គួច ខេវិន សុំឱ្យខ្មែរគ្រប់និន្នាការនយោបាយ រួមត្គ្នាជាធ្លុងមួយ ការពារផលប្រយោជន៍ជាតិពីការឈ្លានពាន

អតីតអ្នកផលិតកម្មវិធីកម្សាន្តលោក គួច ខេវិន ចេញមុខទទូចស្នើសុំដោយចង់ឃើញខ្មែរគ្រប់និន្នាការនយោបាយទាំងអស់រួមគ្នាជាធ្លុងមួយត្របាញ់ចូលគ្នាជាធ្លុងមួយ ដើម្បីផលប្រយោជន៍ជាតិកំចាត់ខ្មាំងសត្រូវដែលឈ្លានពានទឹកដី។

តាមរយ:ការបង្ហោះសំណេរភ្ជាប់នឹងសុភាសិតថ្មីៗកន្លងទៅនេះ លោក គួច ខេវិន ដែលជាអ្នកផលិតកម្មវិធីទូរទស្សន៍បានលើកឡើងថា “ចង្កឹះមួយដើមគេអាចកាច់បាក់ ចង្កឹះមួយបាច់គេមិនអាចកាច់បាក់បានឡើយ។ យ៉ាងណាមិញជនជាតិខ្មែរម្នាក់ គេអាចបំបាក់បាន ប៉ុន្តែបើខ្មែរទាំងអស់រួបរួមគ្នាជាធ្លុងមួយទាំងខ្មែរនៅក្នុង និងក្រៅប្រទេស គ្រប់និន្នាការនយោបាយរួមត្របាញ់ចូលគ្នាជាធ្លុងមួយដើម្បីផលប្រយោជន៍ជាតិប្រជាជន និងមាតុភូមិ នោះនឹងគ្មានចោរ ឬខ្មាំងសត្រូវណាមកកាច់បំបាក់ ប្រជាជាតិខ្មែរឬឈ្លានពានបូរណភាពមាតុភូមិខ្មែរបានឡើយ”។

លោក គួច ខេវិន បានរំលឹកទៀតថា កាលពីឆ្នាំ២០១៨ កំឡុងសៀមឈ្លានពានប្រាសាទព្រះវិហារ លោកបានផលិតកម្មវិធីកំសាន្តឈុតឆាកចម្រៀង “ចង្កឹះមួយបាច់” ដើម្បីជាការរំលឹកដល់ស្មារតីរួបរួមជាតិខ្មែរការពារបូរណភាពអធិបតេយ្យជាតិខ្មែរ និងកំចាត់សត្រូវឈ្លានពានផងដែរ។

អ្នកផលិតកម្មវិធីទូរទស្សន៍រូបនេះបានបន្តថា នាពេលនេះលោកក៏សូមផ្ញើបទចម្រៀងនេះ ជាការជូនពរ និងជាកម្លាំងចិត្តដល់យុទ្ធជនខ្មែរដ៏អង់អាចក្លាហាន ដែលកំពុងតទល់ជាមួយចោរសៀមឈ្លានពាន តាមព្រំដែនសូមឱ្យវរយុទ្ធជនខ្មែរបានទទួលជ័យជំនះ គ្រប់ពេលវេលាយើងជឿជាក់លើរាជរដ្ឋាភិបាលក្នុងការការពាររក្សាសន្តិភាពសម្រាប់ប្រជាជន និងមាតុភូមិកម្ពុជានៃយើង។

សូមបញ្ជាក់ថា ការលើកឡើងរបស់លោក គួច ខេវិន ដោយចង់ឃើញខ្មែររួបរួមគ្នាជាធ្លុងមួយ របស់លោក គួច ខេវិន នាពេលនេះ ចំពេលដែលប្រទេសកម្ពុជាត្រូវបានសៀមធ្វើការវាយប្រហារដោយយោធាមុនមកលើកម្ពុជា នៅតាមតំបន់ព្រំដែនខ្មែរ-ថៃ កាលពីថ្ងៃទី២៤ ខែកក្កដា ហើយបើទោះជាមានបទឈប់បាញ់បានចូលជាធរមានតាំងពីរាត្រីថ្ងៃទី២៨ខែកក្កដា ប៉ុន្ដែមកដល់ពេលនេះយោធាថៃនៅតែបន្ដផ្គើមឈ្លានពានលើព្រំដែនខ្មែរ៕ ចាន់រ៉ា