នៅតែធ្ងន់ធ្ងរ ម៉ាឡេស៊ី បន្តមានអ្នកស្លាប់ដោយកូវីដ ខ្ទង់រយក្នុងរយៈពេល ២៤ ចុងក្រោយ

ចំនួនអ្នកស្លាប់ដោយសារជំងឺកូវីដ ១៩ នៅប្រទេសម៉ាឡេស៊ី បានកើនលើស ៣,០០០ នាក់កាលពីថ្ងៃព្រហស្បតិ៍ ខណៈប្រទេសនេះ កត់ត្រាអ្នកស្លាប់ថ្មីចំនួន ១០៣ នាក់ ក្នុងរយៈពេល ២៤ ម៉ោងចុងក្រោយនេះ ។

អគ្គនាយកសុខាភិបាលលោក Noor Hisham Abdullah បាននិយាយថា ការស្លាប់ថ្មីនេះបានធ្វើឲ្យចំនួនអ្នកស្លាប់ ពីជំងឺនេះកើនដល់ ៣,០៩៦ នាក់ ។

លោកបានបន្ថែមទៀតថា ចំនួនអ្នកជំងឺដែលកំពុងទទួលការព្យាបាល នៅបន្ទប់សង្គ្រោះបន្ទាន់ (ICU) ក៏កំពុងតែកើនឡើងផងដែរ ។ ក្នុងចំណោមអ្នកជំងឺ ៨៨០ នាក់ ដែលកំពុងត្រូវបានព្យាបាលនៅបន្ទប់ ICU ក្នុងនោះ ៤៤៦ នាក់ ត្រូវការម៉ាស៊ីនជំនួយខ្យល់ដងដង្ហើម ដើម្បីជួយឲ្យពួកគេដកដង្ហើម ។

ទន្ទឹមនោះ ប្រទេសម៉ាឡេស៊ី ក៏បានកត់ត្រាករណីឆ្លងថ្មី នៃជំងឺកូវីដ ១៩ ចំនួន ៨,២០៩ ករណី ដែលធ្វើឲ្យចំនួនករណីឆ្លងសរុប នៅក្នុងប្រទេសអាស៊ីអាគ្នេយ៍មួយនេះ កើនឡើងដល់ ៥៩៥,៣៧៤ ករណី ។

ស្របពេលជាមួយគ្នានេះ ចំនួនអ្នកជាសះស្បើយសរុប នៅក្នុងប្រទេសបានកើនឡើងដល់ ៥០៨,៩៤៧ នាក់ ក្រោយមានមនុស្ស ៧,០៤៩ នាក់ បានជាសះស្បើយក្នុងរយៈពេលមួយថ្ងៃ ។

គួរបញ្ជាក់ថា ចាប់តាំងការផ្ទុះឡើងករណីឆ្លង និងស្លាប់នាពេលថ្មីៗនេះ ប្រទេសម៉ាឡេស៊ី ក៏បានដាក់ការបិទខ្ទប់ទូទាំងប្រទេស រយៈពេល ២ សប្តាហ៍ផងដែរ ដែលបានចាប់ផ្តើមកាលពីថ្ងៃទី ១ ខែមិថុនា ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu