សេដ្ឋកិច្ច

សម្ដេចតេជោ ហ៊ុន សែន ឱ្យត្រៀមទិញទំនិញ និងរកទីផ្សារកសិផលដែលកម្ពុជាធ្លាប់លក់ឱ្យថៃ

បានផុស

១ year មុន

នៅ

ថ្ងៃសុក្រ ១៣ មិថុនា ២០២៥

ដោយ

សម្ដេចតេជោ ហ៊ុន សែន ប្រធានព្រឹទ្ធសភា និងប្រធានបក្សកាន់អំណាចនៅថ្ងៃទី ១៣ ខែមិថុនា ឆ្នាំ ២០២៥ បានបញ្ជាឱ្យរដ្ឋាភិបាលត្រៀមទិញទំនិញដែលភាគច្រើនជាកសិផលរបស់ប្រជាពលរដ្ឋដែលធ្លាប់លក់ឲ្យថៃ និងខិតខំរកទីផ្សារក្នុងស្រុក និងក្រៅស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជារបស់សម្ដេចតេជោ ហ៊ុន សែន បានធ្វើឡើង បន្ទាប់ពីក្រុមជ្រុលនិយមថៃ និងយោធាមួយចំនួននៅតែបង្កហេតុជាមួយកម្ពុជាឥតឈប់ឈរ។

សម្ដេចតេជោ ហ៊ុន សែន ប្រធានបក្សកាន់អំណាច បានប្រកាសថា ក្នុងករណីភាគីថៃមិនព្រមបើកច្រកព្រំដែនដែលខ្លួនបិទជាឯកតោភាគី កម្ពុជានឹងឈប់ទិញទំនិញថៃមកប្រើប្រាស់ក្នុងទីផ្សារកម្ពុជាគឺមានន័យថា ឈប់ប្រើទំនិញថៃ ជំនួសដោយការប្រើទំនិញក្នុងស្រុក និងទំនិញមកពីប្រទេសផ្សេងក្រៅពីថៃ។

សម្ដេចតេជោ ហ៊ុន សែន បន្ថែមថា៖ «ត្រៀមទិញទំនិញដែលភាគច្រើនជាកសិផលរបស់ប្រជាជនដែលធ្លាប់លក់ឲ្យថៃ ដោយខិតខំរកទីផ្សាជូនប្រជាជនទាំងក្នុងស្រុក និងក្រៅស្រុក»។

បើតាមសម្ដេចតេជោ ហ៊ុន សែន ការផ្ដាច់អិនធឺណិតថៃពីកម្ពុជា ធ្វើឱ្យថៃបាត់ចំណូលប្រមាណជាង ១០០ លានដុល្លារក្នុងមួយឆ្នាំ ហើយប្រសិនបើក្រុមជ្រុលនិយមថៃ នៅតែបន្តប្រមាថកម្ពុជា និងឈានទៅដល់ការឈប់ប្រើទំនិញថៃទាំងស្រុងជំនួសដោយការប្រើទំនិញក្នុងស្រុក និងទំនិញពីប្រទេសផ្សេងវិញដែលធ្វើឲ្យអ្នកផលិតរបស់ថៃបាត់បង់ទីផ្សារដែលមួយឆ្នាំប្រមាណជាង៤ពាន់លានដុល្លារ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីកម្ពុជាថ្មីថា៖ «បច្ចុប្បន្នយើងទិញពីថៃ ច្រើនជាងថៃទិញពីយើង ប្រសិនបើមានករណីបិទព្រំដែន យើងអាចមានទីផ្សារដែលយើងអាចនាំចេញ-ចូល ពីវៀតណាមផលិតផលប្រហាក់ប្រហែលមកជំនួសវិញ ទីផ្សារសេរី មានន័យថា ផលិតផលមួយផ្គត់ផ្គង់អត់គ្រាប់គ្រាន់ យើងអាចទិញពីអ្នកផ្គត់ផ្គង់ផ្សេង ដូចជាវៀតណាម និងចិន វាមិនជាបញ្ហាដោយសារយើងជាអ្នកទិញ»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាយល់ឃើញថា៖ «ធម្មតាទេ អ្នកនាំចូលនាំ-នាំចេញច្រើន គឺខាតច្រើន តែខាត ទាំងអស់គ្នា ពិតមែនតែ អ្នកខ្លះថា កម្ពុជាខាតតិច តែកុំភ្លេចថាជាង ១ ពាន់លានដុល្លារ ក្នុងមួយឆ្នាំ មិនមែនតិចទេ ទំហំពាណិជ្ជកម្មកម្ពុជា-ថៃ គឺធំណាស់ យើងនាំចេញទៅកាណាដា និងប្រទេសអឺរ៉ុបមួយចំនួន អត់បាន ៥០០ លានផង ដូច្នេះ ប្រទេសជិតខាងហ្នឹងឯងដែលទទួលទិញលំហូរផលិតផលកម្ពុជាដែលជាវត្ថុធាតុដើម ដែលយើងមិនអាចនាំចេញក្រៅពីប្រទេសជិតខាង ដូច្នេះ ភាពចាំបាច់រវាងពាណិជ្ជកម្មសេដ្ឋកិច្ច ប្រទេសជិតខាង មិនថាតែថៃទេ វៀតណាម ក៏ដោយតែបិទ គឺមានបញ្ហា»។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការដោះដូរទំនិញរវាងកម្ពុជា-ថៃ មានទំហំទឹកប្រាក់ជិត ១,៨៨ ពាន់លានដុល្លារ ខណៈកម្ពុជានាំចេញទៅថៃ ៣៩៦ លានដុល្លារ កើន ១,១% ចំណែកឯថៃនាំទំនិញចូលមកវិញ មានទំហំទឹកប្រាក់ ១,៤៨ ពាន់លានដុល្លារ កើនឡើង ១០,៤%។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ។ នេះបើយោងតាមក្រសួងពាណិជ្ជកម្ម៕

អត្ថបទ៖ ឡេង ដេត