គួច ខេវិន ប្រាប់អ្នកសិល្ប:ជំនាន់ក្រោយៗ ត្រូវចេះសន្សំទ្រព្យទុកសម្រាប់អនាគត ឬពេលមានជំងឺ

ផលិតករកម្មវិធីកម្សាន្តជើងចាស់លោក គួច ខេវិន បានបំផុសនិងផ្តាំផ្ញើដល់សិល្បករសិល្បការិនីជំនាន់ក្រោយៗ ត្រូវចេះសន្សំទ្រព្យសម្បត្តិដោយគុណធម៌ទុកសម្រាប់អនាគត ឬពេលមានជំងឺ ដើម្បីមានលទ្ធភាពព្យាបាលខ្លួនឯង។

ការលើកឡើងរបស់លោកគួច ខេវិន នេះ គឺដោយសង្កេតឃើញថា កន្លងមកមានសិល្បករសិល្បការិនីខ្មែរមួយចំនួនបានជួបការខ្វះខាតនៅក្នុងជីវភាពប្រចាំថ្ងៃ ដែលជាហេតុនាំឲ្យមានផលលំបាកសម្រាប់ខ្លួនឯង នៅពេលធ្លាក់ខ្លួនឈឺ ឬថ្ងៃអនាគត។ តួយ៉ាងដូចតារាកំប្លែងនាយ តាក់ស៊ី អំឡុងពេលធ្លាក់ខ្លួនឈឺ នាយគឺមានការខ្វះខាតថវិកាសម្រាប់ព្យាបាលជំងឺនិងការចំណាយផ្សេងៗជាដើម។

ក្នុងនាមរៀមច្បងនិងជាអ្នកសិល្ប:ជើងចាស់មួយរូប លោក គួច ខេវិន បានលើកជាគំនិតថា សូមផ្តាំផ្ញើដល់ប្អូនៗក្មួយៗសិល្បករសិល្បការិនីជំនាន់ក្រោយៗ ត្រូវចេះសន្សំទ្រព្យសម្បត្តិដែលរកបានប្រកបដោយសីលធម៌ គុណធម៌ និងសេចក្តីថ្លៃថ្នូរសម្រាប់អនាគតរឹងមាំរបស់ខ្លួនផង។

តាមរយ:ការលើកឡើងខាងលើនេះ អាចជាសាដាស់តឿនស្មារតីសម្រាប់អ្នកសិល្ប:ជំនាន់ក្រោយ ក្នុងការរៀបចំអនាគត ទន្ទឹមនឹងការខិតខំរកប្រាក់ ក៏ត្រូវសន្សំទ្រព្យសម្បត្តិដើម្បីមានជីវិតប្រសើរផងដែរ។

គួរបញ្ជាក់ថា លោក គួច ខេវិន ធ្លាប់បានដឹកនាំនិងគ្រប់គ្រងកម្មវិធីសិល្បៈរយៈពេលជាង ២០ឆ្នាំ មកហើយដែលក្នុងនោះកម្មវិធីដែលលោកផលិតចេញមកសុទ្ធតែបង្កប់ទៅដោយខ្លឹមសារអប់រំ បង្ហាញពីប្រពៃណីខ្មែរ និងអភិ​រក្សពីភាសាជាតិជាដើម៕ អត្ថបទ៖ ចាន់រ៉ា