ក្រៅពីលោក អាន់វ៉ា, ពលរដ្ឋកម្ពុជាត្រូវអរគុណលោកត្រាំ ម្នាក់ទៀត ចំពោះកិច្ចព្រមព្រៀងសន្តិភាពជាមួយថៃ

បន្ទាប់ពីសម្ដែងការអរគុណនិងកោតសរសើរនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីមរួចរាល់ ពលរដ្ឋកម្ពុជាត្រូវអរគុណប្រធានាធិបតីអាមេរិក ដូណាល់ ត្រាំ ដែលជាសាក្សីសំខាន់ក្នុងពិធីចុះហត្ថលេខាលើកិច្ចព្រមព្រៀងសន្តិភាព រវាងថៃ និងកម្ពុជា កាលពីថ្ងៃអាទិត្យទី២៦ តុលា ឆ្នាំ២០២៥ ក្នុងទីក្រុងគូឡាឡាំពួរ។

ថ្វីដ្បិតតែការចុះហត្ថលេខារវាងកម្ពុជានិងថៃ បានបញ្ចប់ទៅក៏ពិតមែន ប៉ុន្តែទឹកចិត្តដ៏ធំធេងរបស់ប្រធានាធិបតីអាមេរិក មកលើប្រទេសកម្ពុជាគឺជាគុណបំណាច់មួយដែលជនជាតិខ្មែរមិនអាចបំភ្លេចបាននោះទេ។ ជាក់ស្ដែង នៅលើទំព័រហ្វេសបុកផ្ទាល់របសលោកត្រាំ ពលរដ្ឋកម្ពុជាជាច្រើនបានចូលរទៅបញ្ចេញមតិនៅក្រោមរូបភាពចុះហត្ថលេខា​លើ​កិច្ចព្រមព្រៀង​នាំមកនូវសន្តិភាព។

តាមការបញ្ចេញមតិនៅលើបណ្ដាញសង្គមហ្វេសបុក ពលរដ្ឋខ្មែរជាច្រើនបានសម្ដែងនូវការដឹងគុណ និងអរគុណយ៉ាងក្រៃលែងជូនចំពោះលោកត្រាំ ដែលតាំងពីដើមទីមកលោកបានផ្ដួចផ្ដើមនិងជំរុញឲ្យបង្កើតកិច្ចព្រមព្រៀងសន្តិភាពកម្ពុជា-ថៃ។ ជាមួយគ្នានោះដែរ កម្ពុជាក៏បានតែងតាំងប្រធានាធិបតីអាមេរិក ជាបេក្ខភាពពានរង្វាន់ណូបែលសន្តិភាពតាំងពីលោកបានជួយជ្រុមជ្រែងនិងជួយ​សម្រុះសម្រួល​បទ​ឈប់​បាញ់​បឋម កាលពី​ថ្ងៃទី២៨ ខែ​កក្កដាមកម្ល៉េះ។ ដូច្នេះហើយ លោកបានក្លាយជាម្ចាស់រង្វាន់ណូបែលសន្តិភាពនៅក្នុងដួងចិត្តប្រជាជនខ្មែររួចទៅហើយ បើទោះជាមិនបានឈ្នះពានពិភពលោកក្ដី។

នាពេលកន្លងមក ទាំងលោកត្រាំនិងអាន់វ៉ា សុទ្ធតែជាសាក្សីដ៏សំសំខាន់ដែលត្រូវបានគេដឹងថា ជាអ្នកជំរុញឲ្យបង្កើតកិច្ចព្រមព្រៀងសន្តិភាពកម្ពុជា-ថៃ ហើយបំណងធំបំផុតរបស់លោត្រាំដែលមកកាន់ប្រទេសម៉ាឡេស៊ី ពោលដើម្បីចូលរួមចុះហត្ថលេខាក្នុងនាមជាសាក្សីលើកិច្ចព្រមព្រៀងសន្តិភាពនេះ។

សូម្បីតែនាយករដ្ឋមន្ត្រីម៉ាឡេស៊ីផ្ទាល់ ក៏បានសម្តែងការកោតសរសើរចំពោះប្រធានាធិបតី ដូណាល់ ត្រាំ ដែលការចូលរួមរបស់លោក បានលើកទឹកចិត្តដល់មេដឹកនាំកម្ពុជា និងថៃ ឲ្យចាត់វិធានការឆ្ពោះទៅរកការផ្សះផ្សាគ្នាឡើងវិញ។ លោកបានបន្ថែមថា «កិច្ចព្រមព្រៀងកម្ពុជា-ថៃ នឹងឈរជាសក្ខីភាពនៃសំឡេងដែលកំពុងកើនឡើងរបស់អាស៊ាន ក៏ជាស្ពានសម្រាប់សន្តិភាព ដោយបង្ហាញថា ការសម្របសម្រួល និងការសន្ទនាសុទ្ធតែអាចដោះស្រាយបាន ទោះជាជម្លោះនោះជាប់គាំងយូរបំផុតក៏ដោយ»៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ប្រជាជន កម្ពុជា ដឹងគុណលោក អាន់វ៉ា ​​ក្រោយជួយឲ្យមានកិច្ចព្រមព្រៀងសន្តិភាពជាមួយ ថៃ