សម្តេចធិបតី ហ៊ុន ម៉ាណែត បញ្ជាឱ្យមានវិធានការបន្ទាន់ដើម្បីគាំទ្រវិស័យ SME និងបើកចំហទទួលមតិយោបល់ពីប្រជាពលរដ្ឋ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ចេញនូវបទបញ្ជាឱ្យមានការរៀបចំវិធានការចាំបាច់ និងបន្ទាន់បន្ថែមទៀត ដើម្បីដោះស្រាយបញ្ហាប្រឈម និងជំរុញការអភិវឌ្ឍវិស័យសហគ្រាសធុនតូច និងមធ្យម (SME) នៅក្នុងប្រទេស ព្រមទាំងបានអំពាវនាវដល់សាធារណជន និងអ្នករកស៊ីក្នុងវិស័យនេះ ផ្តល់មតិយោបល់ដើម្បីរួមគ្នាដោះស្រាយ។

​នៅក្នុងសារបង្ហោះលើបណ្តាញសង្គមផ្លូវការនាពេលព្រឹកថ្ងៃទី១៩កក្កដា នេះ សម្តេចធិបតី ហ៊ុន ម៉ាណែត បានគូសបញ្ជាក់ថា វិស័យ SME គឺជាចលករយ៉ាងសំខាន់ក្នុងការជំរុញកំណើនសេដ្ឋកិច្ចជាតិ និងបង្កើតការងារជូនប្រជាពលរដ្ឋ។ ក្នុងដំណាក់កាលបច្ចុប្បន្ន ដែលកម្ពុជាកំពុងត្រូវការជំរុញការផលិតក្នុងស្រុកឱ្យកាន់តែច្រើនដើម្បីជំនួសការនាំចូល តួនាទីរបស់ SME គឺកាន់តែមានសារៈសំខាន់មិនអាចខ្វះបាន។

ដើម្បីឆ្លើយតបនឹងតម្រូវការជាក់ស្តែង សម្តេចនាយករដ្ឋមន្ត្រីបានសម្រេច ប្រគល់ភារកិច្ចជូន ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងនាមជាប្រធានគណៈកម្មការនយោបាយសេដ្ឋកិច្ច ដឹកនាំ រៀបចំ គិតគូរ អំពីការដាក់ចេញវិធានការចាំបាច់ និងជាបន្ទាន់មួយចំនួនបន្ថែមទៀត។

​ទន្ទឹមនឹងសមិទ្ធផលវិជ្ជមានជាច្រើនដែលរាជរដ្ឋាភិបាលអាណត្តិកន្លងមក និងនីតិកាលទី៧ សម្រេចបាន សម្តេចធិបតីក៏បានទទួលស្គាល់ត្រង់ៗថា វិស័យនេះនៅតែមានបញ្ហាប្រឈមមួយចំនួនដែលត្រូវបន្តដោះស្រាយ។​ ក្នុងស្មារតី «រួមគិត រួមធ្វើ ដើម្បីផលប្រយោជន៍រួមរបស់ប្រទេសជាតិ» សម្តេចធិបតីបានប្រកាសស្វាគមន៍យ៉ាងកក់ក្តៅចំពោះមតិយោបល់ និងការលើកឡើងពីបញ្ហាប្រឈមនានាពីសំណាក់ប្រជាពលរដ្ឋ ជាពិសេសអ្នកដែលកំពុងប្រកបរបរផ្ទាល់ក្នុងវិស័យ SME។

​រដ្ឋាភិបាលបានបញ្ជាក់ថា មតិយោបល់ទាំងនេះនឹងក្លាយជាធាតុចូលបន្ថែមយ៉ាងសំខាន់ និងជាមូលដ្ឋានដ៏មានតម្លៃក្នុងការជួយឱ្យរាជរដ្ឋាភិបាលដាក់ចេញនូវវិធានការដោះស្រាយបានកាន់តែមានប្រសិទ្ធភាព ចំគោលដៅ និងទាន់ពេលវេលាបំផុត។

​គួរបញ្ជាក់ផងដែរថា ក្នុងការដាក់ចេញគោលនយោបាយនីមួយៗនាពេលកន្លងមក រាជរដ្ឋាភិបាលកម្ពុជាតែងតែធ្វើការសិក្សាលម្អិត និងពិភាក្សាយ៉ាងជិតស្និទ្ធជាមួយតំណាង SME វិស័យឯកជន ព្រមទាំងក្រសួង-ស្ថាប័នពាក់ព័ន្ធ ដើម្បីធានាបាននូវតម្លាភាព និងភាពរីកចម្រើនប្រកបដោយចិរភាព៕