ម្ចាស់បទ​ “ផ្លូវណាទៅផ្ទះម៉ែក្មេក” ថាន់ នឿថង រកឃើញទ្រនំថ្មី

កញ្ញា ថាន់ នឿថង ដែលគេស្គាល់ថាជាម្ចាស់បទ “ផ្លូវណាទៅផ្ទះម៉ែក្មេក” ក្រោយសាងប្រជាប្រិយភាព និងកេរ្តិ៍ឈ្មោះល្បីលើវិថីសិល្ប:មួយរយ:មកនោះ ពេលនេះនាងបានទម្លាយប្រាប់ឲ្យដឹងថា ខ្លួនរកបានទ្រនំថ្មីដែលក្លាយជាតារាចម្រៀងមានឈ្មោះនៅក្នុងផលិតកម្មផ្លូវការហើយ។

បើតាមការកត់​សម្គាល់​តារាចម្រៀងស្រីវ័យ២១ឆ្នាំមានស្រុកកំណើត ស្រុកភ្នំព្រឹក ខេត្តបាត់ដំបង កញ្ញា ថាន់ នឿថង កន្លងមកក៏​ធ្លាប់​​ទទួល​បាន​នូវ​កាគាំទ្រ​ខ្លាំង​នាពេល​បក​ស្រាយ​​​​​ចម្រៀង​មនោសញ្ចេតនា​យ៉ាង​ពិរោះក្រអួនក្រអៅ​​មាន​ចំណង​ជើង​ថា «វិហារ​សួគ៌​ជ័យ» ក្នុង​កម្មវិធី​ចម្រៀង​គ្រួសារ​ខ្មែរ​។

ទាក់ទងនឹងការចូលផលិតកម្មថ្មីតារាស្រី ថាន់ នឿថងបានប្រាប់ឲ្យដឹងដោយអារម្មណ៍សប្បាយចិត្តថា នាងសូមអរគុណដល់ផលិតកម្មថោន (Town Production )ដែលបានផ្ដល់ទ្រនំថ្មីមកកាន់នាង ជាពិសេស អគុណដល់បងៗក្រុមការងារដែលបានផ្ដល់ដំបូរមានថ្មីៗមកកាន់ប្អូនហើយបានខិតខំផលិតនូវវីដេអូចម្រៀងមួយបទ (មិនបានជួបរាល់ថ្ងៃ តែស្រលាញ់រាល់ថ្ងៃ )។

តារាចម្រៀងអ្នកនាង ថាន់ នឿថង បានប្រាប់បន្ថែមថា បទចម្រៀងរបស់នាងត្រៀមនឹងចេញនាពេលឆាប់ៗខាងមុខនេះ។នាងថាបទនេះបានខិតខំយ៉ាងយកចិត្តទុកដាក់អស់ពីកម្លាំងកាយចិត្តហើយនាងក៏សង្ឃឹមថា បងប្អូននឹងនៅតែជួយបន្តគាំទ្របទចម្រៀងរបស់នាងនៅក្នុងផលិតកម្មថោននាពេលខាងមុខនេះផងដែរ។

កញ្ញា ថាន់ នឿថង​ ពេលនេះកាន់តែ​លំនឹង​​​លើ​​វិថី​សិល្បៈ​ ខណៈ​នាងក៏ជា​តារា​ចម្រៀង​​​ស្រី​វ័យ​ក្មេង​ដែល​​មហាជន​ចាប់​អារម្មណ៍​ និង​ទទួល​​ស្គាល់​អំពី​ទឹក​ដម​សំនៀង​រួច​មក​ហើយ​នា​ពេល​​​​ប្រឡង​ចម្រៀង​លំដាប់​ពិភព​លោកគឺ​កម្មវិធី​X Factor Cambodiaរដូវ​កាល​ទី​១កាល​​ពី​​ឆ្នាំ​២០១៩កន្លង​មក​៕

អត្ថបទ៖ ចាន់រ៉ា