សេដ្ឋវិទូ៖ លទ្ធភាពរំលាយសភាថៃ អាចប៉ះពាល់ធ្ងន់ធ្ងរដល់សេដ្ឋកិច្ច​ ដែលមិន​ស្រួលស្រាប់ហើយ

សេដ្ឋវិទូនៅក្នុងប្រទេសថៃបាន​ព្រមាន​ថា ​ការរំលាយសភាថៃដែលអាចកើតមាន​ក្រោមភាពតានតឹងនយោបាយចុងក្រោយរបស់ប្រទេស អាចនឹង​ប៉ះពាល់ធ្ងន់ធ្ងរដល់សេដ្ឋកិច្ច ដែលប្រឈមមុខនឹងបញ្ហា​ជាច្រើនរួចស្រាប់ហើយ ជាពិសេសក្នុងបរិបទពន្ធគយរបស់ប្រធានាធិបតីអាមេរិក ដូណាល់ ត្រាំ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ការព្រមាននេះ ធ្វើឡើងក្រោយសម្ព័ន្ធនយោបាយនៃរដ្ឋាភិបាលចម្រុះថៃបាន​បែកបាក់គ្នា​ ដោយ​គណបក្ស​​ Bhumjaithai​ ​​របស់​ លោក Anutin Charnvirakul ​ដែល​កំពុង​ដឹកនាំ​​​កាន់​កាប់​ក្រសួងមហាផ្ទៃ​របស់​ថៃ កាលពីល្ងាច​ថ្ងៃ​ពុធ​នេះ​ បាន​ប្រកាស​ដកខ្លួន​ចេញ​ពីរដ្ឋាភិបាល​ចម្រុះ​ដឹកនាំ​ដោយ​គណបក្ស​ភឿថៃ ដែ​ល​មាន​លោកស្រី ផែថងថាន ស៊ីណាវ៉ាត្រ ជានាយករដ្ឋមន្ត្រី។ ការណ៍នេះកើតឡើងក្រោយមាន​ការបែកធ្លាយ​សារសំឡេង​សន្ទនា​​​រវាងលោកស្រី ផែថងថាន និង ​សម្តេច​ ហ៊ុន សែន ប្រធានព្រឹទ្ធសភា​កម្ពុជា ពាក់ព័ន្ធនឹង​ភាពតានតឹងព្រំដែនកម្ពុជា-ថៃ ដែលបង្កការរិះគន់យ៉ាងចាស់ដៃលើនាយករដ្ឋមន្រ្តីថៃ រួមទាំងទាមទារឱ្យលោកស្រីរំលាយសភា និងចុះចេញពីតំណែង។

ក្រោយភាពតានតឹងនយោបាយក្នុងស្រុកបែបនេះ សេដ្ឋវិទូជាន់ខ្ពស់នៃមជ្ឈមណ្ឌលស៊ើបការណ៍សម្ងាត់សេដ្ឋកិច្ចរបស់ធនាគារ Siam Commercial Bank (SCB EIC) លោក Poonyawat Sreesing បាននិយាយថា សេដ្ឋកិច្ចថៃត្រូវបានរងសម្ពាធដោយភាពមិនច្បាស់លាស់ខាងនយោបាយមួយរយៈមកហើយ ប៉ុន្តែមិនអាចទប់ទល់នឹង​ការធ្លាក់ចុះធ្ងន់ធ្ងរ ពីការរំលាយសភា​ម្ដងទៀតនោះទេ។

លោកបានប្រាប់កាសែតបាងកកប៉ុស្តិ៍ថា «ខ្ញុំគិតថាយើងត្រូវរង់ចាំមើលរូបភាពកាន់តែច្បាស់អំពីការរុះរើគណៈរដ្ឋមន្ត្រី» ប៉ុន្តែលោក​​ក៏​ចង់បានការសម្របសម្រួលគ្នា​ក្នុងចំណោមអ្នកនយោបាយថៃផងដែរ។ លោក​បន្ថែមយ៉ាងដូច្នេះថា៖ «ខ្ញុំជឿថាគ្មាននរណាម្នាក់ចង់ឃើញការផ្លាស់ប្តូរដ៏សំខាន់ [នៅក្នុងនយោបាយ] ​ចំពេលដែលសេដ្ឋកិច្ចមានភាពផុយស្រួយ ហើយគ្មាន​អ្វីការពារដូចនៅអំឡុងវិបត្តិកូវីដ និងពេលបោះឆ្នោតថ្មីនោះទេ»។ ​

