ឥណ្ឌូណេស៊ីបើកផ្លូវឱ្យវិនិយោគិនបរទេស ចូលរួមគម្រោង​ហេដ្ឋារចនាសម្ព័ន្ធជាង ១២ ប៊ីលាន​ដុល្លារ

រដ្ឋាភិបាលឥណ្ឌូណេស៊ី​កំពុង​អំពាវនាវ​​វិនិយោគិនពីទូទាំងពិភពលោក ឱ្យចូលរួមក្នុងគម្រោងអភិវឌ្ឍន៍ហេដ្ឋារចនាសម្ព័ន្ធជាតិ ដែលមានតម្លៃប្រហែល ២០០ ​ទ្រីលានរូពៀរ ​(១២,៣ ប៊ីលាន​ដុល្លារអាមេរិក​​) ​ដែលគ្របដណ្ដប់លើវិស័យផ្សេងៗដូចជាផ្លូវថ្នល់ លំនៅដ្ឋាន ស្បៀងអាហារ និងថាមពលកកើតឡើងវិញ។ នេះបើតាមការចុះផ្សាយរបស់កាសែត Jakarta Globe។

ថ្លែងក្នុងសន្និសីទឥណ្ឌូណេស៊ីស្តីពីហេដ្ឋារចនាសម្ព័ន្ធឆ្នាំ ២០២៥ កាលពីថ្ងៃពុធ រដ្ឋមន្ត្រីសម្របសម្រួលសម្រាប់ហេដ្ឋារចនាសម្ព័ន្ធ និងការអភិវឌ្ឍ​ក្នុងតំបន់ លោក​ Agus Harimurti Yudhoyono បានគូសបញ្ជាក់ថា រដ្ឋាភិបាលកំពុងស្វែងរកដៃគូរយៈពេលវែងក្នុងការអភិវឌ្ឍ​ មិនមែនគ្រាន់តែជាអ្នករួមចំណែកដើមទុនប៉ុណ្ណោះទេ។

លោក Agus បាន​និយាយយ៉ាងដូច្នេះថា៖ «យើងស្វាគម​វិនិយោគិនពិភព​លោក មិនត្រឹមតែ​ជាអ្នកផ្ដល់​​ហិរញ្ញវត្ថុប៉ុណ្ណោះទេ ប៉ុន្តែក៏ជាអ្នកសហការដើម្បីជំរុញការផ្លាស់ប្តូររយៈពេលវែងរបស់ប្រទេសឥណ្ឌូណេស៊ីផងដែរ»។

ចំណែកឯអនុរដ្ឋមន្ត្រី​សម្របសម្រួល​ហេដ្ឋារចនាសម្ព័ន្ធ​មូលដ្ឋាន លោក Rachmat Kaimuddin បាននិយាយថា៖ «យើងបានរៀបចំបញ្ជីរាយ​គម្រោងដែលត្រៀមរួចជាស្រេចក្នុងការវិនិយោគ ក្នុងតម្លៃប្រហែល ២០០ ទ្រីលាន​រូពៀរ។ បញ្ជីនេះនឹងត្រូវបានបោះពុម្ពនៅលើគេហទំព័រផ្លូវការរបស់យើង ហើយយើងកំពុងផ្តល់កន្លែងជាក់លាក់សម្រាប់ការពិភាក្សាមួយទល់មួយរវាងម្ចាស់គម្រោង និងវិនិយោគិនដែលចាប់អារម្មណ៍»។

គួរគូសបញ្ជាក់ថា សន្និសីទកាលពីថ្ងៃពុធ បានលើកយកប្រធានបទធំៗចំនួន ៥ ​មកពិភាក្សា ដែលរួមមាន៖ ហេដ្ឋារចនាសម្ព័ន្ធទីក្រុងជាមូលដ្ឋាន ហេដ្ឋារចនាសម្ព័ន្ធតភ្ជាប់ ការអភិវឌ្ឍន៍លំនៅដ្ឋាន និងតំបន់ ហេដ្ឋារចនាសម្ព័ន្ធធន់នឹងអាកាសធាតុ និងហិរញ្ញប្បទានហេដ្ឋារចនាសម្ព័ន្ធ៕