តម្លៃប្រេងអន្តរជាតិធ្លាក់ចុះ​គំហុក​ម្សិលមិញ និងថ្ងៃនេះ ដោយ​សញ្ញាបន្ធូរកម្ដៅនៃជម្លោះអ៊ីរ៉ង់​

តម្លៃប្រេងអន្តរជាតិបាន​ធ្លាក់ចុះជាគំហុកពេលបញ្ចប់ការជួញដូរម្សិលមិញ និងបន្តធ្លាក់ចុះខ្លាំងទៀតនៅព្រឹកថ្ងៃអង្គារនេះ ក្រោយប្រធានាធិបតីអាមេរិក លោក ដូណាល់ ត្រាំ អះអាងថា អ៊ីរ៉ង់ និងអ៊ីស្រាអែល​សម្រេច​បានកិច្ចព្រមព្រៀងបទឈប់បាញ់ ដែលជួញបន្ធូរបន្ថយក្ដីបារម្ភជុំវិញការរំខានផ្នែកផ្គត់ផ្គង់ប្រេងពីមជ្ឈិមបូព៌ា។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ តម្លៃប្រេងឆៅនាពេលអនាគត ម៉ាក Brent បាន​ធ្លាក់ចុះ ៧,២ ភាគរយ ដោយ​បញ្ចប់ការជួញដូរថ្ងៃចន្ទ នៅត្រឹម ៧១,៤៨ ដុល្លារ/បារ៉ែល ខណៈតម្លៃប្រេងអាមេរិក ម៉ាក West Texas Intermediate វិញ បាន​ធ្លាក់ចុះ ៧,២ ភាគរយដូចគ្នា មកត្រឹម ៦៨,៥១ ដុល្លារ/បារ៉ែល។ តម្លៃប្រេងទាំង២ បាន​កើនខ្លាំងបំផុតដល់កម្រិតខ្ពស់បំផុតរាប់តាំងពីខែមករា អំឡុងពេលការជួញដូរនៅព្រឹកថ្ងៃចន្ទ លើទីផ្សារអាស៊ី។ ​

តម្លៃប្រេងសំខាន់ៗទាំង២ បាន​បន្តធ្លាក់ចុះនៅព្រឹកថ្ងៃអង្គារនេះ ទៀត ដោយ Brent ជួញដូរនៅតម្លៃ ៦៩,៥២ ដុល្លារ/បារ៉ែល ធ្លាក់ចុះ ២,៧៤ ភាគរយ ខណៈប្រេង WTI ជួញដូរនៅតម្លៃ ៦៦,៥០ ដុល្លារ/បារ៉ែល ធ្លាក់ចុះ ២,៩៣ ភាគរយ គិតត្រឹមម៉ោង ១០ ព្រឹកនៅទីក្រុងហុងកុង។ ​

ការធ្លាក់ចុះនៅថ្ងៃចន្ទ ​កើតឡើងក្រោយអ៊ីរ៉ង់វាយប្រហារតាមអាកាសលើមូលដ្ឋានទ័ពអាមេរិកនៅប្រទេស​កាតា ប៉ុន្តែត្រូវបាន​គេមើលឃើញថា ធ្វើឡើងក្នុងលក្ខណៈបន្ថូរបន្ថយភាពតានតឹង ព្រោះអ៊ីរ៉ង់បាន​បញ្ជូនដំណឹងតាមបណ្ដាញការទូតទៅសហរដ្ឋអាមេរិកជាមុន ខណៈលោក ត្រាំ ហៅការវាយប្រហារអ៊ីរ៉ង់ ថា «ខ្សោយខ្លាំង»។

ហើយការបន្តធ្លាក់ចុះនៅថ្ងៃអង្គារនេះ ជំរុញដោយការអះអាងរបស់ ត្រាំ ដែលថា អ៊ីរ៉ង់ និងអ៊ីស្រាអែល បាន​​ព្រមព្រៀងគ្នាលើ «បទឈប់បាញ់ទាំងស្រុង»។ យ៉ាងណាមិញ ៤ ទៀបភ្លឺនៅក្រុងតេអេរ៉ង់ ​(ជាងម៉ោង ៦ ព្រឹកនៅកម្ពុជា) រដ្ឋមន្ត្រីការបរទេសអ៊ីរ៉ង់បាននិយាយថា «មិនទាន់មាន​ការព្រមព្រៀង​បទ​ឈប់​បាញ់ណាមួយ សម្រេចបាន​នៅឡើយ​ទេ»។ ប៉ុន្តែថា ​អ៊ីរ៉ង់នឹងបញ្ឈប់ការវាយប្រហាររបស់ខ្លួន ប្រសិន​បើ​អ៊ីស្រាអែលបញ្ឈប់ការវាយប្រហារ​។ អ៊ីស្រាអែល​មិន​បាន​ទទួល​ស្គាល់​បទ​ឈប់​បាញ់​ភ្លាមៗ​ទេ ប៉ុន្តែ​មក​ទល់​ពេលនេះ (ម៉ោង ៩ ព្រឹកនៅកម្ពុជា) គេមិនឃើញមាន​ការវាយប្រហារថ្មីណាមួយពីអ៊ីស្រាអែលទេ។

ក្នុងបរិបទបែបនេះ អ្នកវិភាគលើកឡើងពីសញ្ញានៃការបន្ធូរបន្ថយនៃភាពតានតឹង ដែលធ្វើឱ្យ​តម្លៃប្រេងធ្លាក់ចុះ ខណៈប៉ុន្មានថ្ងៃចុងក្រោយ តម្លៃប្រេងហក់ឡើង ជាពិសេសក្នុងក្ដីបារម្ភដែលថា ច្រកសមុទ្រ Hormuz ដែលរួមចំណែកដល់ការដឹកជញ្ជូនប្រេង ១/៥ នៃការផ្គត់ផ្កង់សកល អាច​ត្រូវបាន​បិទ៕