លោកបន្តថា ប្រសិនបើមានការផ្លាស់ប្ដូរគណៈរដ្ឋមន្រ្តី​ គោលនយោបាយសំខាន់ៗរបស់រដ្ឋាភិបាលគួរតែត្រូវបានរក្សា ដើម្បីគាំទ្រដល់សេដ្ឋកិច្ចដែលធ្លាក់ចុះ។

ចំណែកឯប្រធានសេដ្ឋវិទូនៅ SCB EIC លោក Yunyong Thaicharoen ​បាននិយាយថា ការរុះរើគណៈរដ្ឋមន្ត្រី គួរតែកើតឡើង​យ៉ាងឆាប់រហ័ស ដើម្បីកំណត់គ្រោះថ្នាក់ដល់សេដ្ឋកិច្ច ដោយថា «​អស្ថិរភាព​នយោបាយ​ធ្វើឱ្យប៉ះពាល់ដល់ទំនុកចិត្ត​»។

នាយកគ្រប់គ្រងក្រុមហ៊ុនចែកចាយផលិតផល IT SIS Distribution (Thailand) Plc លោក Somchai Sittichaisrichart បាននិយាយថា អស្ថិរភាពនយោបាយនឹងប៉ះពាល់យ៉ាងធ្ងន់ធ្ងរដល់ស្ថានភាពសេដ្ឋកិច្ចដែលផុយស្រួយរួចទៅហើយរបស់ប្រទេសថៃ រួមទាំងបំណុលគ្រួសារ ការនាំចេញទៅកាន់សហរដ្ឋអាមេរិក និងវិស័យទេសចរណ៍ ជាពិសេសពីទីផ្សារ​ចិន។

លោកបានមានប្រសាសន៍ថា កត្តាទាំងនេះអាចបណ្តាលឱ្យមានកំណើនផលិតផលក្នុងស្រុកសរុប GDP ធ្លាក់ដល់សូន្យ ឬ​ល្អបំផុត កើនឡើងត្រឹម ១ ភាគរយនៅឆ្នាំនេះ ខណៈ​វាធ្វើឱ្យមានការព្រួយបារម្ភអំពីសន្តិសុខជាតិកាន់តែខ្លាំងពីការគំរាមកំហែង​ខាងក្រៅផ្សេងៗ។

ជុំវិញបញ្ហា​នេះផងដែរ សហព័ន្ធឧស្សាហកម្មថៃ (FTI) បាននិយាយថា ​ខ្លួន​នឹង​គ្មាន​ការភ្ញាក់ផ្អើលទេ ប្រសិនបើរដ្ឋាភិបាលបន្តរុះរើគណៈរដ្ឋមន្ត្រី ប៉ុន្តែ​បានសង្កត់ធ្ងន់ថា ​ស្ថិរភាពនយោបាយថៃ គឺចាំបាច់ណាស់ដើម្បីជំរុញសេដ្ឋកិច្ច។

គួរគូសបញ្ជាក់ថា សេដ្ឋកិច្ចថៃបាន​ប្រឈមមុខនឹង​បញ្ហា​ផ្សេងៗរួចហើយ រួមទាំងបំណុលគ្រួសារខ្ពស់ ការធ្លាក់ចុះផលិតកម្ម និងកម្សោយតម្រូវការ ការធ្លាក់ចុះនៃវិស័យទេសចរណ៍ និងហានិភ័យពន្ធអាមេរិកសម្រាប់ការនាំចេញជាដើម​។ កន្លងមក សេដ្ឋវិទូព្រមានថា ការបន្តនៃអស្ថិរភាពនយោបាយរបស់ថៃ អាច​រំខានដល់ទំនុកចិត្តរបស់វិនិយោគិន ដែលប៉ះពាល់ដល់ការបោះទុនថ្មីៗសម្រាប់អាជីវកម្ម៕