ខាត់ ចំរើន ត្រូវការឈាមបន្ទាន់ ក្រោយសម្រាកនៅមន្ទីរពេទ្យជិត ១ ខែ

តារាកំប្លែង និងអ្នកចម្រៀងបុរាណលោក ខាត់ ចំរើន ប្រកាសត្រូវការឈាមបន្ទាន់ ក្រោយចូលសម្រាកនៅមន្ទីរពេទ្យកាល់ម៉ែត្រ អស់រយៈពេលជិត ១ ខែ។

​កាលពី​ថ្ងៃទី​ ៣០​ ខែសីហា ​តារា​កំប្លែង​លោក អ៊ឹម ជីវ៉ា បានធ្វើការ​ប្រកាស​ពី​ដំណឹង​នៃ​ការធ្លាក់​ខ្លួន​ឈឺ​របស់​តារា​កំប្លែង ខាត់ ចំរើន ដែល​ត្រូវការ​បាន​បញ្ចូនទៅ​សង្គ្រោះបន្ទាន់​នៅ​មន្ទីរពេទ្យ​កាល់ម៉ែ​ត្រ ដោយសារ ជំងឺ​ខូច​ក្រលៀន និង ក្រិនថ្លើម។ ដំណឹង​នេះ ​បានធ្វើ​ឲ្យ​អ្នកគាំទ្រ​ និង​មហាជន​សម្តែង​ក្តី​អាណិត​គ្រប់គ្នា​ហើយ​ថែមទាំង​ជូនពរ​ឲ្យ​តារា​កំ​ប្លែង ខាត់ ចំរើន ឆាប់​ជាសះស្បើយ​ពី​ជំងឺ​។​ ដោយ​ឡែក​បន្ទាប់ពី​ការចូល​សម្រាក​ព្យាបាល​មួយរយៈស្រាប់តែ​ពេលនេះ​ មានការ​ជូនដំណឹង​ជាថ្មី​ថា​ លោក ខាត់ ចំរើ​ន កំពុង​ត្រូវការ​ឈាម​បន្ទាន់​ដើម្បី​សង្គ្រោះ​។​

​បើតាម​ការ​ឲ្យ​ដឹង​ពី​ពិធីករ​លោក សុខ រ៉ាស៊ី បា​នបញ្ជា​ក់ថា​សូម​បងប្អូន​ជួយផ្តល់​ឈាម​ជូន​បង ខាត់ ចំរើន ផង​ពេលនេះ​គាត់​ត្រូវការ​ឈាម​បន្ទាន់​នៅ​កាល់​ម៉ែត្រ​។​ ចំណែក​លោក អ៊ឹម ជីវ៉ា បាន​និយាយ​ដែរ​ថា​ ដំណឹង​បន្ទាន់ សូម​បងប្អូន​ជួយ​តារា​កំប្លែង​លោក ខាត់ ចំរើន​ ផង​ពេលនេះ​កំពុង​សង្គ្រោះបន្ទាន់​នៅមន្ទី​រពេទ្យ​កាល់ម៉ែត្រហើយ​ត្រូវការ​ឈាម​ជាបន្ទាន់​។​

​ប្រភព​បាន​បន្ថែមទៀត​ថា បើ​បងប្អូន​ណា​អាណិត​គាត់​មេត្តា​ជួយផ្តល់​ឈាម​ឲ្យគាត់​ផង ជួយ​គ្នា​បងប្អូន​ជាពិសេស​សិល្បករ​ដូចគ្នា។ ​សូមបញ្ជាក់ថា តារា​កំប្លែង​រូបនេះ​មាន​ជំងឺ​ក្រិន​ថ្លើម។​ ជួយ​គ្នា​ក្នុង​គ្រា​មាន​អាសន្ន ​អំពើ​ល្អ​មិន​សាបសូន្យ​៕

អត្ថបទ៖ ចាន់​រ៉ា​