ការពារខ្លួន! មួយថ្ងៃ ថៃ រកឃើញអ្នកឆ្លងកូវីដ ជាង ១៨ ០០០ករណី

ប្រទេសថៃ បានប្រកាសឲ្យក្រុមមនុស្សងាយរងគ្រោះត្រូវការពារខ្លួន ហើយឪពុកម្តាយទាំងឡាយដែលមានកូនអាយុក្រោម១ខួប ត្រូវបង្កើនការយកចិត្តទុកដាក់លើកូនៗឲ្យមែនទែន ស្របពេលការឆ្លងជំងឺកូវីដ១៩ កាន់តែធ្ងន់ធ្ងរឡើងៗ ដោយគ្រាន់តែមួយថ្ងៃអង្គារទី២៧ខែឧសភាប៉ុណ្ណឹង ប្រទេសនេះរកឃើញអ្នកឆ្លងថ្មីរហូតដល់ទៅជាង ១៨ ០០០ករណីឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានគ្រប់គ្រងជំងឺឆ្លងថៃ ហៅកាត់ DDC, នៅថ្ងៃអង្គារ មានមនុស្សឆ្លងជំងឺកូវីដ១៩ចំនួន ១៨ ០៦២នាក់ ដែលភាគច្រើនគឺឆ្លងមេរោគបំប្លែងខ្លួនប្រភេទថ្មី XEC។

បូករួមជាមួយករណីឆ្លងដ៏ច្រើននេះហើយនោះ ថៃក៏មានមនុស្សស្លាប់ចំនួន២នាក់ផងដែរ ត្រឹមមួយថ្ងៃអង្គារ ខណៈ DDC អំពាវនាវឲ្យពលរដ្ឋទៅចាក់វ៉ាក់សាំងដូសជំរុញបន្ថែមទៀត។

បើគិតទាំងការឆ្លងថ្មីនេះទៀត ធ្វើឲ្យតួលេខឆ្លងកូវីដសរុបរបស់ប្រទេសថៃ គិតចាប់ពីខែមករាឆ្នាំ២០២៥ មកទល់ពេលនេះ កើនដល់ ២៤០ ៦០៦ករណី ចំណែកមនុស្សស្លាប់មាន ៥៣នាក់៕

អត្ថបទ៖ សុខ សុវណ្ណ

ចុចអាន៖ កូវីដនៅថៃធ្ងន់ធ្ងរ! សប្តាហ៍មុនឆ្លងជាង ៦ម៉ឺនករណី និងស្លាប់ ៨នាក់ទៀត