ប្រុងប្រយ័ត្ន! វីរុសបំប្លែងខ្លួនឥណ្ឌា កំពុងផ្ទុះនៅវៀតណាម ឆ្លងចូលដល់ ហាណូយ និងខេត្តភាគខាងជើង

អ្នកជំនាញផ្នែករោគរាតត្បាតវៀតណាម បានរកឃើញវីរុកកូវីដ-១៩បំប្លែងខ្លួនឥណ្ឌា បន្ទាប់ពីការវិភាគសំណាករបស់អ្នកជំងឺនៅក្នុងទីក្រុងហាណូយ និងតំបន់ភាគខាងជើងមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលបានឲ្យដឹងកាលពីល្ងាចថ្ងៃអាទិត្យថា សំណាកមួយត្រូវបានយកពីរដ្ឋធានីរបស់ប្រទេសវៀតណាម ខណៈសំណាកពីរទៀតគឺមកពីខេត្ត Hung Yen និង ៥ទៀតមកពីខេត្ត Thai Binh។

លទ្ធផលនៃការធ្វើតេស្តបានបង្ហាញថា សំណាកទាំង៨ គឺមានផ្ទុកវីរុស B.1.617.2។

វីរុសបំប្លែងខ្លួននេះ ក៏ត្រូវបានគេរកឃើញផងដែរ នៅក្នុងសំណាកមួយចំនួនដែលប្រមូលបានពីអ្នកជំងឺនៅខេត្ត Hai Duong ភាគខាងជើងកាលពីថ្ងៃសុក្រ។

ក្រុមអ្នកជំនាញជឿជាក់ថា វីរុស B.1.617.2 គឺងាយឆ្លងខ្លាំងណាស់ ហើយមានភាពធន់នឹងប្រសិទ្ធភាពរបស់វ៉ាក់សាំង ទោះមិនទាន់មានទិន្នន័យច្បាស់លាស់ក៏ដោយ។

វីរុសបំប្លែងខ្លួននេះ កំពុងវាយប្រហារប្រទេសឥណ្ឌា ដែលនៅទីនោះ មានការឆ្លងរាប់ម៉ឺនករណីត្រូវបានប្រកាសជារៀងរាល់ថ្ងៃ ហើយចំនួនអ្នកស្លាប់កំពុងស្ថិតក្នុងកម្រិតប្រកាសអាសន្ន។

មកទល់បច្ចុប្បន្ន វីរុសបំប្លែងខ្លួននេះ បានរីករាលដាលដល់ប្រទេសយ៉ាងហោចណាស់១៧ហើយ។

ប្រទេសវៀតណាម បានរកឃើញវីរុសបំប្លែងខ្លួនឥណ្ឌាជាលើកដំបូងនៅថ្ងៃទី៣០ខែមេសា លើជនជាតិឥណ្ឌា៤នាក់និងជនជាតិវៀតណាមម្នាក់ នៅក្នុងខេត្ត Yen Bai ភាគខាងជើង៕

ប្រែសម្រួលដោយ៖ Vann Vann

ប្រភព៖ Tuoi Tre

ចុចអាន៖ ធ្ងន់ធ្ងរមិនធ្លាប់មាន! ២៤ម៉ោងចុងក្រោយ វៀតណាម រកឃើញអ្នកឆ្លងកូវីដខ្ពស់បំផុតបំបែកកំណត់ត្រា