លោក សុះ ម៉ាច ស្នើឱ្យបញ្ឈប់ការយកស្នាដៃចម្រៀងមរតកដើម មកកែទំនុក បម្រើប្រយោជន៍បុគ្គល

អតីតប្រធានសមាគមសិល្បករខ្មែរ និងតារាចម្រៀងជើងចាស់ លោក សុះ ម៉ាច បានចេញមុខទទូចសុំចំពោះតារាចម្រៀងមួយឱ្យបញ្ឈប់ការយកស្នាដៃបទចម្រៀងមរតកដើម មកកែទំនុក ដើម្បីបម្រើផលប្រយោជន៍បុគ្គល។

ការលើកឡើងរបស់តារាចម្រៀងលោក សុះ ម៉ាច នេះ ដោយសង្កេតឃើញមួយរយ:ចុងក្រោយ មានអ្នកចម្រៀងស្រី-ប្រុស និង អ្នកនិពន្ធខ្មែរជំនាន់ក្រោយមួយចំនួន បានកំពុងជ្រើសរើសបទចម្រៀងមរតកដើមទៅច្រៀងឡើងវិញ ដោយការឡៃសាច់ភ្លេង ឬទំនុកច្រៀងធ្វើឱ្យខូចទំនុកដើម និងប៉ះពាល់ដល់កម្មសិទ្ធិបញ្ញា។

លោក សុះ ម៉ាច ស្នើសុំយ៉ាងដូច្នេះថា “ជាសំណូមពររបស់ខ្ញុំ បើឈប់បានគួរឈប់ទៅនូវការយកបទចម្រៀងមរតកដើមមកកែទំនុកបម្រើបុគ្គល ឬក្រសួងមន្ទីរតទៅទៀត គួរងាកមកឱ្យតម្លៃអ្នកនិពន្ធបទភ្លេងជំនាន់ថ្មីខ្លះផង ម៉្យាងវិញទៀតដើម្បីអភិវឌ្ឍន៍ និងអភិរក្សបទចម្រៀងមរតកដើមផងដែរ”។

ទន្ទឹមនេះ លោកក៏បានលើកឡើងពីការព្រួយបារម្ភដែរថា បើនៅតែបន្តយកបទចម្រៀងមរតកដើមមកកាឡៃកែទំនុក ឬប្តូរប្រុសជាស្រី-ស្រីជាប្រុសនោះជាការបំផ្លាញស្នាដៃម្ចាស់ដើមហើយត្រូវធ្វើអ្វីជាស្នាដៃរបស់មនុស្ស សម័យនេះឱ្យច្រើនជាងនេះទើបវិស័យសិល្ប:ចម្រៀងរីកចម្រើន។ លោកបន្ថែមទៀតថា “ខ្ញុំសូមគោរពសរសើរប្អូនៗដែលបានបង្កើតថ្មីដោយខ្លួនឯង នូវបទចម្រៀងរហូតទទួលបានកាគាំទ្រជាសកលដែលវាជាស្នាដៃរបស់សម័យប្អូន”។

គួរបញ្ជាក់ថា នេះពុំមែនទើបជាលើកទី១នោះទេ ដែលលោក សុះ ម៉ាច ចេញមុខប្រតិកម្ម ហើយតែងធ្វើការរិះគន់ជាបន្តបន្ទាប់លើបញ្ហានេះ ប៉ុន្តែជាលទ្ធផលហាក់ពុំមានប្រសិទ្ធិភាពនោះឡើយ៕ អត្ថបទ៖ ចាន់រ៉ា