មានការ​ទម្លាយថា​ នាយករដ្ឋមន្ត្រី អង់គ្លេស លោក Starmer ត្រៀម​ខ្លួន​លាលែងតំណែង​

កាសែត Observer របស់អង់គ្លេស បានចុះផ្សាយថា នាយករដ្ឋមន្ត្រី លោក Keir Starmer ត្រូវបានរំពឹងថា នឹង លាលែងពីតំណែងនៅថ្ងៃចន្ទសប្តាហ៍នេះ ដោយកំណត់ពេលវេលាសម្រាប់ការចាកចេញរបស់លោក ទោះបីជាប្រភពរដ្ឋាភិបាលមួយអះអាងថា លោកនៅតែបន្តផ្តោតអារម្មណ៍លើការងារដឹកនាំប្រទេសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគំរាមកំហែងដល់តំណែងរបស់លោក Starmer ដែលបានកើតឡើងជាច្រើនខែមកហើយនោះ បានកើនឡើងយ៉ាងខ្លាំងកាលពីថ្ងៃសុក្រ នៅពេលដែលគូប្រជែងគឺលោក Andy Burnham បានឈ្នះអាសនៈក្នុងសភា ដែលអនុញ្ញាតឲ្យលោកអាចបើកការប្រកួតប្រជែងតំណែងដឹកនាំជាផ្លូវការបាន។

របាយការណ៍របស់កាសែត Observer បានឲ្យដឹងទៀតថា លោក Starmer កំពុងពិភាក្សាអំពីបញ្ហានេះជាមួយភរិយារបស់លោក នៅឯភូមិគ្រឹះ Chequers មុនពេលធ្វើការសម្រេចចិត្តចុងក្រោយ ប៉ុន្តែមន្ត្រីជាន់ខ្ពស់គណបក្សពលករ (Labour Party) រំពឹងថា នឹងមានសេចក្តីថ្លែងការណ៍ច្បាស់លាស់ អំពីអនាគតរបស់លោកយ៉ាងហោចណាស់នៅថ្ងៃចន្ទ។

ទោះជាយ៉ាងណាក៏ដោយ ប្រភពពីរដ្ឋាភិបាលបាននិយាយថា លោក Starmer នៅតែផ្តោតលើការងាររបស់ខ្លួន ហើយបានចង្អុលបង្ហាញពីសេចក្តីថ្លែងការណ៍មុនៗរបស់លោកដែលបញ្ជាក់ពីជំហរនេះ។ មេដឹកនាំអង់គ្លេសរូបនេះបានថ្លែងកាលពីថ្ងៃសុក្រថា លោកនឹងតស៊ូប្រឆាំងនឹងការប្រជែងតំណែងណាមួយ ហើយបានជម្រុញគណបក្សពលករបដិសេធការបែកបាក់ដោយសារជម្លោះផ្ទៃក្នុង។

សូមបញ្ជាក់ថា លោក Starmer បានដឹកនាំគណបក្សពលករកណ្តាលឆ្វេងនិយម ឲ្យទទួលបានជ័យជម្នះឆ្នោតយ៉ាងភ្លូកទឹកភ្លូកដីក្នុងឆ្នាំ ២០២៤ ប៉ុន្តែបច្ចុប្បន្នលោកកំពុងប្រឈមនឹងវិបត្តិនយោបាយធ្ងន់ធ្ងរ បន្ទាប់ពីជាប់ឆ្នោតបានតែប៉ុន្មានខែ ដោយសារការធ្លាក់ចុះប្រជាប្រិយភាពលឿន ដែលបណ្តាលមកពីរឿងអាស្រូវទទួលកាដូ ការ​ប្រែប្រួល​គោលនយោបាយ និងការមិនអាចដោះស្រាយវិបត្តិសេដ្ឋកិច្ចបានល្អ។ សម្ពាធនេះកាន់តែខ្លាំងឡើងជាមួយការត្រឡប់មកវិញរបស់លោក Andy Burnham ដែលអាចជាគូប្រជែងដណ្តើមតំណែង នាំឲ្យមានការពិភាក្សាអំពីការលាលែងពីតំណែង៕

អត្ថបទ ៖ សាង ស្រីល័ក្ខ