ព័ត៌មានអន្ដរជាតិ

ថៃ៖ កង្វល់សុវត្ថិភាព និងកំណើនប្រាក់បាត ប៉ះពាល់់ដល់លំហូរទេសចរពីជប៉ុន

បានផុស

១០ ខែ មុន

នៅ

ថ្ងៃចន្ទ ៦ តុលា ២០២៥

ដោយ

ភាគីពាក់ព័ន្ធខាងវិស័យទេសចរណ៍ថៃ បានសម្ដែងក្ដីបារម្ភថា កង្វល់សុវត្ថិភាពលើដំណើរកម្សាន្តទៅថៃ និងកំណើនប្រាក់បាត បានប៉ះពាល់ដល់លំហូរចូលនៃភ្ញៀវទេសចរអន្តរជាតិ រួមទាំងពីប្រទេសជប៉ុន។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើនប្រាក់បាត ធៀបនឹងរូបិយប័ណ្ណនៃប្រទេសដទៃ មានន័យថា តម្លៃសេវាកម្មក្នុងវិស័យទេសចរណ៍ថៃកើនឡើង ដែលបង្កើនការចំណាយរបស់ភ្ញៀវទេសចរ ខណៈកង្វល់សុវត្ថិភាពបន្តប៉ះពាល់ដល់ទំនុកចិត្តទេសចរអន្តរជាតិ។

ប្រធានអាជ្ញាធរទេសចរណ៍ថៃ (TAT) លោកស្រី Thapanee Kiatphaibool បានលើកឡើងថា ការឡើងថ្លៃប្រាក់បាត បានក្លាយជាកត្តាដ៏ធំបំផុតមួយ ដែលរារាំងកំណើនទេសចរណ៍នៅឆ្នាំនេះ ដោយគួបផ្សំគ្នានឹងកង្វល់សុវត្ថិភាព ការប៉ះទង្គិចប្រដាប់អាវុធព្រំដែនជាមួយកម្ពុជា និងភាពមិនប្រាកដប្រជានៃសេដ្ឋកិច្ចសកល។

លោកស្រីបានបន្តថា ប្រាក់បាតបានឡើងថ្លៃ ៧ ភាគរយ ធៀបនឹងប្រាក់ដុល្លារអាមេរិក និង ៤ ភាគរយ ធៀបនឹងយន់ចិន នៅឆ្នាំនេះ។ ប្រាក់យ៉េនរបស់ជប៉ុនឯណោះវិញ បានបន្តធ្លាក់ចុះ ពី ៣,៥១ យ៉េន/បាត ក្នុងឆ្នាំ ២០១៩ ដល់ ៤,៦១ យ៉េន/បាត នៅឆ្នាំនេះ ដែលនេះបង្ហាញពីកំណើន ៣០ ភាគរយ នៃតម្លៃប្រាក់បាតធៀបនឹងយ៉េនជប៉ុន។

មន្រ្តីជំនាញថៃដដែលបានលើកឡើងថា និន្នាការកំណើនប្រាក់បាតថៃ បានជះឥទ្ធិពលលើទំនុកចិត្តទីផ្សារលើតម្លៃផលិតផល និងសេវាកម្ម ដែលទាក់ទងនឹងទេសចរណ៍នៅក្នុងប្រទេសថៃ។

ទោះជាយ៉ាងណាក៏ដោយ នាយិកាការិយាល័យប្រចាំក្រុង Osaka ជប៉ុន របស់ TAT លោកស្រី Mathurot Watanakomen បាននិយាយថា បញ្ហានេះមិនមែនជាកត្តាតែមួយ ដែលបង្កកង្វល់ក្នុងវិស័យទេសចរណ៍ថៃនោះទេ។

ក្នុងឆ្នាំ ២០១៩ ថៃទទួលភ្ញៀវទេសចរជប៉ុន ១,៧ លាននាក់ ប៉ុន្តែធ្លាក់ចុះក្រោយវិបត្តិកូវីដ១៩ ហើយស្ទុះឡើងលើស ១ លាននាក់ជាថ្មីនៅឆ្នាំមុន។ ក្រោមសន្ទុះនេះ ភ្ញៀវទេសចរពីជប៉ុនបានបន្តកើនឡើងចន្លោះពី ១៥-១៨ ភាគរយ នៅត្រីមាសទី ១ ដើមឆ្នាំ។

យ៉ាងណាមិញ សន្ទុះខ្លាំងក្លាបានចុះខ្សោយទៅវិញ ក្រោយការរញ្ជួយដីនៅថ្ងៃទី ២៨ មីនា ដែលបង្កការរលំអាគារកំពុងសាងសង់នៅកណ្ដាលក្រុងបាងកក នៅចុងខែមីនា។ ភាពអវិជ្ជមាននេះ បន្តកាន់តែខ្លាំងឡើងៗ នៅពេលដែលជម្លោះព្រំដែនកម្ពុជា-ថៃ ផ្ទុះឡើងនៅចុងខែកញ្ញា ខណៈភាពស្រពិចស្រពិលនៃសេដ្ឋកិច្ចរួមរឹតទូទាំងសកលជុំវិញពន្ធខ្ពស់របស់អាមេរិក។

គិតត្រឹមថ្ងៃទី ១៨ ខែកញ្ញា ថៃទទួលភ្ញៀវទេសចរ ៧៦៧ ៩២៣ នាក់ ដោយកើនឡើងត្រឹម ៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។ លោកស្រី Mathurot បាននិយាយថា ទីផ្សារជប៉ុនមានភាពរសើបខ្លាំងចំពោះកង្វល់សុវត្ថិភាព និងមានទំនោរប្រុងប្រយ័ត្នខ្ពស់៕