ៉ាងណាមិញ ​ការចរចាលម្អិតលើបញ្ហាបច្ចេកទេសនៅមិនទាន់បញ្ចប់ជាស្ថាពរនៅឡើយទេ ដោយម៉ាឡេស៊ីបាន​ដាក់សំណើជាច្រើនទៅកាន់ភាគីថៃ។

លោក អាន់វ៉ា បានថ្លែង​ក្រោយ​កិច្ចប្រជុំទ្វេភាគីនៅទីក្រុងពូត្រាចាយ៉ា កាលពីថ្ងៃទី៩ ខែកក្កដា ថា រដ្ឋមន្ត្រីកសិកម្មនៃប្រទេសទាំង២ បានឈានដល់ការយោគយល់គ្នាក្នុងការដោះស្រាយបញ្ហាជលផលដែលនៅសេសសល់។ លោកថ្លែងយ៉ាងដូច្នេះថា៖ «យើងបានដោះស្រាយបញ្ហាដែលនៅសល់ទាក់ទងនឹងវិស័យជលផល ហើយយើងបានឯកភាពថា កិច្ចព្រមព្រៀងនេះគួរតែចូលជាធរមានក្នុងរយៈពេលមួយសប្តាហ៍»​។

​នាយករដ្ឋមន្រ្តីដដែល​បានបញ្ជាក់ថា ដើមឡើយភាគីទាំង២ គ្រោងឱ្យអនុស្សរណៈយោគយល់ (MoU) ចូលជាធរមានក្នុងរយៈពេល ១ ខែ ប៉ុន្តែក្រោយមក បានព្រមព្រៀងគ្នា​បង្កើនល្បឿនឱ្យអាច​អនុវត្តបាន​ក្នុងរយៈពេលត្រឹម ១ សប្តាហ៍ទៀតប៉ុណ្ណោះ។

លោក អានុទីន ឯណោះវិញ ក៏បានស្វាគម​ការពិភាក្សារវាងរដ្ឋមន្ត្រីកសិកម្មនៃប្រទេសទាំង២ ដោយនិយាយថា កិច្ចពិភាក្សានោះបានជួយស្វែងរកដំណោះស្រាយដែលអាចទទួលយកបានសម្រាប់ភាគីទាំង​សងខាង។

យ៉ាងណាមិញ គួរគូសបញ្ជាក់ថា ​ការចរចាលើបញ្ហាបច្ចេកទេសនៅតែបន្ត។

អគ្គនាយកនៃនាយកដ្ឋានជលផលម៉ាឡេស៊ី លោក ដាតុ អាដណាន់ ហ៊ូសេន (Datuk Adnan Hussain) បានឱ្យដឹងថា ថៃ និងម៉ាឡេស៊ី កំពុងបន្ត​ពិភាក្សាអំពីលក្ខខណ្ឌបច្ចេកទេស ដើម្បីសម្រួលដល់ការធ្វើពាណិជ្ជកម្ម ដោយមិនប៉ះពាល់ដល់សុវត្ថិភាពចំណីអាហារ ​និងវិធានការការពារជីវសុវត្ថិភាព។

លោកនិយាយថា៖ «ម៉ាឡេស៊ីចាត់ទុកដំណើរការនេះជាការសម្របសម្រួលផ្នែកបច្ចេកទេសរវាងអាជ្ញាធរមានសមត្ថកិច្ចរបស់ប្រទេសទាំងពីរ មិនមែនជាវិវាទពាណិជ្ជកម្មនោះទេ»។

​ជាមួយគ្នានោះ ម៉ាឡេស៊ីបានផ្ញើសំណួរបច្ចេកទេសចំនួន ៣៥ សំណួរទៅកាន់ភាគីថៃ ស្តីពីការនាំចូលបង្គា ដើម្បីទទួលបានការបំភ្លឺបន្ថែម មុននឹងបញ្ចប់ការវាយតម្លៃហានិភ័យ។ ចំណែកការនាំចូលត្រីឆ្ពុងភាគីទាំង ២ កំពុងពិនិត្យកែលម្អលក្ខខណ្ឌនាំចូល រួមមានវិញ្ញាបនបត្រ សុវត្ថិភាពចំណីអាហារ និងវិធានការគ្រប់គ្រងហានិភ័យ។

គួរគូសបញ្ជាក់ថា ជម្លោះពាណិជ្ជកម្មថៃ និងម៉ាឡេស៊ី ​បានផ្ទុះឡើង​ពី​ខែឧសភា បន្ទាប់ពីថៃរឹតបន្តឹងការនាំចូលត្រីឆ្ពុង​ពីម៉ាឡេស៊ី ដោយ​បារម្ភអំពីសំណល់សារធាតុគីមី។ ជាការឆ្លើយតប ម៉ាឡេស៊ីបានរឹតបន្តឹងការនាំចូលត្រីឆ្ពុងពីថៃ និង​ហាមការនាំចូលបង្គាថៃចំនួន ៥ មុខ ជាបណ្តោះអាសន្ន រាប់តាំងពីថ្ងៃទី១ ខែមិថុនា ឆ្នាំ២០២៦។​

បើតាមនាយកដ្ឋានជលផលម៉ាឡេស៊ី ​ថៃគឺជាទីផ្សារសំខាន់មួយសម្រាប់ការនាំចេញត្រីឆ្ពុងរបស់ម៉ាឡេស៊ី ដោយពាណិជ្ជកម្មទ្វេភាគីលើផលិតផលនេះ មានតម្លៃ ៩២,៦ លានរីងហ្គីត ស្មើនឹង ៩ ២៨៦ តោន ក្នុងឆ្នាំ២០២៤។

ក្រៅពីការពិភាក្សាលើបញ្ហាពាណិជ្ជកម្មអាហារសមុទ្រ ​លោក អាន់វ៉ា និងអានុទីន ឯណោះវិញ ក៏បានឯកភាពជំរុញការបង្កើតតំបន់សេដ្ឋកិច្ចពិសេសតាមព្រំដែន ពង្រឹងការតភ្ជាប់ហេដ្ឋារចនាសម្ព័ន្ធ កែលម្អប្រព័ន្ធគ្រប់គ្រងទឹកជំនន់ និងបង្កើនកិច្ចសហប្រតិបត្តិការក្នុងការបង្ក្រាបបទល្មើសឆ្លងដែន។

លោក អាន់វ៉ា ក៏បានអះអាងថា ម៉ាឡេស៊ី និងថៃនឹងខិតខំសម្រេចគោលដៅពាណិជ្ជកម្មទ្វេភាគីឱ្យបាន ៣០ ​ប៊ីលានដុល្លារអាមេរិក នៅត្រឹមឆ្នាំ២០២៧ ដោយចាត់ទុកវិស័យសេដ្ឋកិច្ច និងពាណិជ្ជកម្មជាមូលដ្ឋានគ្រឹះនៃទំនាក់ទំនងរវាងប្រទេសទាំង២។