មិន​ដល់ ១០ ថ្ងៃ​ផង ខេត្តកំពង់ចាម​បិទ​ភូមិ​​អស់​ ១៩ ភូមិ ​មានពាក់ព័ន្ធអ្នក​ឆ្លង​​កូវីដ ១៩

រដ្ឋបាលខេត្តកំពង់ចាម បានសម្រេចបិទខ្ទប់ភូមិចំនួន១៩ និងឃុំចំនួន៤នៅតាមស្រុកចំនួន៤ ដើម្បីទប់ស្កាត់ការឆ្លង​រាលដាល​ជំងឺកូវីដ១៩។

យោងតាមរបាយការណ៍របស់រដ្ឋបាលខេត្តកំពង់ចាមបានឲ្យដឹងថា ចាប់ពីថ្ងៃទី២៣ខែមេសារហូតដល់ព្រឹកថ្ងៃទី០២ខែឧសភាឆ្នាំ២០២១នេះមានភូមិចំនួន១៩ហើយបានបិទខ្ទប់ជាបណ្តោះអាសន្នក្នុងនោះមានភូមិមហា ភូមិស្វាយទាប ស្ថិតនៅឃុំស្វាយទាប ស្រុកចំការលើ។ ភូមិព្រែកដំបូកក្រោម ភូមិពោធិ៍ ភូមិសន្ទៃ ភូមិច្រស់ ភូមិទ្រាភូមិកំផ្លាក់ និងភូមិមានជ័យស្រុកស្រីសន្ធរខេត្តកំពង់ចាម។

ភូមិកោះតាង៉ោល ភូមិអន្លង់គគីរ ភូមិគងជ័យនិងភូមិថ្មី(ខ) ស្រុកកងមាស។ ភូមិចុង ភូមិសង្កើបភូមិកំពង់ព្រះ ភូមិជើងឆ្នុកភូមិតាំងក្រាំងស្រុកបាធាយ។ របាយការណ៍ដដែលបានបន្តថា ក្រៅពីនេះរដ្ឋបាលខេត្តបានបិទខ្ទប់ឃុំចំនួន៤ផងដែររួមមានឃុំស្តៅ ឃុំរការអារ និងឃុំកងតាណឹង ស្រុកកងមាសនិងឃុំប្រាំយ៉ាម ស្រុកស្រីសន្ធរ។

គួរបញ្ជាក់ថាគិតត្រឹមព្រឹកថ្ងៃទី០២ខែឧសភាឆ្នាំ២០២១នេះខេត្តកំពង់ចាមមានអ្នកឆ្លងជំងឺកូវីដ១៩ក្នុងព្រឹត្តិការណ៍សហគមន៍២០កម្ភៈចំនួន៩៤នាក់ជាសះស្បើយចំនួន៣៣នាក់ស្លាប់១នាក់និងកំពុងសម្រាកព្យាបាលនៅមន្ទីរពេទ្យចំនួន៦០នាក់៕

អត្ថបទ៖ សំអឿន