កិច្ចប្រជុំអាស៊ានបញ្ចប់ ខណៈអាមេរិក និងចិន ប្រជែងគ្នាដណ្តើមឥទ្ធិពលក្នុងតំបន់

កិច្ចប្រជុំកំពូលអាស៊ានលើកទី៤៧ ក្នុងទីក្រុងគូឡាឡាំពួរបានបញ្ចប់កាលពីថ្ងៃអង្គារទី២៨ តុលា ខណៈដែលសហរដ្ឋអាមេរិកបានសង្កត់ធ្ងន់លើគំនិតផ្តួចផ្តើមពាណិជ្ជកម្មទ្វេភាគី ចំណែកចិនណែនាំក្របខ័ណ្ឌតំបន់ពាណិជ្ជកម្មសេរីចិន-អាស៊ាន (CAFTA) 3.0 ពោលគឺបន្តឡើងវិញនូវសំណើមួយដែលផ្តោតលើពហុភាគីនិយម សេដ្ឋកិច្ចបៃតង និងការអភិវឌ្ឍប្រកបដោយចីរភាព។

យ៉ាងណា ភាពផ្ទុយគ្នារវាងវិធីសាស្រ្តទាំងនេះ បានឆ្លុះបញ្ចាំងពីការវិវត្តនៃពាណិជ្ជកម្ម និងគូសបញ្ជាក់ពីការប្រកួតប្រជែងរវាងអាមេរិក និងចិន ក្នុងការប្រជែងគ្នាដណ្តើមឥទ្ធិពលនៅអាស៊ីអាគ្នេយ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអាមេរិក លោក ដូណាល់ ត្រាំ បានចូលរួមនៅថ្ងៃបើកសម្ពោធ ដោយសន្យាថានឹងចូលរួមកាន់តែខ្លាំងជាមួយសហរដ្ឋអាមេរិកនៅក្នុងតំបន់ទាំងនេះ។ លោកបានចុះហត្ថលេខាលើអនុស្សរណៈមួយចំនួន ជាមួយប្រទេសអាស៊ាន ស្តីពីកិច្ចសហប្រតិបត្តិការលើរ៉ែសំខាន់ៗ និងកិច្ចព្រមព្រៀងសេដ្ឋកិច្ចថ្មីៗ។

ដោយឡែក នាយករដ្ឋមន្ត្រីចិន លោក Li Qiang ឯណោះវិញ បានសម្តែងការព្រួយបារម្ភអំពីគោលនយោបាយពន្ធគយរបស់រដ្ឋបាលលោកត្រាំ។ លោកបានអំពាវនាវឲ្យមានទំនាក់ទំនងសេដ្ឋកិច្ចកាន់តែស៊ីជម្រៅជាមួយអាស៊ាន និងបានចុះហត្ថលេខាលើពិធីសារ ដែលបានកែសម្រួលសម្រាប់កិច្ចព្រមព្រៀងពាណិជ្ជកម្មសេរីរបស់ប្លុកជាមួយចិន។

ទោះជាយ៉ាងណាក៏ដោយ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានកិច្ចប្រជុំ បានសរសើរលទ្ធផលនៃកិច្ចប្រជុំកំពូលនៅថ្ងៃចុងក្រោយរបស់ខ្លួន។ លោកបានមានប្រសាសន៍ថា ដោយការស្វាគមន៍ទាំងលោកត្រាំ និងលោក Li Qiang ការជួបជុំគ្នាបានឆ្លុះបញ្ចាំងពីភាពជាចំណុចកណ្តាលរបស់អាស៊ាន។

លោកបានមានប្រសាសន៍ថា «ខ្ញុំសូមសរសើរ និងអបអរសាទរដល់សហការីរបស់ខ្ញុំ គឺអាស៊ាន ចំពោះប្រាជ្ញាក្នុងការរក្សាភាពជាចំណុចកណ្តាល និងរក្សាទំនាក់ទំនងមិត្តភាពជាមួយប្រទេសទាំងអស់របស់យើង»។

ទន្ទឹមនឹងនេះដែរ លោក Mahathir Mohamad នាយករដ្ឋមន្ត្រីដែលកាន់តំណែងយូរជាងគេបំផុតរបស់ប្រទេសម៉ាឡេស៊ី ដែលមានអាយុ ១០០ ឆ្នាំនៅឆ្នាំនេះ បានប្រាប់សារព័ត៌មាន NHK អំពីការព្រួយបារម្ភរបស់លោក។

លោកបានមានប្រសាសន៍ថា ម៉ាឡេស៊ីចង់ធ្វើជាមិត្តជាមួយអាមេរិក ហើយក៏ចង់ធ្វើជាមិត្តជាមួយចិន និងប្រទេសនៅបូព៌ាដទៃទៀត។ ប៉ុន្តែលោកបានបន្ថែមថា សហរដ្ឋអាមេរិកឥឡូវនេះ កំពុងបង្ខំម៉ាឡេស៊ីឲ្យទិញទំនិញរបស់សហរដ្ឋអាមេរិក និងកាត់បន្ថយពាណិជ្ជកម្មរបស់យើងជាមួយចិនទៅវិញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ក្រៅពីលោក អាន់វ៉ា, ពលរដ្ឋកម្ពុជាត្រូវអរគុណលោកត្រាំ ម្នាក់ទៀត ចំពោះកិច្ចព្រមព្រៀងសន្តិភាពជាមួយថៃ