រយៈពេល ៣ ខែ កម្ពុជាមានករណីឆ្លងជំងឺអូមីក្រុងជិត ១៤ ០០០ ករណី

នៅក្នុងរយៈពេល ៣ ខែនេះ កម្ពុជាមានអ្នកឆ្លងជំងឺកូវីដ-១៩ បម្លែងខ្លួនថ្មីប្រភេទ អូមីក្រុង ប្រមាណជិត ១៤ ០០០ ករណី ក្នុងនោះមានជិត ១៣ ០០០ ករណីឆ្លងចូលសហគមន៍។

បើតាមរបាយករណ៍ប្រចាំថ្ងៃរបស់ក្រសួងសុខាភិបាលបានឱ្យដឹងថា ក្រសួងបានរកឃើញករណីមេរោគបំប្លែងថ្មីប្រភេទអូមីក្រុង ជាលើកដំបូងនៅថ្ងៃទី១៤ ខែធ្នូ ឆ្នាំ២០២១ នៅលើស្ត្រីមានផ្ទៃពោះជាជនជាតិខ្មែរ អាយុ ២៣ ឆ្នាំ នៅខេត្តស្វាយរៀង ដែលបានធ្វើដំណើរតាមជើងហោះហើរចេញពីប្រទេសហ្គាណា។

ក្រសួងបានឱ្យដឹងថា ចាប់តាំងពីថ្ងៃទី១៤ ខែធ្នូឆ្នាំ២០២១ រហូតមកដល់ថ្ងៃទី១៣ ខែមីនា ឆ្នាំ២០២២នេះ កម្ពុជាមានអ្នកឆ្លងជំងឺកូវីដ-១៩ បម្លែងខ្លួនថ្មីប្រភេទ អូមីក្រុង ចំនួន ១៣ ៦២៧ ករណី ក្នុងនោះមាន ១២ ៧០២ ករណីឆ្លងចូលក្នុងសហគមន៍ និងក្រៅពីនេះជាករណីនាំចូលមកពីបរទេស។

គួរបញ្ជាក់ថា គិតត្រឹមថ្ងៃទី១៣ ខែមីនា ឆ្នាំ២០២២ នៅកម្ពុជា មានអ្នកឆ្លងជំងឺកូវីដ-១៩ សរុប ១៣៤ ០៦៨ នាក់ ក្នុងនោះអ្នកជាសះស្បើយចំនួន ១២៨ ៩៦៨ នាក់ និងអ្នកស្លាប់សរុប ៣ ០៤៧ នាក់។ រដ្ឋាភិបាលបានជ្រើសរើសយកការចាក់វ៉ាក់សាំងកូវីដ-១៩ និងការអនុវត្តវិធានការសុខាភិបាល ៣កុំ ៣ការពារ ជាមធ្យោបាយចម្បងក្នុងការទប់ស្កាត់ និងប្រយុទ្ធប្រឆាំងជំងឺកូវីដ-១៩៕

អត្ថបទ៖ សំអឿន