សេដ្ឋកិច្ច

ខេត្តបាត់ដំបងទទួលបានភ្ញៀវទេសចរជាង ៣៨ ម៉ឺននាក់ក្នុងរយៈពេល ៧ ខែ កន្លងមកនេះ

បានផុស

៩ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បានគូសបញ្ជាក់ឱ្យដឹងថា នៅក្នុងរយៈពេល ៧ ខែ ដើមឆ្នាំ២០២៥ ខេត្តបាត់ដំបងទទួលបានភ្ញៀវទេសចរជាតិ និងអន្តរជាតិសរុបជាង ៣៨ ម៉ឺននាក់ (៣៨៧,៩០២នាក់) ដែលបានទៅទស្សនានៅតាមទីតាំងទេសចរណ៍នានាក្នុងខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមកកាន់ «កម្ពុជាថ្មី» នៅព្រឹកថ្ងៃទី១៨ ខែសីហា ឆ្នាំ២០២៥ នេះ លោក ហម អរុណ បានឱ្យដឹងថា រយៈពេល ៧ ខែ នៃដើមឆ្នាំ២០២៥ ខេត្តបាត់ដំបងទទួលបានភ្ញៀវទេសចរជាតិ និងអន្តរជាតិសរុបជាង ៣៨ ម៉ឺននាក់ (៣៨៧,៩០២នាក់)។ ក្នុងនោះ ភ្ញៀវជាតិមានចំនួនជាង ៣៦ ម៉ឺននាក់ (៣៦៨,០២៩ នាក់) កើនឡើងជាង ២ ម៉ឺននាក់ (២៤,៨៣៣ នាក់) បើធៀបទៅនិងរយៈពេលដូចគ្នាកាលពីឆ្នាំ២០២៤។ ដោយឡែក ភ្ញៀវអន្តរជាតិ មាន ១៩,៨៧៣ នាក់ មានការកើនឡើងជាងរយៈពេលដូចគ្នាកាលពីឆ្នាំ២០២៤ ដែលមានចំនួន ១៧,៨៨២ នាក់។

ទន្ទឹមនេះ លោក ហម អរុណ ក៏បានអះអាងដែរថា ខេត្តបាត់ដំបង គឺជាខេត្តគោលដៅមួយដែលមានភាពសម្បូរបែបនៃតំបន់ដែលមានសក្ដានុពលទេសចរណ៍ ទាំងទេសចរណ៍ធម្មជាតិ កែច្នៃ វប្បធម៌ សិល្បៈ កសិ អេកូរទេសចរណ៍ ក៏ដូចជាទេសចរណ៍សាសនាចម្រុះដែលផ្តល់នូវអារម្មណ៍កម្សាន្តប្លែកៗជាច្រើនដល់ភ្ញៀវទេសចរ។

ឆ្នាំនេះ លោកសង្កេតឃើញថា ភាគច្រើនភ្ញៀវទេសចរចាប់អារម្មណ៍ខ្លាំងទៅលេងនៅស្រុកបាណន់ ដែលក្នុងនោះមានគោលដៅសំខាន់ៗដូចជា ប្រសាទបាណន់ ជើងភ្នំបាណន់ ជើងភ្នំសំពៅ ចង្អូរថ្ម ក៏ដូចជាសួនផ្កាផ្សេងៗ។ ក្រៅពីនេះ ក៏នៅមានស្រុករតនៈមណ្ឌលដែលមានគោលដៅ ដូចជា ចម្ការទុរេនអូតង ទឹកធ្លាក់ភ្នំកំពូល ស្ទឹងខ្វាក ជាដើម។

លោកថា ស្រុកសំឡូតដែលជាបេះដូងរបស់ទេសចរណ៍ធម្មជាតិរបស់ខេត្តបាត់ដំបងដែលមានភាពចម្រុះ ភាពសម្បូរបែបនៃទីតាំងទេសចរណ៍ដ៏ទាក់ទាញ ជាក់ស្តែង ដូចជា ទឹកធ្លាក់ចម្ការស្វាយ ទឹកធ្លាក់សំឡូតចាស់ ចម្ការទុរេន ស្ទឹងក្រញូង ទឹកធ្លាក់អូជាំ ព្រមទាំងទេសភាពតាមដងផ្លូវដែលបានទាក់ទាញភ្ញៀវទេសចរយ៉ាងច្រើនឱ្យទៅលេងកម្សាន្ត។ ជាពិសេស ក្នុងឆ្នាំនេះ ជាពេលវេលានៃការប្រមូលផលទុរេន ហើយការប្រមូលផលច្រើនជាងឆ្នាំមុន ដែលធ្វើឱ្យភ្ញៀវសម្រុកទៅលេងកម្សាន្តច្រើន។

បន្ថែមពីនេះ ក៏នៅមានតំបន់ឯកភ្នំ ដែលមានប្រសាទឯកភ្នំជាគោល ហើយក៏មានសិប្បកម្មដោយដៃរបស់ប្រជាពលរដ្ឋ ការផលិតសំបកណែម ការផលិតស្រាសរ តាមបែបប្រពៃណី និងការធ្វើចេក ដែលជាផ្នែកមួយក្នុងការទាក់ទាញភ្ញៀវទេសចរឱ្យទៅលេងកម្សាន្ត៕

ដោយ៖ ឌិន ថារី