តារាចម្រៀង​ ឈួន សុវណ្ណឆៃ ​តក់ស្លុតក្រោយម្តាយ​ទទួលមរណភាព

តារាចម្រៀងអ្នកនាង ឈួន សុវណ្ណឆៃ និងក្រុមគ្រួសារសាច់ញាតិទាំងមូលពេលនេះកំពុងមានទុក្ខដ៏ក្រៀមក្រំ និងសោកសៅបំផុត ខណៈអ្នកម្តាយជាទីស្រលាញ់គឺអ្នកស្រី ហួត ឡាប បានទទួលមរណភាព បន្ទាប់ពីបញ្ជូនទៅសង្គ្រោះនៅមន្ទីរពេទ្យបានមួយរយៈ។

តាមរយៈដំណឹងមរណទុក្ខនេះបានធ្វើឲ្យអ្នកគាំទ្រព្រមទាំងមិត្តភក្តិសិល្បៈជាច្រើនបានផ្ញើសារចូលរួមរំលែកទុក្ខគ្រប់ៗគ្នាព្រោះអាណិតដល់ក្រុមគ្រួសារអ្នកនាង ឈួន សុវណ្ណឆៃ ដែលធ្លាប់ជួបជុំមានភាពកក់ក្តៅ។ កន្លងមកនាង និងក្រុមគ្រួសារបានតស៊ូព្យាបាលម្តាយដើម្បីបានជាសះស្បើយប៉ុន្តែជាអកុសលជំងឺមិនអាចព្យាបាលជាសះស្បើយវិញទេ។

ដោយសារតែហេតុផលនេះហើយទើបធ្វើឲ្យអ្នកនាង ឈួន សុវណ្ណឆៃ ក្រុមគ្រួសារមានការរន្ឋត់ចិត្តចំពោះការលាចាកលោករបស់ម្តាយ ភរិយា និងជាលោកយាយជាទីស្រលាញ់ដោយក្នុងនោះមានអនុស្សាវរីយ៍ល្អៗច្រើនណាស់ដែលបន្សល់ទុកឱ្យកូនចៅមើលឃើញនឹកស្រណោះ។

នេះជាហេតុការណ៍មួយដែលបងប្អូនត្រកូលឈួនពិបាកទទួលយកណាស់បើតាមតារាចម្រៀង ឈួន ស្រីម៉ៅ ដែលរស់នៅអាមេរិកបានបង្ហោះសាថា«ស្នាមញញឹមលោកឪពុក និងអ្នកម្ដាយចំពោះកូនៗនឹងចៅៗតាំងពីលំបាករហូតមកដល់សព្វថ្ងៃនេះក៏លោកទាំងពីនៅតែរីករាយស្រលាញ់យកចិត្តទុកដាក់ជាមួយកូនៗនឹងចៅៗជានិច្ច។ កូនសូមក្រាបសំពះសុំទោសរាល់កំហុសខុសឆ្គងនឹងសូមគោរពដឹងគុនលោកទាំងពីអស់មួយជីវិត។ បើគ្មានកាតស៑ូអត់ធ្មត់ជំនះរាល់ការលំបាករបស់លោកទាំងពីទេក៏ពួកកូនៗគ្មានថ្ងៃនេះដែរ»។

ចំណែកតារាចម្រៀងចាស់វស្សាអ្នកនាង ឈួន សុវណ្ណឆៃ ក៏បានបង្ហោះសារកាន់ទុក្ខដ៏ក្រៀមក្រំក្រោយពេលអ្នកម្តាយជាទីស្រលាញ់បានចែកឋានទៅធ្វើឲ្យអ្នកគាំទ្រផ្ញើសាររំលែកទុក្ខគ្រប់ៗគ្នាផងដែរ៕

អត្ថបទ៖ ចាន់រ៉ា