តារា K-Pop ៣ រូប ត្រូវអញ្ជើញឱ្យចូលរួមក្នុងមហោស្រពភាពយន្ត Cannes ឆ្នាំ ២០២៣

មហោស្រពភាពយន្តអន្តរជាតិទីក្រុង Cannes តែងតែជាព្រឹត្តិការណ៍មួយដែលអ្នកស្នេហាភាពយន្តជុំវិញពិភពលោកទន្ទឹងរង់ចាំ ក្នុងប៉ុន្មានឆ្នាំថ្មីៗនេះ មហោស្រពនេះបានប្រមូលផ្តុំតារាអាស៊ីជាច្រើន រួមទាំងតារាកូរ៉េផងដែរ។ ពិសេសឆ្នាំនេះតារា K-Pop ៣ដួង ត្រូវបានអញ្ជើញចូលរួមមហោស្រពភាពយន្តដែលធ្វើឲ្យអ្នកគាំទ្ររំភើបចិត្តជាខ្លាំង។

ខាងក្រោមនេះគឺជាតារា K-Pop ៣រូបដែលទំនងនឹងបង្ហាញខ្លួនក្នុងមហោស្រពភាពយន្ត Cannes លើកទី ៧៦ ខាងមុខ៖

១. Jennie សមាជិកក្រុម BLACKPINK

Jennie បានទទួលការអញ្ជើញពីមហោស្រពភាពយន្ត Cannes ក្នុងនាមជាតារាសម្តែងដោយនាងចូលរួមសម្តែងក្នុងស៊េរីរឿងThe Idol ។ នេះអាចចាត់ទុកថាជារឿងធំមួយក្នុងអាជីពសម្ដែងរបស់តារាស្រីរូបនេះ ដូច្នេះហើយពេលនេះអ្នកគាំទ្រពិតជារំភើបចិត្តជាខ្លាំង និងទន្ទឹងរង់ចាំការបង្ហាញខ្លួនរបស់ Jennie នៅក្នុងមហោស្រពភាពយន្តដ៏ល្បីមួយនេះ។ យ៉ាង​ណាក៏ដោយ ខាងផលិតកម្មគ្រប់គ្រងមិនទាន់ធ្វើអត្ថាធិប្បាយថាតើតារាស្រីរូបនេះនឹងចូលរួមមហោស្រពភាពយន្តឆ្នាំនេះឬយ៉ាងណានោះទេ ។

២. Krystal សមាជិកក្រុម f(x)

Krystal ជាតួសម្តែងក្នុងរឿង Spider House ក៏ត្រូវបានអញ្ជើញឱ្យចូលរួមក្នុងមហោស្រពភាពយន្ត Cannes ផងដែរ។ នេះក៏មានន័យថា Krystal ដែលជាសមាជិកក្រុម f(x) ក៏ទំនងជានឹងបង្ហាញខ្លួនក្នុងមហោស្រពភាពយន្តអន្តរជាតិនេះ។ ដូច Jennie ដែរ Krystal មិនទាន់ឆ្លើយថានាងនឹងចូលរួមក្នុងមហោស្រពភាពយន្ត Cannes ឬអត់។

៣.តារាចម្រៀង Bibi

តារា K-Pop ទីបីដែលទំនងនឹងបង្ហាញខ្លួនលើកម្រាលព្រំក្រហមទីក្រុង Cannes ឆ្នាំនេះគឺតារាចម្រៀង Bibi។ នាងត្រូវបានគេអញ្ជើញបន្ទាប់ពីសម្ដែងក្នុងរឿង Hwaran ជាមួយតារាសម្ដែងដ៏ល្បី Song Joong Ki។ ភ្លាមៗបន្ទាប់ពីទទួលបានការអញ្ជើញ ខាងផលិតកម្មគ្រប់គ្រងរបស់ Bibi បានថ្លែងអំណរគុណដល់អ្នករៀបចំកម្មវិធីបានអញ្ជើញឱ្យចូលរួមក្នុងមហោស្រពភាពយន្ត Cannes សម្រាប់ឆ្នាំនេះ ។

យ៉ាងណាមិញ ក្រៅពីតារាភាពយន្តកូរ៉េ តារា K-Pop ទាំង ៣ រូបខាងលើនេះក៏បានទទួលការអញ្ជើញចូលរួមមហោស្រពភាពយន្ត Cannes បន្ទាប់ពីបានចូលរួមក្នុងគម្រោងភាពយន្តធំៗ ៕

ប្រែសម្រួល៖នាងតូច

ចុចអាន៖ក្រោយបែកគ្នា Dawn សារភាពថា លោកនៅតែស្រលាញ់ HyunA