ជន​សង្ស័យ​ទី​៧​ ត្រូវ​បាន​ចាប់​ខ្លួន​នៅ​ចិន​ដី​គោក ​ពាក់​ព័ន្ធករណីឃាតកម្មដ៏​រន្ធត់​របស់តារាសង្គមហុងកុងនាង Abby Choi អាយុ២៨ឆ្នាំ។ ជនសង្ស័យរងការចោទ​ប្រកាន់​ថា ​រៀបចំ​ទូកដើម្បី​ជួយ​ជន​សង្ស័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត South China Morning Post (SCMP) បានរាយការណ៍ថា ជនសង្ស័យជាស្ត្រីហុងកុង ត្រូវបានប្រគល់ឲ្យប៉ូលិសហុងកុង នៅប៉ុស្តិ៍ព្រំដែននាថ្ងៃអង្គារ ទី០៧ខែមីនា។

នាង​ក៏ជា​ជន​ទី​បី​ផងដែរ ដែល​ត្រូវ​បាន​ចាប់ខ្លួន​ពី​បទ​ជួយ​ជនល្មើស​ក្នុង​ករណី​ឃាតកម្ម​ នាំឲ្យពិភពលោកភ្ញាក់ផ្អើល​កាលពី​ថ្ងៃ​ទី​២៤ កុម្ភៈ។

កាល​ពី​ថ្ងៃ​ចន្ទ លោក Lam Shun អាយុ៤១ឆ្នាំ ​ត្រូវ​បាន​ចោទ​ប្រកាន់​ពី​បទ​ល្មើស​ដូច​គ្នានេះ ប៉ុន្តែ​ទទួលការ​អនុញ្ញាត​ឲ្យ​នៅ​ក្រៅ​ឃុំ​បន្ទាប់​ពី​បង្ហាញ​ខ្លួន​ក្នុង​តុលាការ។

នៅថ្ងៃទី២៦ខែកុម្ភៈ ប៉ូលិសក៏បានចាប់ខ្លួនស្ត្រីម៉ាស្សាអាយុ៤៧ឆ្នាំម្នាក់ផងដែរ ពីបទជួលផ្ទះល្វែងមួយនៅ West Kowloon ជាជម្រកបណ្តោះអាសន្នសម្រាប់អតីតស្វាមីរបស់ Choi ដើម្បីគេចពីមន្ត្រីច្បាប់។

គួរបញ្ជាក់ថា Choi ត្រូវ​បាន​សម្លាប់និងពុះច្រៀកសាកសពក្នុងផ្ទះនៅតំបន់​ Tai Po កាល​ពី​ថ្ងៃ​ទី ២៤ ខែ​កុម្ភៈ។

ការធ្វើតេស្ត DNA បានបញ្ជាក់ថា លលាដ៍ក្បាលនៅក្នុងឆ្នាំងស៊ុប និងជើងទាំងសងខាង ដែលរកឃើញនៅក្នុងទូទឹកកកក្នុងផ្ទះនេះ គឺជារបស់នាង។ យ៉ាងណាក្តី ដងខ្លួន និងដៃរបស់នាងមិនទាន់រកឃើញទេ៕

ប្រែសម្រួល៖ Vann Vann

ប្រភព៖ The Star

ចុចអាន៖ ប៉ូលិសរកឃើញ ក្បាលនិងឆ្អឹងជំនីរ តារាស្រីហុងកុង នៅក្នុងឆ្នាំងស៊ុប