ទាយាទគ្រប់គ្រងមរតកស្នាដៃ កវីនិពន្ធ នូ ហាច នឹងប្រគល់វណ្ណកម្មស្នាដៃឪពុក ដល់សមាគមអ្នកនិពន្ធខ្មែរ បោះពុម្ពផ្សាយឡើងវិញ

គណៈនាយក និងគណៈកម្មការបោះពុម្ពផ្សាយនៃសមាគមអ្នកនិពន្ធខ្មែរ នឹងបោះពុម្ពផ្សាយរាល់វណ្ណកម្មរបស់ កវីនិពន្ធ នូ ហាច ឡើងវិញ ដោយរក្សាក្នុងរូបភាពដើមទាំងស្រុង ដើម្បីតម្កល់ច្បាប់ដើមសម្រាប់ការសិក្សាផ្នែកអក្សរសាស្ត្រអក្សរសិល្ប៍។ នេះបើតាមការប្រកាស របស់សមាគមអ្នកនិពន្ធខ្មែរ កាលពីថ្ងៃទី៤ ខែឧសភា ឆ្នាំ២០២៥។

ក្នុងជំនួបរវាងគណៈនាយក និងគណៈកម្មការបោះពុម្ពផ្សាយនៃសមាគមអ្នកនិពន្ធខ្មែរ ជាមួយលោក នូ វិរម្ម ទាយាទគ្រប់គ្រងមរតកវណ្ណកម្មស្នាដៃ កវី នូហាច កាលពីថ្ងៃទី៤ ខែឧសភា ឆ្នាំ២០២៥ ភាគីទាំងពីរបានពិភាក្សាគ្នា លើការរៀបរៀងលិខិតប្រគល់មរតកវណ្ណកម្ម កវីនិពន្ធ នូ ហាច ទាំងអស់ដល់សមាគមអ្នកនិពន្ធខ្មែរ ដែលធ្លាប់ទទួលសិទ្ធិបោះពុម្ពផ្សាយឡើងវិញ។ 

លោក នូ វិរម្ម បានទទួលយកសំណើ និងសម្រួលឱ្យសមាគមអ្នកនិពន្ធខ្មែរ បោះពុម្ពវណ្ណកម្មទាំងនោះ ក្នុងរូបភាពដើមទាំងស្រុង ដើម្បីតម្កល់ច្បាប់ដើមសម្រាប់ការសិក្សាផ្នែកអក្សរសាស្ត្រអក្សរសិល្ប៍។ 

គួរជម្រាបថា កន្លងមក សមាគមអ្នកនិពន្ធខ្មែរ បានបោះពុម្ពវណ្ណកម្មរបស់កវីនិពន្ធល្បីឈ្មោះរបស់កម្ពុជារូបនេះ រួមមាន៖១. រឿង ផ្កាស្រពោន ឆ្នាំ១៩៤៧, ១៩៤៨, ១៩៤៩។
២. រឿង មាលាដួងចិត្ត ឆ្នាំ១៩៧២។
៣. រឿង ត្រួយជីវិត ឆ្នាំ១៩៧៣។
៤. មធុរសជាតិ សិក្សាអត្ថបទ ដកស្រង់ពីទស្សនាវដ្តីនារីលេខ១០ ទំព័រ៣៥៣ ដល់ ៣៥៦ ខែតុលា ឆ្នាំ១៩៥១។
៥. រឿងខ្លី កូនក្រក ផ្សាយដោយទស្សនាវដ្តីរួមមិត្តលេខ៨ ថ្ងៃទី១៥ ខែឧសភា ឆ្នាំ១៩៥៣ ទំព័រ១៥ និង១៦។
៦. ដំណើរចេញទៅប្រទេសបារាំង កាព្យបែបបារាំង ផ្សាយដោយទស្សនាវដ្តីនារី លេខ១៥ ឆ្នាំ ១៩៥២។
៧. ខ្ទីង កាព្យបែបបារាំង ផ្សាយដោយទស្សនាវដ្តីនារីលេខ ១១ ខែវិច្ឆិកា ឆ្នាំ១៩៥១ ទំព័រ៣៩៦។
៨. រឿង នារីជាទីស្នេហា ឆ្នាំ១៩៥៣។
៩. លាវ័ណ្យ និង រវិន្ទ ឆ្នាំ១៩៥៣ បោះពុម្ពភាគ១ ឆ្នាំ ១៩៥៥ បោះពុម្ពភាគ២។
១០. រឿងខ្លី ល្បាតគយក្នុងគ្រាមួយនៅទន្លេសាប ដកស្រង់ពីទស្សនាវដ្តីរាត្រីថ្ងៃសៅរ៍ លេខ ១0 ថ្ងៃ ទី១៩ ខែកុម្ភៈ ឆ្នាំ១៩៥២ ទំព័រ២៩ ដល់៣១។
១១. ថូបែក កាព្យបែបបារាំង លោកនូ ហាចដកស្រង់ពីទស្សនាវដ្តីនារីលេខ១៣ ខែមករា ឆ្នាំ១៩៥២ ទំព័រ១១។