ជីវិតកម្សាន្ដ

សាយ ប្រកាសព្រឹត្តិការណ៍រត់អបអរខួប ១ឆ្នាំ ប្រាសាទកោះកេរ ចុះក្នុងបញ្ជីបេតិកភណ្ឌពិភពលោក

បានផុស

៧ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

តារាចម្រៀង Original Song លោក អ៊ួន បឋម ហៅ សាយ បានប្រកាសអំពីការត្រៀមរៀមចំព្រឹត្តិការណ៍រត់ “KOH KER Heritage Trail” ក្នុងគោលបំណងដើម្បីអបអរសាទរខួប ១ឆ្នាំនៃប្រាសាទកោះកេរ ចុះក្នុងបញ្ជីបេតិកភណ្ឌពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពីសំណាក់តារាចម្រៀង សាយ បានឲ្យដឹងថា ចំពោះព្រឹត្តិការណ៍ “KOH KER Heritage Trail” នេះគឺ ធ្វើឡើងនៅចុង ខែកញ្ញា ឆ្នាំ២០២៤ ខាងមុខនេះ។ ជាមួយគ្នានេះដែរ លោក សាយ ក៏បានអំពាវនាវឲ្យមហាជន និងយុវជនចូលរួមព្រឹត្តិការណ៍ទាំងអស់គ្នាដើម្បីអបអរសាទរខួប ១ឆ្នាំនៃប្រាសាទកោះកេរ ចុះក្នុងបញ្ជីបេតិកភណ្ឌពិភពលោក។

លោក សាយ ក៏បានបង្ហាញនូវសកម្មភាពពីក្រោយវីដេអូផ្សព្វផ្សាយនៅតាមតម្រាយផ្លូវរត់ក្នុងព្រឹត្តិការណ៍ KOH KER Heritage Trailនៅថ្ងៃទី២២ ខែកញ្ញា ខាងមុខនេះ ផងដើម្បីអបអរសាទរខួប ១ឆ្នាំនៃប្រាសាទកោះកេរចុះក្នុងបញ្ជីបេតិកភណ្ឌពិភពលោកថ្ងៃទី១៧ កញ្ញា ២០២៣ – ១៧ កញ្ញា ២០២៤។

លោកបានបញ្ជាក់ថា ចំពោះកាលបរិច្ឆេទនៃរត់គឺ នៅថ្ងៃទី២២ ខែកញ្ញា នៅរមណីយដ្ឋានប្រាសាទកោះកេរ ខេត្តព្រះវិហារ។ ចំណែកទីតាំងចាប់ផ្ដើមរត់ គឺ បរិវេណស្នាក់ការអាជ្ញាធរជាតិព្រះវិហារ។ សាយ បានបន្ថែមថា តោះចូលរួមរត់ដើម្បីអបអរសាទរខួប ១ឆ្នាំដែលប្រាសាទកោះកេរ បានចុះក្នុងបញ្ជីបេតិកភណ្ឌពិភពលោកជាមួយពួកយើងទាំងអស់គ្នា។

សូមបញ្ជាក់ដែរថា តារាចម្រៀងOriginal Songលោក អ៊ួន បឋម ហៅ សាយ ត្រូវបានមហាជនអ្នកគាំទ្រចាត់ទុកថា លោកគឺជាសិល្បករខ្មែរមួយរូបដែលលេចធ្លោ តាមរយៈកិច្ចការងារចូលរួមសង្គម ពិសេសកន្លងមក សាយ បានបង្កើតកម្មវិធីរត់ដើម្បីប្រមូលថវិកាជូនដល់មន្ទីពេទ្យគន្ធបុប្ផា និងមន្ទីពេទ្យកុមារអង្គរជាដើម៕

អត្ថបទ៖ ចាន់រ៉ា