នាយករដ្ឋមន្ត្រីជំរុញឱ្យ SME បង្កើនសមត្ថភាពអាជីវកម្ម

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានជំរុញឱ្យសហគ្រាសធុនមីក្រូ តូច និងមធ្យម (SME) បង្កើនសមត្ថភាពអភិវឌ្ឍអាជីវកម្មជាប្រចាំ ដើម្បីទទួលបានទំនុកចិត្ត​ពីអតិ​ថិជន និងអាចបន្តប្រកួតប្រជែងក្នុងសង្វៀនធុរកិច្ច ពាណិជ្ជកម្ម និងវិនិយោគ ក្នុងសម័យ​បច្ចេក​វិទ្យា។

សម្ដេច ហ៊ុន ម៉ាណែត បានលើកឡើងតាមរយៈសាលិខិតប្រារព្ធទិវាជាតិ សហគ្រាសធុនមីក្រូ តូច និងមធ្យម លើកទី២ នៅថ្ងៃទី ២៧ ខែមិថុនា ឆ្នាំ ២០២៥។

ទិវាជាតិសហគ្រាសធុនមីក្រូ តូច និងមធ្យម លើកទី២ ឆ្នាំ ២០២៥ រៀបចំឡើងក្រោមប្រធានបទ «ការត្រៀមលក្ខណៈរបស់សហគ្រាសធុនមីក្រូ តូច និងមធ្យម​សម្រាប់ការចាកចេញពីប្រទេស ដែល​​មានការអភិវឌ្ឍតិចតួច»។

សម្ដេចធិបតី ហ៊ុន ម៉ាណែត បានបន្តថា ការប្រារព្ធទិវានេះជាលើកទី២បានបញ្ជាក់ជាថ្មី អំពីការ​ប្ដេជ្ញាគាំទ្រដល់វិស័យ SMEs ដែលជាកម្លាំងចលករអូសទាញកម្លាំងសេដ្ឋកិច្ច និងការ​អភិវឌ្ឍ​សង្គម។

សហគ្រាសធុនមីក្រូ តូច និងមធ្យម បានរួមចំណែកដល់​សកម្មភាពសេដ្ឋកិច្ចគ្រប់ប្រភេទ បង្កើតការងារ ផ្ដល់មុខរបរ បង្កើនប្រាក់ចំណូល និងកាត់បន្ថយចំណាកស្រុក។

សមិទ្ធផល និងវឌ្ឍនភាពផ្នែកសង្គមសេដ្ឋកិច្ចដែល​កម្ពុជាសម្រេចបានក្នុង​ពេលជាង២​ទសវត្សរ៍​នេះ បានបង្កើតនូវមោទនភាពជាតិថ្មីមួយទៀត នោះគឺការឈានឆ្ពោះទៅចាកចេញពីឋានៈ​ប្រ​ទេស​​មានការអភិវឌ្ឍ តិចតួចនៅចុងឆ្នាំ២០២៩។

សម្ដេចធិបតី ហ៊ុន ម៉ាណែតយល់ឃើញថា៖ «សហគ្រាសធុនមីក្រូ តូច និងមធ្យម បានរួម​ចំណែក​យ៉ាងសកម្ម ហើយនឹងត្រូវមានតួនាទីធំធេង និងគន្លឹះក្នុងដំណើរ​ឆ្ពោះទៅ​គោល​ដៅ​​នេះ។ លក្ខខណ្ឌពាណិជ្ជកម្ម ជំនួយអភិវឌ្ឍន៍ផ្លូវការ និងភាពអនុគ្រោះ​ដែលបណ្តា​ប្រទេស​ជា​មិត្ត​ និងដៃគូអភិវឌ្ឍបានផ្តល់ជូនកម្ពុជា នឹងមានការប្រែប្រួល ហើយកាន់​តែតឹងរឹងជាងមុន។ ប្រ​ការ​​នេះទាមទារឱ្យគ្រប់តួអង្គមិនថាវិស័យសាធារណៈ ឬវិស័យឯកជន ត្រូវបង្កើន និងពង្រឹងសមត្ថភាព មានការអភិវឌ្ឍនិងវិវត្ត​អាជីវកម្ម​ខ្លួនជាប្រចាំ ដើម្បី​ទទួល​បាន​ទំនុកចិត្តពីអតិថិជន និងអាចបន្តប្រកួតប្រជែងក្នុងសង្វៀន​ធុរកិច្ច ពាណិជ្ជកម្ម និង​វិនិយោគ»។

ស្របពេលដែលកម្ពុជា បន្តទទួលបានកំណើនការវិនិយោគផ្ទាល់ពីបរទេសខ្ពស់ ហើយកំណើនក្នុងវិស័យឧស្សាហកម្មកំពុងឈានមុខគេនឹងអាចសម្រេចបានក្នុងរង្វង់ប្រមាណ ៧,៨ ភាគរយ ក្នុងឆ្នាំ២០២៥ និន្នាការនេះបានផ្តល់នូវកាលានុវត្តភាពថ្មីៗ សម្រាប់សហគ្រាសធុនមីក្រូ តូច និងមធ្យម ក្នុងការចូលរួមពង្រីក ពិពិធកម្មសេដ្ឋកិច្ច និងផ្សារភ្ជាប់ខ្លួនទៅនឹងខ្សែច្រវាក់ផ្គត់ផ្គង់ ដែលកំពុងត្រូវការធាតុចូលពីក្នុងស្រុកកាន់តែច្រើន និងការបង្កើនតម្លៃបន្ថែមដែលកាន់តែមានសក្តា​នុពល។

ក្នុងរយៈពេលមួយឆ្នាំកន្លងទៅ វិស័យសហគ្រាសធុនមីក្រូ តូច និងមធ្យម សម្រេចបាននូវសមិទ្ធផលថ្មីៗជាច្រើន។តាមរយៈគោលនយោបាយ យុទ្ធសាស្ត្រ និងវិធានការគាំទ្រនានាដែល រាជរដ្ឋាភិបាលបានដាក់ចេញ ការទទួលបានសេវាសាធារណៈពីបណ្តាក្រសួងស្ថាប័ន មានភាពល្អប្រសើរ កាន់តែងាយស្រួល និងធ្វើឡើងតាមមធ្យោបាយឌីជីថលច្រើនឡើង។

ក្រសួងស្ថាប័ននានាកំពុងបន្តដាក់ចេញនូវវិធានការ ដើម្បីពង្រឹង និងលើកកម្ពស់សមត្ថភាពវិស័យឯកជន ការសម្រួលពាណិជ្ជកម្ម និងរកដំណោះស្រាយចំពោះបញ្ហាប្រឈមដែលនៅសេសសល់។

រាជរដ្ឋាភិបាលបានវាយតម្លៃខ្ពស់ និងប្តេជ្ញាគាំទ្រចំពោះសហគ្រាសធុនមីក្រូ តូច និងមធ្យមដែលបាន បន្តពុះពារ និងខិតខំកសាងអភិវឌ្ឍអាជីវកម្មរបស់ខ្លួន ទោះបីកំពុងស្ថិតក្នុងបរិការណ៍សេដ្ឋកិច្ចដែលមានការប្រឈម៕