ជីវិតកម្សាន្ដ

គួច ខេវិន ពន្លះមិនសំចៃមាត់ចំពោះបុគ្គលដើម្បីតែលាភសក្ការៈ ហ៊ានក្លែងអត្តសញ្ញាណ ឥតអៀនខ្មាស

បានផុស

៣ years មុន

នៅ

ថ្ងៃអាទិត្យ ១៧ កញ្ញា ២០២៣

ដោយ

ផលិតករកម្មវិធីកម្សាន្តលោក គួច ខេវិន បានចេញមកពន្លះដោយមិនសំចៃមាត់ចំពោះបុគ្គលដើម្បី តែផលប្រយោជន៍ និងលាភសក្ការៈ ហ៊ានក្លែងអត្តសញ្ញាណកុហកខ្លួនឯង កុហកពូជពង្សវង្សត្រកូលឯង ឥតអៀនខ្មាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គួច ខេវិន បានលើកឡើងដោយសង្កត់ធ្ងន់ថា «មានអ្នកខ្លះប្រឌិតរឿងកែប្រវត្តិតាំងខ្លួនជាកូនអធិរាជសំឡេងមាស ជាកូនអ្នកនិពន្ធ ជាកូនថៅកែផលិតកម្ម ដើម្បីតែប្រយោជន៍គ្មានភាពអៀនខ្មាសក្នុងនាមជាមនុស្សសូម្បីតែបន្តិច ទោះជាប់ឈ្មោះជាចោរលួចកេរ្តិ៍របស់គេក៏ដោយ»។

ផលិតករល្បីឈ្មោះលោក គួច ខេវិន ក៏បានបង្ហាញទស្សនៈថា «សព្វថ្ងៃមនុស្សដែលគ្មានសតិសម្បជញ្ញៈមួយចំនួនរមែងប្រមូលឱបក្រសោបសម្បត្តិអ្នកដទៃទាំងរូបិយ និងអរូបិយ មកធ្វើជាកម្មសិទ្ធិរបស់ខ្លួន ដោយឥតអៀនខ្មាស ដើម្បីតែផលប្រយោជន៍ និងលាភសក្ការៈ ទោះជាអំពើថោកទាបយ៉ាងណាក៏ហ៊ានធ្វើ។ សម័យ Degital អ្នកណាស្រវាចាប់អ្វីមួយមកក្តាប់ក្នុងដៃហើយ ច្នៃដាក់ចូលទៅក្នុងកម្មវិធីផ្សេងៗ ឲ្យបានមុនគេ នោះអ្នកហ្នឹងក៏ក្លាយជាម្ចាស់កម្មសិទ្ធិ នៃការចែកចាយ ទោះជាលួចគេក៏ដោយ»។

លោកបន្តទៀតថា «តួយ៉ាងដូចជាបទចម្រៀងជាច្រើនដែលកប់បាត់មិនសូវមានអ្នកនឹកនា លុះដល់ពេលដែលមានគេគាស់កកាយយកមកបញ្ចូលរូបភាព បន្ថែមតន្ត្រីឲ្យកាន់តែល្អ រួចដាក់ចូលទៅក្នុងប្រព័ន្ធផ្សព្វផ្សាយ ក៏ស្រាប់តែមានការទាស់ទែងខ្វែងយោបល់គ្នាថាជាកេរ្តិ៍មរតក ជាកម្មសិទ្ធិរបស់ខ្លួន រវាងចោរ និងម្ចាស់។ តើអ្នកទាំងនោះបានអនុលោមទៅតាមច្បាប់រក្សាសិទ្ធិរួចហើយឬនៅ នាគ្រាកន្លងមក?»។

លោក គួច ខេវិន និយាយបន្តថា «ក៏មានអ្នកខ្លះហ៊ានរហូតដល់ទៅក្លែងអត្តសញ្ញាណរបស់ខ្លួន កុហកខ្លួនឯង កុហកពូជពង្សវង្សត្រកូលឯង កុហកអ្នកដែលស្លាប់ទៅហើយ ប្រឌិតរឿងកែប្រវត្តិ តាំងខ្លួនជាកូនអធិរាជសំឡេងមាស ជាកូនអ្នកនិពន្ធ ជាកូនថៅកែផលិតកម្ម ដើម្បីតែប្រយោជន៍ គ្មានភាពអៀនខ្មាសក្នុងនាមជាមនុស្សសូម្បីតែបន្តិច ទោះជាប់ឈ្មោះជាចោរលួចកេរ្តិ៍របស់គេក៏ដោយ។ ពពួកមនុស្សអស់ទាំងនោះយល់អាក្រក់ថាល្អ យល់សថា…ខ្មៅ យល់ត្រូវថាខុស យល់ទោសថាគុណ យល់បុណ្យថាបាប ធ្វើឲ្យសង្គមច្របូកច្របល់ មិនដឹងនរណាជានរណា? បើអាចកែបានកែទៅ!»។

លោកបន្ថែមថា ពេលនេះ លោកសូមរំលឹកឡើងវិញនូវកម្រងបទចម្រៀងដ៏ពីរោះរណ្ដំដែលបានផលិតកាលពី ២៣ ឆ្នាំ កន្លងទៅ “ឱ ភ្នំពេញអើយ” ច្រៀង និងសំដែងដោយកំពូលតារាចម្រៀងអ្នកនាង ម៉េង កែវពេជ្ជតា ផលិតក្នុងឆ្នាំ ២០០១..! ទំនុកច្រៀងនេះក៏មានការទាស់ទែងខ្វែងយោបល់គ្នាថាជាកេរ្តិ៍មរតក ជាកម្មសិទ្ធិរបស់ខ្លួន រវាងចោរ និងម្ចាស់ផងដែរ៕

អត្ថបទ ៖ ចាន់រ៉ា