មិនខុសពីអ្នកម្តាយដទៃ! លោកស្រី ទ្រី ដាណា ក៏មកលើកទឹកចិត្តកូនស្រី ដល់មណ្ឌលប្រឡងដែរថ្ងៃនេះ

លោកស្រី ទ្រី ដាណា ត្រូវបានមហាជនខ្មែរមួយចំនួនធំស្គាល់ថា ជាម្ចាស់ហាងពេជ្រ និងជាអ្នកជំនួញផលិតផលរក្សាសម្រស់មួយរូប នៅកម្ពុជា ក៏មិនខុសអ្នកម្តាយទូទៅដែរ នៅវេលាថ្ងៃត្រង់នេះ លោកស្រីបានបង្ហាញវត្តមានក្បែររបងមណ្ឌលប្រឡងរបស់កូនស្រី បង្ហាញពីការយកចិត្តទុកដាក់ និងចាំលើកកម្លាំងចិត្តកូន។

តាមរយៈសារ អមដោយរូបភាពមួយសន្លឹក អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី រូបនេះ បានបង្ហាញក្តីស្រលាញ់ជាអ្នកម្តាយ ដោយរៀបរាប់ថា “រយលានអត្ថន័យ ដាណាភីនប្រឡងបាក់ឌុប ជូនពរកូនឲ្យជាប់និទ្ទេសល្អ” ។ ជាមួយនឹងសារជូនពរនេះដែរ សាធារណជនក៏បានចូលរួមជូនពរចំពោះ ដាណាភីន កូនស្រីរបស់លោកស្រីផងដែរ។

គួរជម្រាបថា នៅថ្ងៃនេះ ជាថ្ងៃប្រឡងសញ្ញាបត្របាក់ឌុប ដែលនឹងប្រព្រឹត្តទៅរយៈពេល២ថ្ងៃ គឺថ្ងៃទី០៨ និងថ្ងៃទី០៩តុលា ដោយមានបេក្ខជនដាក់ពាក្យប្រឡងចំនួន ១៣៧០៤០នាក់ ចែកជា ២៣០មណ្ឌល ត្រូវជា ៥៥៣៤បន្ទប់។ ក្នុងនោះ ដាណាភីន ក៏ជាបេក្ខជនប្រឡងសញ្ញាបត្រទុតិយភូមិមួយរូបផងដែរ នៅឆ្នាំនេះ។

ដោយឡែក ពាក់ព័ន្ធនឹងការប្រលងនេះដែរ ក្រសួងអប់រំ គ្រោងនឹងប្រកាសលទ្ធផលប្រឡងនៅថ្ងៃទី៣០ ខែតុលា ឆ្នាំ២០២៤ ពេលរសៀល សម្រាប់ការប្រកាសលទ្ធផលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី៣១ ខែតុលា ឆ្នាំ២០២៤ សម្រាប់ខេត្តផ្សេងៗនៅទូទាំងប្រទេស៕